.,؛×~أم حروبي والتصميم الأساسي-الجز الأول-1-قصة حزينة

 السلام عليكم ورحمة الله وبركاته جميعا ..كيف أصبحتم ..بخير والحمدلله ولا إله إلا الله والله أكبر ..<<منو جي كان يقول أيام المدرسة خخخخ

شحالكم شخباركم ..شو مسوين فدنياكم ..إن شالله كل خير :)

هممم اليوم بخبركم عن معاناتي في الأسبوعين اللي طافوا :( 

تذكرووون المجسم اللي تحرطمت عليه من كم يوم ..هي هذا المجسم التعيس ..قصتي معاه قصة جدا حزينة خخخخخخ 

الله يسلمكم ..ذاك اليوم قالت لنا المس إن لازم نسوي مجسم ..والمشروع عبارة عن مكعب مكون من ثمان طبقات ..كل طبقة سمكها 3 سم ..يعني مكعب 24×24×24 ..حلو الكلام ..

للحين الأمور طيبة ..لازم نقص الطبقات بحيث انه نطلع أجزا واللي نشوف من المجسم بعد ما نشيل هالأجزاء لازم يكون فراغ معرف كمية الأجزاء اللي نشيلها لازم تكون نص الأجزا الباقية يعني 50\50 ..مجمعين ..وهذا أخونا فراغ معرف حاب يلعب علي ويستهبل واستوى عندي مومعرف ..>>للحين فاهمين علي 

المهم ...أكيد مو ملقطين معاي ..أنا بعد خذيت دهر لين فهمته ..وتبون الصج للحين مو عارفة شو سالفته خخخ

وقالوا إنه يبالنا نيب نوعية فلين قوية عشان يكون الشكل النهائي أحسن ..يعني الفلين مو العادي اللي ناخذه من المكتبه هاللي نسويه منه ثلج ونلعب فيه ونفتته ..لازم نييب الفلين من المصنع ولازم يكون ضغطه عالي ..واللي ضغطه عالي (مسكين شكله ياكل وايد موالح خخ)..يكون مكثف وصلب يعني قص الفلين روحه تعذيب ..رحت المصنع وشريت المطلوب ..وخذت لي فلين عادي من المكتبة عشان اسوي تجاربي عليه واسوي النماذج ..

نكمل القصة مع الصور ..

المهم رديت البيت ذاك اليوم ويلست أرسم سكيتشات ..على حسب فهمي المتواضع على أستاذتنا الكريمة ..

وهاي بعض السكيتشات طبعا بعضهم قبل الشغل ..وبعضهم أثناء الشغل ..

بعد ها قمت أطبق السكيتشات ..أنا ماكنت فاهمة الموضوع عدل والصورة ماكانت واضحة لي..

اشتغلت على نموذجين ..الأول صغير والثاني كبير ..هذا الثاني ..

هذا شكله النهائي ..النموذج ..وكان واااايد بسيط وعلى قولة المس واايد مباشر ..قالت يعني 

لازم يكون شي دخلات وطلعات وخطوط افقية وعمودية يعني تبي تضيع قبل لا تحصل الشي ..لا تسألوني أنا كنت أقول هيه بسوي وماعرف شو السالفة تميت أسألها شلون وكيف وهي مو عارفة شلون توصل الفكرة تميت اطالع نماذج الباجين يمكن افهم بعد سطلت زيادة ..

وهذا نموذجي الصغير هم اثنين ..طبعا لو لا حظتوا مكسورين لأني على آخر لحظة كسرتهم من حرتي لأني ثاني نموذج سويته ووووووواااايد معقد ..جان تقولي المساعدة "شو هذا ؟؟"..وت از ذس وقتها كان باقي على التسليم اربع ايام ..وصج صج طفرت ولاعت جبدي ..أنا الوحيدة اللي في الكلاس اللي ماعندي نموذج اعتمده ..الكل عندهم نماذج بس يبالهم اضافات بسيطة اما انا ولاشي ..

