.,؛×~وانتهت الإجازة

Heeey University ....we are back ><

Back to studying..

Back to homeworks

Back to

nerve breaking projects

tiredness

and back to the hard work

wish you all A happy ..easy .. none pressure year<

---------------------------

سكيتشااااااااات سريعة

ذلك اليوم كنت طفشانة ملانة وضايق خلقي..ويا على بالي أرسم وأشخبط..

فرسمت هالرسمة عالسريع ..جي مال خمس دقايق يعني...لايغركم ترى الرسمة صغيرة مال ربع صفحة مو كبيرة ..استغربت إن خواني عيبتهم الرسمة ^^

تذكرت صورة مالت Engineer A مالت سويسرا حسب ماذكر :)

وهاي رسمتها أمس ..بمناسبة العودة للجامعة (-_-")...جذي تجربة حق رسم الكاركتير ..حتى هاي صغيرة ومال خمس دقايق ^^

---------------------------------------

في البوست اللي طااف واايدين منكم سألني عن الرواية <<أصلح أسوي دعايات كتب صح خخخخخ ^^

الرواية هذي كانت من ضمن مجلد كامل للكاتب مصطفى المنفلوطي ..

أذكر على أيام ثالث إعدادي يوم إنفتح معرض الكتاب اشتريت كتاب صغير عبارة مجموعة قصص قصيرة للمنفلوطي..وحبيت أسلوبه وقصصه فطلبت من أخوي ييب الإصدارات الباجية لكنها خلصت فأشترى المجلد الكامل لكل كتابات المنفلوطي ..

وهي مقسمة ..ترى الكتبا كبير ومتين ^^

أقسامه هي

- النظرات -الجزء الأول-والثاني-والثالث >>وهي عبارة عن مقالات المنفلوطي مجمعة واللي كان يكتبها في عموده الخاص بإحدى في صحيفة (المؤيد)..وكانت باسم "أسبوعيات" ..وهم هذي واايد حلوة مواضيع متنوعة وتتناول قضايا مختلفة ..يشرحها المنفلوطي بأسلوبه الحلو ..وايد كنت أستمتع بقرايتها :)

كنت مفكرة من فترة أحط شي من كتاباته وأناقشها ..إن شالله راح أحاول أنزل بوستات عنه قريب

وبعدها شي مجموعة روايات المنفلوطي وهي ..

- في سبيل التاج ..<<تأليف فرانسوا كوبيه وترجمها المنفلوطي

- ماجدولين أو تحت ظلال الزيزفون <<رواية فرنسية للأديب الفرنسي ألفونس كارل عربها وأعاد صياغتها المنفلوطي

- الفضيلة أو بول وفرجيني >>أيضا رواية فرنسية للأديب الفرنسي برناردان دي سان بيار ..اطلع المنفلوطي على ترجمتها وأعاد صياغتها بأسلوبه الحلو :)

- الشاعر أو سيرانو دي برجراك <<للأديب الفرنسي إدمون روستان ترجمها حرفيا الدكتور محمد الجندي وأعاد المنفلوطي ترجمتها بالمعنى وصياغتها دون الإخلال بأي حدث في القصة وهي روااااايتي المفضلة وللحين ما في رواية يت تنافسها بالنسبة لي على الأقل :)

-العبرات<<هذي المجموعة القصصية اللي قريتها وضع بعضها المنفلوطي وترجم بعضها الآخر صديقه عن الفرنسية ..وبالأخير ترجمها المنفلوطي بأسلوبه وأعاد صياغتها وجمعها في كتاب واحد باسم العبرات

أسلوب المنفلوطي وايد حلو وخفيف وسلس ..حتى لو بعض المواضيع اللي يتكلم فيها ممكن تكون سياسية لكنها بسيطة في الطرح..والقصص اللي ترجمها عرف شلون يعيد صياغة القصة بأسلوب يخيل للقارئ بأنه هو نفسه مألف القصة..من ناحية أسلوب وتسلسل الأحداث

هذا المجلد هو الأول في قائمة مفضلتي ..وايد حلو :)

*** للي حابين يشترون الكتاب بس مترددين ..راح تحصلون أقسام الكتاب منفصلة ..يعني بتحصلون مثلا رواية الفضيلة في كتاب بروحها والنظرات جذي ..اشتروا جزء وإذا عيبكم اشتروا المجموعة كاملة :)

.,؛×~الجائزة

السلام عليكم جميييييييييعا يا أهل التدوين

رمضااان قرب يخلص ..بسرعة خلص ..

