.,،×~أم حروبي والتصميم المرحلة الأولى _2

مرحباااا يا جماعة الخير 

جيفكم ,,وأخباركم ^^

اممممم ما بقرق وايد على راسكم بالمقدمة 

هالتدوينة رتبت صورها وخليتها مسودة صارلها دهر 

,,كل مرة أأجلها :\

المهم ..فقلت لازم احط شي عن العمارة لان من زمان كان اخر بوست 

اللي هو كان بوست شغل القروب والتحرطم الزايد ههههه 

هالبروجكت كان ثاني بروجكت عقب هاك والحمدلله كان شغل فردي -ـ-"

ولما عرفت انه فردي ..قلت بيني وبين نفسي 

"أنا بوريهم من هي اللي ما تشتغل"

كان البروجكت بمثابة تحدي إني أثبت لهم "قروب البروجكت الأول"

انهم ظلموني وقالوا عني اللي مو فيني !

المهم ..

المشروع كان عبارة عن تصميم 

Courtyard House

وهو تصميم فيلا بطريقة بيوت أول كيف إن "الحوي\الحوش" اللي هو courtyard 

يكون بنص البيت أو قلبه ,,,يعني كل غرف الفيلا تكون محاوطة الحوي

كان موقع المشروع أرض خالية صوب سكن دكاترة الجامعة هاي صورة المكان ..

رحناه وقمنا نقايس حدود الموقع عشان نبدا 

بداية ..علينا ندرس موقع المشروع ..اتجاه الشمس وأكثر جهة تستقبل الرياح 

والرطوبة ونوع الأشجار وما إلى ذلك ..

ثاني خطوة كانت ندور أمثلة لهالنوع من البيوت ..وندرسها 
ورحنا زيارة "لبيت النابودة" بالشارجة كمثال لان هالنوع من البيوت كان شايع 
زمان أول ..
وهاي الصورة لما كنت أجهز البورد عشان أقدم المثال اللي حصلته 

وثالث خطوة نبدأ بفكرة التصميم والتطبيق..

كانت من شروط المشروع انه ما نزيل اي شجرة من الموقع ..عشان نحافظ على البيئة 

وفي اسوا الحالات نقدر نزيح الشجر ونغير مكانه

كان الشي اللي استوحيت منه فكرة مشروع هو 

الصدف الحلزوني ..

كانت هذي أول مرة نطلع فكرة ونطبقها ...فسويت دزايني الأولي على شكل حلزون بالضبط 

من هاي الصورة 

لكن المس قالت لي إن لما نستلهم من شي ما نسوي المبنى على شكله بالضبط لكن 

ناخذ خصايص ونطورها ..

مثلا أن اخترت الصدف الحلزوني ..مميزاته 

-الاستدارة 

-ملمس الصدف الناعم

-الخطوط الذهبية 

وجي ..وتختارين احد هالميزات او اكثر وترسمين افكار عليها ...

فبعد عالكلام بديت اطور دزايني 

وهاي ثاني محاولة ..وكان يحتاج تطوير أكثر 

وقعدت اطوره الين المس قالت يكفي ..

وبدينا تضبيط البلانات 

والحين وقت التسليم..

أنا المدمغة كان عبالي النموذج لما نسويه 

نسويه بتقسيمات الغرف والتصميم الداخلي

وكان قياس النموذج المطلوب صغير وايد..

فطلعت عيني وأنا اقصقص فالبورد واسوي الدرايش 

والدرج والطلعات والنزلات ..

وهاي صورة الفيلا من داخل 

ومن جهة ثانية 

وهذا بعد ما خلصته ..

حبيته وااايد ^^

خصوصا شكل السقف كان غريب وعجبني 

فرحت عند المس وكان ها يوم قبل التسليم كنت مخلصة الرسمات كلها بس باقي النموذج 

فراويت المس ..وصدمتني صدمة حياتي لما شافته ..

