السلام عليكم ورحمة الله وبركاااته
شخباااااااااركوووم يا جماعة الخير ..أنا بخير للي يسأل (6_6")
تحذير!>>هذه التدوينة تحمل الكثير من التحرطم وكلام غير خاضع للرقابة ..فإذا كنت محب للمغامرة ..أقولك استمتع ..وإذا ناوي تخبر الرقابة عني ..أقول قلعتك واااه قصيت عليك ماشي رقابة خخخخ
..اسمحولي برمس وايد اليوم ..حابه جذي أسولف بزيادة في حد عنده مانع ..>>لا لا محد يمانع مدونتج وكيفج :)
نقول باسم الله
\
\
***
ياناس ياعالم ..يبطون جبدي هذول اليابانيين ..اأاااه شلون يسوون شعورهم ..ذاك اليوم وأنا أتمشى بالسوق الصيني اليديد اللي بعيمان..إلا وأشوف وحده منهم قاصه قصتها(قذلتها) بزاوية 45 ْ ..والمصيبة شكله حلو ..مرتب ..أبد ما تحسون إنها قاصتنه غلط ...لمااااااااااذا ؟؟
وأنا اللي لي قصيته بخط مستقيم مع الأخذ بالإعتبار ترك 5 سم تحت العين تحسبا للإنكماش والتقلص بعد جفاف الشعر ..إلا وتلاقي القصة
طايرة فوق ولا تضربلك سلام بعد !!
***
في أحد الأيام ..كانت أم حروبي <<يعني أنا
في حوالي الساعة 11 ليلا ..يالسة أحل واجبي على اللاب بتاعي والكل رقود ...وعطشت وخذت لي سفن أب من الثلاااجة ..أنا قاعدة على اللاب أقصد اللاب على ريولي خخخ شلون أقعد عاللاب شلون أشتغل عيل ..المهم مشوا ^.*
وشغلت الطابعة عشان أطبع ورقة ..وكنت حاطة القلاص حذال الطابعة ..ويمب الطابعة كان لابتوب أخوي المصدّي ..المهم وقفت أنطر الورقة تطلع ..وأنا يالسة أصب السفن أب في القلاص ..فجأة يطلع صوت من الطابعة (تعرفون صوت الطابعة المزعج جنه سيارة تنشحف)..وأنا من أسمع الصوت أفز وإيدي تعطي ردة فعل عكسية وترتد فيطير السفن أب من العلبة وتطيح قطرتين على لاب أخوي المصدي ..بس قطرتين ونص (حاسبتها)..على طول أمسحه ..وأتلفت يمنة ويسرة <<في حد شاف الجريمة خخخ
ماشي كملت شغلي ولا كنه شي صار مأملة إن ماصاب لابتوبه شي ..ثاني يوم ييلي أخوي يبي يتسلف لابتوبي
وأنا أسأل ببراءة :ليش شفيه لابتوبك (6,6")؟؟
اخوي :مادري بلاه الشاشه تطلع سوده
وصرت طيبه ذاك اليوم وعطيته لابتوبي <<الله عالطيبة ..قولي تعذيب الضمير خخخ
المهم بعدها أرمس روحي "أم حروبي تخبرينه ولا ما تخبرينه ..امممم لا تخبرينه تعرفين بعدين بيمسكها عليج ..وكل شويتين يبي لابتوبج ..تعرفين بعد هذول الأولاد متوحشين بيسوي فلابتوبج مثل ما عذب لابتوبه وطلع مصارينه ..امممم .."
طبعا هاكله مانفع ..لازم أعترف ..جذي أبري ذمتي ..وبعد كم يوم خبرته ..وصار اللي خفت منه ..
أخوي:أبي اللابتوب (بأسلوب أمر )
أنا أعطيه ..وأنا مستحيل أخليه يمسكها علي طول العمر ..اوكي بحس بالذنب يوم ولا يومين مو العمر كله !!..وجذي لما خلص مفعول تعذيب الضمير معني ماحسيت فيه وايد كون إني أعتبر نفسي أسديت خدمة حق لابتوبه المسكين وطبقت عليه مبدأ القتل الرحيم ..لأنه كسر خاطري مع شاشته المفصوله عن الكيبورد ..
*العبرة من القصة : لا تشربون حذال اللابتوب...ولا تخلون حد يستغل ضميركم الحي ...لازم الإحساس بالذنب يكون له تاريخ إنتهاء ^^
***
شكلي بعد خمس سنوات بدمن على الضمغ (طالعوا يمين يسار ..في مراقبة خخخ)..أخاف يوم من الأيام يزخوني وأنا أشتري 6 حبات صمغ من الحجم الكبير ويزخوني
يستجوبني الشرطي .. :من وين لج هالصمغ...وحق شو ..جاوبي(آخر كلمة بصوت عالي وصوب الإذن مع شوية تفال ولعاب متطاير ..<<ييععع )
..وأنا أقول وأنا تقلصت مثل السيدة ملعقة :حق مشروعي ..والله حق مشروعي ..