 وهذا النموذج الكبير ..بقولكم شي وايد قهرني ..نحن اسبوعيا عندنا حصتين تصميم ..في اول اسبوع الحصة الاولى راحت حق شرح المشروع ..الحصة الثانية يلسنا نتدرب كيف نقص الفلين ..الاسبوع الثاني يبت النموذج ومثل ماقلت لكم شو قالت عنه المس ..بقى عندي الحصة الثانية ..اللي هي قبل التسليم بأربع أيام جذي راح منا أسبوع ونص ونحن ضايعين ..في الحصة الثانية من الأسبوع الثاني يت لنا المسساعدة (نحن عندنا غير الأساتذة شي مساعدين في حال الأساتذة ما كانوا موجودين هذول ممكن يساعدونا)..سرت عند المساعدة وقالت لي أشيا ..أنا بس أشوفها ومبلمة ..قالت أشيا واايد عن النموذج وشو لازم أسوي يعني الصورة قامت توضح عندي ..يحليلها تمت ساعة كاملة تشرح لي كيف الفراغ يكون معرف ..وقالت شو الأغلاط اللي بنموذجي ..المهم 

رديت البيت وطبقت اللي قالته ورحت عندها يوم الخميس وقالت لي إن اللي سويته صح وإني بديت أفهم الفكرة ...ورحت حق أستاذتي ..وراويتها شغلي قبل لا أبدا ..وقالت في اشيا ما عيبتها ..فتخيلوا رديت البيت وعدت كل شي من اول ويديد ..وكان يوم الجمعة وانا للحين مو عارفة شو أسوي ..وباقي يوم واحد على التسليم ..على اخر الليل يوم الجمعة رسيت على شي معين ويوم السبت بديت الشغل ..وهني بدت المأساة الثانية 

هذا المكعب قبل لا أبدا القص ..

وتميت أقصه من 10 ونص الصبح ..لين المغرب ..الأمور للحين كانت في السليم وأذكر صبعي جاسه شد يعوور ><..مافي شي صاير..

 الحين لازم الصق الطبقات فبعض لصقت الأول والثاني ....والسابع ..والثامن والأخير ..آخر شي 

آآآآآآآآآآآآآآآآآآآآآآآآآآآآآآآآآآآآآآآآآآه 

أم حروبي شو أستوى ..الطبقة الأخيرة لصقتها بالعكس ..والترتيب كله تغير 

حاولت اشيله لكن مايصير جان أخليه ..

ولصقت الأجزا الخارجية ..

وبديت التلوين ..بالاسود ..لونت قطعتين وبدا اللون يخلص ...

كانت الساعة وقتها عشر المسا مادري 11 ..تعبت ..وكنت أصارع ألم معدتي اللي صارله ثلاث أسابيع وأحسه ياكلني من داخلي ...

كل ما أقول بروح المستشفى اتوهق مع المشروع وأاأجل السالفة لبعدين ويوم عن يوم الألم يزيد ..رحت الطواري وخيسوني ساعتين ومادخلوني...أذكر من سبة ألم معدتي كنت أقص أول طبقة من كثر الألم دوخت وحسيت راسي يدور ..

المهم ..خلصت عني الألوان وهي ألوان خاصة حق  الفلين وماشي وقت اشتري الوان بعد ..جان اييب الوان مائية ..وبدأت المآساة 

لونت ومالقيت غير ان الماي يالس يذوب الفلين ..واحاول ما أضيف ماي ..

جان تقترح علي أختي "ليش ما ترشينه برش اسود"..كنت وقتها منتهية وتعبانة ومالي خلق ..ومن كثر التحطيم اللي أنا فيه سمعت كلامها وشريت الرش ..ورشيت ...ويااااااااااااااااااليتني ما رشيت اهئ اهئ ..صار ألعن عن قبل ..الفلين قام يتآكل ..أنا وقتها عيني دمعت ..

وشفت تعب اسبوعين كله يتأكل جدامي ..وقفت وحاولت ألون عشان يوقف التأكل ..وبعدين أخوي وخواتي يييو يلوونومعاي ويشدون من أزري ..لأني صج كنت وصلت حافة الانهيار ..