قلتلها عيوني راحت فيها وانا اسوي التقسيم الداخلي 

جان تقولي منو قالج انه نبي التقسيم الداخلي ..النموذج بس عشان ترواينا شكله الخارجي 

انا عاد هني كنت على شفا حفرة من الانهيار T_T

ولما شافتني المس كيف ملامحي تغيرت ..قالت بس على فكرة ترى التقسيم محلي النموذج

بس علقت على السقف وقالت لي انه مو عملي  خصوصا حق فيلا ..

ممكن يتطبق على مبنى ثاني بس بعد يحتاج اشيا كثيرة ..

فغيرته بالرغم اني كنت حابته ..وسويته بهالطريقة 

زووووم على التقسيم من داخل 

لقطات للنموذج قبل التسليم 

المنظر من فوق يعطي احساس خفيف بالصدف الحلزوني ..

وهاي رسم ثري دي للنموذج 

الالوان وايد فاتحة فمايبين ..كبروا الصورة عشان توضح 

هاي البلانات والرسم المقطعي الجانبي 

وها بورد الفكرة والايحاء ..شغل اخر لحظة ههههه 

واخيرا كان البريسنتيشن ..
^^

وبس بجذي اكون خلصت البروجكت ..
واحلى شي يوم استلمنا الدرجات وانا الوحيده اللي يبت بي بلاس والبقية بي واقل 
كان شعور لا يوصف وانا اشوف اشكال العذال وهي مصدومة ومقهورة من الدرجات ^^
وانا كنت فداخلي ارقص 
>>جي<<

هههههههههههههههههههههه 

وبس 
دمتم سالمين ^^

.,،؛~× أم حروبي والتصميم المرحلة الأولى_1

السلام عليكم ورحمة الله وبركاااااااااااااااااااااااااااااااااااته يا جماعة الخير شلووووووووووووووووونكم شخباااااااااااااااااااااااااااااركم من زمااااااااااااااااااااان بعييييد بعييييييييييييييييييييييييييييييييييد جدا ما نزلت تخبيصااااتي في عالم الهندسة ...من متى و أنا كل مرة أقول بنزله الله جنه مو رايدني أنزل هالبوست كلما قلت بنزل يختفي الهارد دسك مالي اللي مخزنة فيه الصور ...مرتين هالحركة ...والله نسيت أقولكم سالفة الهارد هذا لوع جبدي والله ...أذكر أول مرة اكتشفت انه ضايع قلت وينه ..اتصلت باستاذ المعهد لانه كان يستخدمه عشان ياخذ الصور من الملف ...قالي "أنا عطيتج الهارد" مع اني كنت متاكده اني ما خذته منه ...تميت ادوره وا دوره واسال البنات وماحصلته الين اتصلت بالمعهد وقالولي انه موجود هناك ..طلع الاستاذ  ناسينه متصل بالكمبيوتر ..،هاي المرة الأولى ...ثاني مره كنت اطبع حق الديزاين المههم رديت نفس اليوم وبالليل يوم كننت بشتغل حق الديزاين واعدله ..دورته دورته ماحصلته ..ماتم مكان مادورته شنطي كلهم سيارتي سيارة ابوي ...وثاني يوم ماخليت حد ما سالته اذا شافه ...تبغون الصراحة بالبداية لما ضاع ما اهتميت وايد يعني كنت ابي احصله لكن يعني مو مستذبحة عليه رغم انه فيه صوري ..بس كلما حد يعرف بالموضوع اول سؤال يسالني اياه "فيه صورج؟؟" ولما ارد بالايجاب تكون ردود فعلهم تخوف ..يعني مو اني مو خايفه على صوري لكن دايما اقول "الله الحافظ" ومابيصير شي لكن الناس تخليني اوسوس لين ينيت oO

وانا احاتي حد يشوف الصور ..اختفى الهارد يوم الثلاثا  ...سالت السكرتيره والشرطيه مالت القسم وسالت جميل اللي يشتغل بغرفة الطباعة وسالت الاولاد اللي كانوا معاي يطبعون وو سالت وسالت ...جنه ولدي ضايع مو هارد خخخخخخخخ المهم ...تعبت و الكل يواسيني ويقول لاتفقدين الامل (حسيتوا شلون كان الوضع) سويت فلم هندي..وبصراحة صج كنت بنقهر اذا اختفى لانه اول مره جاسه فايروووس ومسح كل شي في الهارد ومنها ذكريات الثانويه وصور سفراتي مع اهلي ومننها صور تركيا من جذي ما كلمت تقرير تركيا :\