صايرة عندي لخبطة أبي أحطي بوستات لكن ماعرف شو أحط قبل شو ..

المهم ..ولأني ما حبيت أطول على الفايزين ويتحسبون نسيت جائزتهم(^_~)..فأمس قعدت ..من العشر ونص مارفعت راسي عنهم إلا الساعة ثلاث الفير وأنا أجهز جائزتهم ...وخلصتهم ...وين بنت عمووو سمو الأميرة ..وعمو رورو ..خل يتسلمون جائزتهم...تدرون شو اللي يضحك سألت أخوي نفس الأسئلة وماعرف يجاوبهم خخخخخخخ تتخيلون عاد أقول 17 سنة وأنا أختك ماتعرف هالأشيا ..ههههه مشكلة ..المهم

شوفوهم إن شالله تعجبكم ^^

.

.

تتتتدااااااااااااااا

الملكة سمو الأميرة والوصيفة رورو ^^

قبل التلوين ^^

بتلاحظون حياتها قبل التلوين تغيرت بعد التلوين

صارت لخبطة شوي ..بس تصلحت ^^

وبعد التلوين ...

الملكة >> سمو الأميرة

قبل التلوين ^^

بعد التلوين

الوصيفة >> رورو الشخبوطة

وهذي الجائزة شوووو راااااايكم حلوين صح مثل أصحابها ^^

~ودمتم سالمين~

.,؛×~رسمة فرش

مرحبا جميييعا ..مدونين ومدونات ..كيف هو رمضان معاكم..ترى خلصوا أول عشرة أيام من رمضان ..وصرنا في "أوسطه رحمة "..الله يرحمنا وإياكم إن شالله ..ويبلغنا العشر الأواخر ونختمها بعتق من النار يارب ..اليوم الله يسلمكم يايبتلكم رسمة فرش ..يعني يديدة ..من يومين يا على بالي أرسم..وكانت رغبة الرسم قوية ..يعني مويوم وأسكت ..جي صوت فداخلي يقول"أم حروبي لازم ترسمين"..حسيت عمري مدمنة رسم خخخخخ...المهم جان أفتح ملف الصور اللي عندي أختار شي أرسمه ..أقلب وأقلب لين رسيت على رسمة ..وقلت باجر بإذن الله راح أرسمها..>>شو استوى ..

الله يسلمكم في نفس اليوم وأنا جذي قبل ما أنام ..بما إني صايرة ما أنام إلا وقت السحور..فعندي جي ساعتين بس أطالع السقف وأفكر ...جان تيلي فكرة رسم جهنمية خخخخ...وثاني يوم ما صدقت خبر ورسمت وسويت طاف حق الصورة اللي اخترتها ...والحمدلله رسمتها مثل ما تخيلتها ...وكانت الرسمة بعنوان "إن كيدكن عظيم"...طبعا تعرفون منو المقصود خخخخ..مستعدين ..

أولا طبعا رسمتها بالرصاص ...وتعقدت ماعرف شلون أرسم الإيد..عاد ما تشوفون شكلي شلون وماسكة القلم جنه سيجارة وأطالع إيدي من المراية وأرسم ...

وبعدها بديت بالتلوين ..وهذي الإعصار اللي سويته بالألوان ...

وأخيرا وليس آخرا ..

1

.

.

.

2

.

.

.

3

.

.