الون أسأل أخوي "مادري كم بتحطيلي على هذا ؟"

أخوي"A"

جان أضحك "إن شالله A"

بعدين ..أنا ألون بايد وحدة وماشوف الفلين من كثر ما كرهته 

أختي "شفيج شكلج يأستي "

أنا "طفرت والله خلاص أبي أفتك منه "..

أختي"تعوضينها إن شالله ..وهذيها القطع ماباقي غير واحد تلونينه ونخلص "

خلصت تلوين وخليتهم ينشفون ..

رحت رتبت أموري..كانت الساعة 12

رديت وشفت انهم نشفو ..دخلتهم في المكعب ..وشليتهم جان المكعب يتلون بأسود ..تميت أقول "لا لا لا ..لا مو على أخر شي "

والصبح القطع مو طايعة تتطلع..

وعلى الساعة وحدة ..ساعة قبل التسليم ..القطع مو طايعة تطلع ..لازم تطلع عشان المس تقيمه ..

حاولت ورحت للمساعدة وما ساعدتني ..

بغيت أصيح ..

شو اسوي ..أضطريت أطلب من واحد من الطلبة الأولاد إنه يطلعلي إياه ..مسكين تم يحاول وكل ما يحاول الفلين الأبيض يتلون بالأسود ..حاول بالمسطرة والكتر ..الين ما طلعوا ..ومسكين تم يتأسف لي لأنه وصخ الفلين الأبيض ..قلت "ماعليه بلونه المهم طلعوا مشكور"

ولونتهم بالأبيض وكان شكله مو حلو أبدا ..البنات اللي معاي قالوا مع إنه فكرتج حلوه وقصج نظيف ..بس الصبغ خرب كل شي ..

وقتها كنت فاره الفلين باخر الكلاس مابي أشوف شكله ..مارتحت لين سلمته وافتكيت من شيفته ..كنت أحاتي واايد ..

هذا هو ..آخر شي اكتشفت ان في مكان طالع مثل الصليب ..لاني لصقت الطبقة بالعكس 

هذي مشاريع كلاسنا ..

 من بين المشاريع ..كان هالمشروع ..واحد من كلاسنا ما يتكلم عربي يمكن صومالي مادري والله ..لكنه هو وربيعه دووم يسوون شي ثاني ما يخصه في المطلوب ..بس عيبتني كيف قصاه بهالشكل !!

هذا كان مشورعنا الأول..وايد سهل وبسيط ..عن أنواع المواد والملمس ..وكل ما يبنا شي غريب كل ما كان أحسن 

 وهذا مشروعنا الثاني ..اللي حصلت فيه ..A لما استلمت نتيجته نسيت كل التعب بخصوص المكعب..هذا المشروع على مدار أسبوع كامل وأنا ارسم واعيد ارسم واعيد سويت سكيتشات وايد وكل مره تقولي المس اغير فيه أشيا ..وعانيت في التلوين لين حسيت الرصاص داخل رئتيني ..اللي لازم نسويه انه نسوي أشكال هندسية متداخلة ونلون التداخل حسب الطبقات الأغمج والأفتح ..

 أما هذول ..مشروعنا الياي..لازم نسوي شي يشبهم ..ادعولي أضبطهم وأعوض ..

هذيلا مشاريع طلاب مال قبل ..اللي لازم نسويه ممر خطي ننوع فيه المساحات المفتوحة والمغلقة ويكون شي طبقات ويكون في مكان رئيسي ..والحين لازم اسوي سكتشات ولازم على يوم الأحد أكون مسويه 3 نماذج ..

 وبس..بعد ما خلصت المشروع نفس اليوم رحت العيادة ..وسويت تحاليل ..يقولون في جرثومة أول احتمال يكون شي التهاب ..وسويت تحاليل زيادة  وانطر النتايج ..إن شالله ما يكون شي جايد :(

وبس أدري طولت عليكم ..احسبوها فضفضة ...
وعذرا من الجميع ..أدري مقصرة بحقكم ..لكن للجامعة أحكام 

جمعة طيبة للجمييييييييع ~