المهم ..و زميلي اقترح اني اسوي اعلان ..قلت بصبر لين اتاكد ..فيوم الاحد سويت اعلان وقالولي اسال مكتب الشرطة اكيد بحصله المهم علقت الاعلان ...ورحت اسال عند الشرطة وحصلته ^^ والله لو تشوفون شكلي لما الشرطي طلع الهارد من الدرج مديت ايدي وشوي بحضن الهارد ..جان يقولي الشرطي شوي شوي لحظة مو جذي يصير الموضوع (خخخ انا كنت بشل الهارد واروح) طلع لازم اوقع على ورقة استلام امانة وجذي ..يالله طلعت من هناك وشليت الاعلان وماتم حد مازفيت له الخبر السعيد خخخخخخخخخخخ

المهم موو هذا موضوعنا >>> لا يا شيخة هاي كلها مقدمة !!خخخ

عن شو كنا نرمس هيه المهم الحين عندي الهارد وقررت اني احط البوست ...المفروض احط 3 بروجكتات لكن في بروجكت ما حصلت صوره فبحطه في بوست منفصل ان شالله ^^

بسم الله نبدأ أول مشروع 

كان عبارة عن شغل جماعي ..تذكرون يوم تحرطمت على القروب ومأسااااتي معاه والدراما هذيك كلها 

كانت في هذا المشروع ..>>لا تخافون ماراح اعيد االموضوع

وماراح اتحرطم :\

المشروع عبارة عن انه نصمم مكان مثل استراحة اونه حق الطلاب في الجامعة مكان حق القعدةو جذي ..

كان الشغل اغلبه جماعي ..احم 

اسم المشروع هو Gazeboo 

اسم غريب صح ..مو انجليزي لكن يعني استراحة او مكان للقعدة في الحديقة 

وهذي المعلومات اللي جمعتها ..احب يوم اكتب هالكثر احس اني مشتغله 

وكان موقع المشروع المفترض هو مكان بالجامعة ..مساحة مابين المباني وهذي صورته ..

كنا متفقين انه نصور الموقع في اوقات مختلفة من اليوم عشان نعرف مكان الظل وافضل مكان 

نحط فيه الاستراحة ..

وهني كانت الدراسة عن الموقع ..كل شي يخص الموقع مكان الظل ..درجة الحرارة وما الى ذلك 

بدرينا نرسم سككيتشات ..ونرسم مخطط للمكان مع القياسات ..اول اسبوع كان كله قياسات وجي

وبعدها تكون عندنا فكرة نستوحي منها التصميم ..وبصراحة اقولكم من بداية التصميم وكل الافكار قوبلت بالرفض 

بسبة القروب الين غسلت ايدي منهم ..وقررت اسوي اللي يبونه وما ااعور راسي 

هذا كان الرسم الاولي للتصميم ..كل قروب رسم تصميمه على ا لسبورة 

 وكلنا نتناقش ونكتب الاشيا اللي لازم نركز عليها اكثر والاشيا اللي لازم نعيد النظر فيها ..

وبعدها ..وبدينا نعيد رسم التصميم ..ونطوره أكثر...,وهذي الرسمة بعد التطوير

بعد ما انتهينا من تصميم الموقع ..ووافقت عليه المس ..بدينا الشغل الفردي اللي هو كل شخص يصمم الاستراحة الخاصة فيه

اول شي المس عطتنا تمرين عشان نقدر نطلع بتصميم ..اهي طريقة للالهام ..فقاالت ايبوا اي شي في بيوتكم وتحسون انه فيه شي معين يعجبهم ...وخذوا الاشيا المكونة منه وطلعوا تصاميم ..يعني نستلهم من القطعة هذي سواء من نوعية المادة المصنوعة منه  الزخارف اللي عليه او شكل معين ..المهم انا خذت لي كم شغلة منهم بس اخر شي اخترت غرشة عطر وبديت ارسم كم ديزاين منه وهذي هي الديزاينات والسكتشات..