تتدااااااااااااااااا

أخوي وإختي معقديني كلما أرسم يقولون شيلي السيجارة ...أم حروب شيلي السيجارة ..أقول "مابي...أصلا أساس الفكرة هالسيجارة والثعبان.."...طبعا أبي أوضح شي ..أنا ماقصدت بالسيجارة والثعبان غير فكرة الخبث مو شي ثاني >>>هيه لا يروح فكركم بعيييد ..

وجذي إن شالله إعجبتكم ..تراها فرش اليوم الفير بس خلصتها ..

*ترى الرسمة تحتاج شوية تضبيط مني ومناك ..بعدين بعدلها ..أهم شي رسمت وارتحت ^^

.,؛×~رسماااتي بالفحم

السلام عليكم جمييعا..اممم بما إني أحب الرسم والحمدلله الله أنعم علي بايدين حلوين فنانات بالرسم خخخ فاليوم حبيت أراويكم بعض من رسماتي بالفحم ...ممم أخبركم شي أنا من النوع لما أشوف صورة تعجبني أحب أرسمها وهني حطيت الصور ورسمي لها تقدرون تقارنون طبعا راح يبين إني أحيانا أغير الرسمة على مزاجي والدليل أول رسمة ..خل نبدأ باسم الله ..

الله يسلمكم هذي أساسا كانت صورة لبنوتة صغيرونة في الجريدة أنا رسمتها ومادري شلون لعبت يمين يسار جان تكبر خخخخخ وهاللي طلع معاي ..وطبعا لاحد يعلق على إيديها مادري شلون طلعوا معوقين هههه

وهذي الوردة كانت أول تجاربي في الرسم بالفحم وحبيتها الصراحة (^^)وعقبها الصورة الأصلية ..

الأصلية

اممم هالرسمة مادري شو قصتها ..بكبرها أسود في أسود ..لو تلاحظون البنت اللي بالصورة الأصلية لابسة بنطلون أنا لبستها تنورة خخخ

بكبرها الرسمة شخابيط عشان الغيوم

وهذي الأصلية ..يللا طلعوا الفروق العشرين ههههه

امممم وهاي رسمة ثانية ..تعتبر الرسمة مو كاملة لأني ما سويت الظلال ..أو بالأحرى سويتهم لكن مع الأيام الفحم يروح كل مرة أعيد اسويهم ويروح ..مايتم واايد ..يعني هالولد كم مرة حاولت أغمج الجاكيت ماله ويرد يفتح

الأصلية

وهذي الرسمة ..حدث ولاحرج ..أكرهها ..مادري شو حادني أرسم أم كشة هذي ..لا شعرها يضبط وعيونها وحده أكبر من الثانية خخخ شكلها جايسنها رمد خخ..السبب إن الفحم كان يلون العين كامل ..بمسحة وحدة الرسمة بكبرها تخترب

وهذي أم كشة ..

وأما هاي ..فالخلفية بس رسمتها من صورة ..أما اليهال فأنا رسمتهم من خيالي ..حبيتها ..بس حاولت ألونها واخربت وبالتالي تعلمت إن الرسم بالفحم يكون بس بالفحم ..بدون إضافة الوان ^^)..لاحظوا الولد اللوتي يالس يلعب صوب البنات ..حركات أولاد خخخخخخخ

وهذي الخلفية ..

وأخيييييييييييييييييييييييرا ..خليت the best for the last ..بما إني أعشق شي إسمه خيل ..فهذي تعتبر أحلى وأحب رسماتي ..ووايدين بغوا ياخذونها ..قلتلهم لا وألف لا ..وهاي ما رسمتها عن صورة ..لأني أحب الخيل كنت أبي أتعلم أرسم ودخلت النت وكان شي دروس لرسم الخيل وطبقتها ..وهذي النتيجة ^^..في رسمة ثانية والخيل تركض بس نسيت أصورها ..فبراويها لكم في تدوينة ثانية..شو رايكم ..مو أحلى رسمة !!

وجذي ..يكون معرض فن الرسم بالفحم قد إنتهى ..من زمان ما رسمت لا بالفحم ولا بالألوان المائية بخاطري أرسم ..وهذي الرسمات من زمان راسمتنها ...

ودمتم سالمين ~ِ