يقولي الشرطي:مشروعج شو ..كيف تدمن صمغ مثلا !!..
يبه كيفك لا تصدق ..أكيد مايصدقون ..دام عندي سوابق بريئة وهي إني أحب ريحة ضبغ الأظافر وزيت المكاين والبترول ..فمحد يستبعد الصمغ..ذاك اليوم يالسة الساعة 3 الفير أشتغل على مشروعي ..من كثر ما أستخدم الصمغ يازتلي ريحته ..قمت أخاف على روحي ..صدق لي قالوا العلم سلاح ذوحدين ..
***
تذكرون مشروع الملمس اللي راويتكم إياه قبل ..ذاك اليوم شفنا مشروع وحده فارينه بالكلاس ..المس حطتلها سي ..والبنت عصبت وعبرت عن اللي بقلبها خخخ
***
...في شي ينرفزني ..
لاحظته يتكرر في مدونات أعزائي المدونين<<مايخص المدونين ..أشير إلى رواد المدونة
الموضوع أو التدوينة مثلا تتكلم عن مستحضر ما ..أو كتاب ما ..أو أي موضوع
المهم في اللي يعلقون ويعقبون على التدوينة ..تقرا التعليقات وتبتسم ..وتشوف أراء الغير فجأة يطلع لك تعليق أبدا ما يخصه بالموضوع
"حدث هكذا وهكذا ..في المكان الفلاني..وفلان يتحدث ويقول ..." لمزيد من التفاصيل ومواصلة الحوار يرجى زيارة الرابط ..
وبس..
يعني بخصوص مو خروجك عن موضوع التدوينة لأنك أصلا ماقريت التدوينة ..ولكن بخصوص دخولك عرض وكتابة شي أبد ما يتعلق بالمدونة ..
تعتبر نفسك طفيلي مثلا ..!!
الشي اللي يقهرني مو هذا ..يعني أخوي\أختي العزييز\ة (ياللي تدخلون عرض)..موضوعكم وحواركم وخبركم هذا على العين والراس ..ولكن إذا تبوني أدخل على موقعكم وأقرا الموضوع اللي أنتوا حاطينه ومسوين عليه زوبعة ..بيكون شي حلو إن تقرا التدوينة اللي حاطتنها وتعقب عليها لو بكلمتين ..إحتراما لمدونتي يعني...عشان أحس إنك تهتم برايي وهذا سبب أخر يدفعني إني أزور الرابط ..شخص عطاني من وقته وقرا موضوعي ما ببخل عليه بوقتي عشان أقرا موضوعك ..حلو الذوق يعني !!
***
يابوي مالنا غير نقول على الدنيا الدمااااااااااااااار خخخخخخخخخخ
ليش أقول جذي !!
اليهال ..الأطفال ..رمز الحب اللامشروط ..والبراءة ..يساومون عالحب !!
لا حول ولا قوة إلا بالله
الخبر >>
تقول الضحية أم حروبي :أن الجانية إبنة أخيها ذات ال3 سنوات ونصف ..اقتحمت غرفتها يوما ..وجعلت تتدلع ببراءة ..وتنظر بخبث طفولي ..وتبتسم ابتسامة ملؤها اللواتة *..
وتقول بصوت طفولي :عمو إذا عطتييني كريم بحبج<<مع التشديد على حرف الجيم
طبعا لبرائتي (^^")..وحسن نيتي ..وزيدوا عليه فيوزاتي الضاربة نتيجة استنشاق الصمغ بسبب المشروع ..فأعتقدت أني أهلوس !!
فتحت عيني على وسعهما ..فركتهم عدل <<يمكن أحلم
عدت كلامها :إذا عطيتج كريم بتحبيني ؟
أجابت بالإيجاب ..زادت عيناي اتساعا ..ولأتأكد لمرة أخيرة
أسألها :وإذا ما عطيتج ما بتحبيني
تجيب بسرعة وثقة وابتسامة :لا
ياللهول !!...ماذا حدث في الدنيا ...
أكيد تسألوني عطيتها ولا لا ..اممم في حد يقدر يرد اليهال ...حتى لو إنهم لوتيين بس يبقون يهال ..عطيتها الكريم ..
للعلم..بنت أخوي تموت في شي اسمه مرطبات وكريمات ..من تشوف كريم تحطه على إيدها وتفرك ويهها ..وما تيي حجرتي إلا عشان تلعب بالكريمات وتعرف مكان كل كريم بالبيت ..وتستخدم أي شي ..لدرجة ذاك اليوم ..كنت بالغرفة أطالع المراية (مرآتي مرآتي ..من أجمل أم حروبي فالكون!!)..فجآة ألمحها تحط على إيدها شي ..ألف إلا حاطه (زيت الحية للشعر )..ويالسة تفرك إيدها ..
أقولها أمسحيه هذا مو حق الإيد ..بسرعة !!
أقولها أمسحيه هذا مو حق الإيد ..بسرعة !!
*نظرة اللواتة :كلمة بالعامية تعني المصلحة ..تشبه نظرة الفتاة في هذه الصورة
مشكلة (-.-")
***