هذا فأول كلاس قالت طلعوا اي شي من شنطتكم وطلعوا منه افكار ..وهذي السكتشات ..انا طلعت نظاره

 هذيلا كنت راسمتنه من راسي

 وهذي السكتشات اللي استلهمتها من غرشة العطر

 هذيلا كانوا التوب ...حبيتهم اكثر شي .

المس طالعت الديزاينات وعطت تعليقات عليها ...وحبت سكيتشاتي ..وقالت اختاري واحد منهم وطوريه وغيري فيه ...

هذا شكله قبل التطوير 

وهذا بعد التطوير :)

المهم بجذي صار عندنا تصميم لموقع وتصميم للأستراحة ..ما بقى غير التطبيق ....

المهم بدينا الشغل ...ووصلنا لمرحلة التنفيذ يعني ...ويوم نسوي المودل ..اختلفنا على انواع ا لخامات اللي نستخدمها في المشروع ..هني طقت جبدي ...قلت لهم انا ما يخصني في المودل سوو اللي يريحكم أنا راح استلم الرسم والتلوين ...و اتفقنا على هالشي هههه

نص القروب يشتغل على المودل والنص الثاني وانا منهم حق الرسم والتلوين ..

وجذي بدينا نرسم ...وهذي صورة الوضع وانا ارسم في الجامعة ربيعتي والله اايياام خخخخ الحشرة هذي كلها ..وطبعا حتى التلوين ماخلونا بحالنا كل شوي خلصتوا خلصتوا خلصتوا !! >.>جني قلت ما بتحرطم ...

 المهم ..هذا الجهاز استخدموه عشان يسوون الشجر ..وناسه الجهاز ...يذوب الفووم ..البولسترين

هم  سووا المودل ...وهذي اهي النتيجة ...تتددداااااااا ^^

وهذي الرسمة بالتلوين ..كان شغل جماعي وانا مع اللي لونوا ..وكان اي احد من القروب فاضي يي يلون جزء

ها فيما يخص مودل الموقع ...أما تصميم الاستراحة طبعا كل واحد شغله بروحه ...المودل كان اخر همي لان حجمه بحجم نص الكف ..فبديت ارسم المقطع الجانبي(secion) والمقطع الافقي اللي هو المخطط (plan)...والمنظور (perspective ) وأذكر اني اشتغلت من الخاطر كنت أقول "أنا براويهم منو اللي ماشتغل "...لانهم رمسوا عني واشكره دخلت الكلاس وسمعت بأذوني يقولون إني ما أشتغل ...فقلت أنا راح أراويهم منو اللي ما يشتغل ...وحطيت كل طاقتي بالعمل الفردي ...عشان في حال نقصت في الشغل الجماعي اعوض ...

أول شي المخطط أول رسمة فوق ..ماخذت مني وايد لأن مافي وايد تفاصيل ...وثاني شي اهو المقطع الجانبي ..واخر شي الواجهة ...حبيت تلويني بالرصاص خخخخ

وبعدين سويت المودل وكاان هذا سويعات قبل التسليم ..لان الرسمات اللي فوق خذت وقت عشان احقق الجودة اللي ابيها هع 

وهذا المودل...مثل ما قلت لكم ..صغنون ...حتى بصعوبة ضبته ..معظم المجسمات كان مو مسوايه عدل حتى مجسمي لان المقياس اللي طالبينه صغير..في الكلاسات الباقية الاساتذة طلبوا منهم مجسمين واحد صغير عشان ينحط في مجسم الموقع والثاني كبير عشان يشوفون التفاصيل اما مستنا فقالت ماله داعي سوو واحد صغير وبس ^^

وبعدها صورته وو بديت اشفه ...اسهل طريقة واسرعها ..ونتايج لا بأس بها خخخخخ 

وهذي النتيجة ^^

وهذي دزاينات القروب...شحليلهم صغنونين 

وكالعادة ..في كل يوم تسليم ..يصير اعصار في القسم ...وتشوفون العجايب ...ولا تستغربون من الملابس لان طلاب السكن (الاولاد) اغلبهم في ليلة التسليم يباتون فالقسم ...واحلى شي يوم اسير اسلم اشوف ويوههم المصفعة خخخخ..وكل واحد لبسه من امس ...وثلاجة المشروبات مفضية مافيها شي ..تغذوا عليها طول الليل..طبعا انا حالي من حالهم يعني ويهي يكون مصفع ومو راقده لكن بعد اهون منهم خخخخخخخخخخخخخ وجذي 

_____________________________________________________

ااااااااااااااااااااااااااااااه تعبت ...كنت حاطه صور المشروع الثاني لكن تعبت واايد على التدوينة

واحس صارت وايد طويلة فبكمل في تدوينة ثانيه 

بالأقساط الموضوع ههههه

وجذي ..ادري تحرطمت وااايد بس شسوي اطلع حرتي :\

وان شالله حبيتوه 

ودمتم سااااالمينن ن ن ن ن ن ن ن ن ن علق الكيبورد هع 

.,،؛×~أم حروبي والتصميم الأساسي-الجزء الأخير

السلام عليكم ورحمة الله وبركاته

كيف حالكم يا جماعة الخير ...عساكم طيبين ومريحين البال ^^

همممم جايسني ملل فظيع ...وبطالة وكل شيء 

أحس وايد أشيا ودي أسويها بس 

مالي خلق جذي كسلااانه ><

يعني أقعد بالساعات على اللابتوب ما أسوي شي 

الين يا على بالي أحط لكم هالتدوينة 

المفرووووض تنحطط من زماااااااااااااااااااااااااااااااااااااااان 

يعني عليها غبرة ...

وهي عبارة عن المشروع النهائي لكورس التصميم الأساسي 

...

المهم ...ما بطول عليكم نبدا بسم الله 

كان المطلوب منا في المشروع 

إنه نختار واحد من المشاريع الثلاث اللي اشتغلنا عليها في الكورس 

ونبدا لنطورها لمبنى 

هني المشاريع 

وكانوا محددين لنا كل مشروع وشو نوع المبنى اللي نطبقه عليه 

المشروع الأول>>>يتحول إلى متحف فنون 

المشروع الثاني>>>مكتبة 

المشروع الثالث>>>رياض أطفال 

وأنا الكل نصحني إني أشتغل على أول مشروع لأنه كان أحلى مشروع 

وبجذي اخترته واللي هو هذا 

المهم ...التحدي في المشروع هو إنه لازم نحافظ قد ما نقدر على التصميم اللي سويناه قبل 

لأننا انتقلنا من الشغل التجريدي إلى الواقع 

المهم ..هني بديت أول نموذج لي ..وبصراحة كان خربوطة لأني ماعرفت بالضبط شو يبون منا 

وثاني شي هذا أول مشروع فعلي لنا ..يعني مبنى صجي مو تجريد فكان الموضوع شوي يباله 

هذا الشي اللي كان فبالي ...

بس المس قالت إنه ما يخصه بالتصميم الأولي ...لازم 70 بالمية من الشغل يشبه التصميم الأول ...

"يعني عيدي الشغل من أول ويديد يا حلوه "...

أسررت في نفسي خخخخ ...

المهم ردينا و سوينا شي من أول ويديد ...وهذا اللي طلع معاي ...بصراحة حبيته ..حسيته مرتب 

وتعبت على البيبان والدرايش ...

راويتهها ...والظاهر إني للحين مو ملقطه الموضوع ...لأنها قالت ما يشبهه للحين ..رديت البيت ..معصبة ><

وأفكر وأفكر وأفكر وأفكر ..لين مليت ...قمت العب ....بنيت بيت صيني خخخخ شوفوا شحلاته ...أستانست عليه وقعدت أصوره 

مخي ضرب حزتها ..

.المهم ...بصراحة قلت مافيني أسوي كل شي من أول ويديد ...يعني تعبت في القص ليش أعيده وأخسر مواد زياده ..خلي أشتغل عليه ,,,كالعادة معذبة النموذج ...فرديت صفيتهم وسويت فوقهم ..وبعد عدة إضافات وتخبيصات وشيل وحط هذا للي طلع معاي 

وطبعا  مع شغل النموذج ما ننسى الرسم بعد ...لازم نرسم مخططات للمبنى ...

هذا سكتش بس عشان أعرف توزيع الأماكن ..

 وهذا بعد التطبيق بالقياسات ..هو بالبداية كان اممممم ماعرف شو يقولوله بالعربي ممكن شكل المسار يعني 

كان مايل ..بس بعد مليون مخخطط ومليون تعديل ...

اضطريت إني أخلي المسار بخط مستقيم ..وكان جذي ..كبروا الصورة عشان توضح

وبعد ما استقريت على كل شي تقريبا (يعني مو تماما ...لازم تطلع علل وقت التنفيذ )

هني وأنا اشتغل على البروجكت وكان الوضع جدا مأساوي ...

اذكر يوم الخميس بديت شغل ويوم الأحد يفترض يكون التسليم ..

وأنا يوم الخميس اكتشفت علل قد شعر راسي ..ماقدرت أصلحهم إلا يوم الجمعة ...يعني شغلي الصجي بدا يوم الجمعة تحديدا الساعة ست المغرب ...يععني كان جدامي يوم ونص أخلص ثلاث رسمات على ورق A2 و بوستر ومجسم بمساحة 

35×70

فتخيلوا الوضع ...بديت بالرسم ...ماقدرت أبدا بالمجسم إلا لمن أخلص المخطط العرضي للمبنى لأنه بدونه ماراح اضبط المجسم 

ويوم الجمعة كله راح على المخطط...

ومارقدت إلا يمكن ساعتين ثلاث ..

ويوم السبت انعزلت عن العالم ...شغل 24 ساعة متواصلة بإستثاء ساعاات الصلاة ودقايق حق الأكل ...

وتميت مواصلة ليوم التسليم يعني من يوم السبت لين 7 الصبح وأنا اشتغل ..

يحليله أبوي تم معاي ...وأنا اشتغل ورقد بالغرفة اللي أشتغل فيها كلما ينش يقولي روحي نامي أقوله بعد شوي 

وصار الصبح ومانمت ...والرسمة الأخيرة سويتها ع السريع في حوالي 3 ساعات 

شاربة يمكن غرشة بيبسي عائلي كاملة قلاص(كوب) ورا قلاص ..مع كرك (جاي حليب)

مع ريحة الصمغ يعني

 دماااااااار 

..انتهيت ><

الساعه سبع الصبح يلست الصق البوستر أي كلام المهم أخلص ...وأختي برى في الحوي (الحوش أو الفناء)

تصور المجسم ...وأبوي من صوب يدخل باجي الأغراض في السيارة ..ويقوللولي روحي تلبسي عشان تسيرين

وخليت اختي تسوق لأني كنت بحالة هستيرية خفت أسوق وأدعم الخلق من التوتر لأن التسليم الساعة تسع وأي تأخير يصير معاه خسف في الدرجات ....

وهذي صور المجسم 

من فوق 

على جنب 

ممن جدام 

المصيبة ما اكتشتفها إلا بعدييييين بعد التسليم وكل شي شفت الصور ...اكتشفت هالجزء من الصورة إلامامية طاير ..لاحظتووه!!

هذا هو المخطط اللي خذا مني يوم الجمعة بكبره وأنا أصلح فيه 

 هذا المقطع الجانبي للمتحف ...شغل ثلاث ساعات تقريبا ...

 وهذي ما خذت مني وايد يمكن ساعة ...

وهذا هو البوستر ..مثل ماقلت تلزيق أي كلام ...بس الكل مدح السكتشنج ...

وأخييييييييييييرا ..هذي غرفة المشاريع للكلاسات ..هذي وحدة وفي غرفة ثانية بعد ...وبجذي خلصت المعاناة 

صدعت رااااسكم صح خخخخ

أدري أدري في وايد أخطاء إملائية ..بعدين بصلحهم ...بروح أرقد بسني سهر ><

وأشوفكم على خير في مشاريع ثانية ..لمن أتفيج إن شالله هع ^^