هذه المدونة تخضع لقانون حماية الملكية الفكرية الذي ينص عليه القانون الإتحادي رقم 7 لدولة الإمارات
"لذلك يمنع نقل وتداول أي من محتويات هذه المدونة دون إذن من مالكها "
.?. هاجس اللحظة .?. هنا تجد الكثير مني

 

الجمعة، 14 ديسمبر، 2012

.,،×~أم حروبي والتصميم المرحلة الأولى _2




مرحباااا يا جماعة الخير 
جيفكم ,,وأخباركم ^^
اممممم ما بقرق وايد على راسكم بالمقدمة 
هالتدوينة رتبت صورها وخليتها مسودة صارلها دهر 
,,كل مرة أأجلها :\
المهم ..فقلت لازم احط شي عن العمارة لان من زمان كان اخر بوست 
اللي هو كان بوست شغل القروب والتحرطم الزايد ههههه 
هالبروجكت كان ثاني بروجكت عقب هاك والحمدلله كان شغل فردي -ـ-"
ولما عرفت انه فردي ..قلت بيني وبين نفسي 
"أنا بوريهم من هي اللي ما تشتغل"
كان البروجكت بمثابة تحدي إني أثبت لهم "قروب البروجكت الأول"
انهم ظلموني وقالوا عني اللي مو فيني !

المهم ..
المشروع كان عبارة عن تصميم 
Courtyard House
وهو تصميم فيلا بطريقة بيوت أول كيف إن "الحوي\الحوش" اللي هو courtyard 
يكون بنص البيت أو قلبه ,,,يعني كل غرف الفيلا تكون محاوطة الحوي
كان موقع المشروع أرض خالية صوب سكن دكاترة الجامعة هاي صورة المكان ..
رحناه وقمنا نقايس حدود الموقع عشان نبدا 


بداية ..علينا ندرس موقع المشروع ..اتجاه الشمس وأكثر جهة تستقبل الرياح 
والرطوبة ونوع الأشجار وما إلى ذلك ..
ثاني خطوة كانت ندور أمثلة لهالنوع من البيوت ..وندرسها 
ورحنا زيارة "لبيت النابودة" بالشارجة كمثال لان هالنوع من البيوت كان شايع 
زمان أول ..
وهاي الصورة لما كنت أجهز البورد عشان أقدم المثال اللي حصلته 

وثالث خطوة نبدأ بفكرة التصميم والتطبيق..
كانت من شروط المشروع انه ما نزيل اي شجرة من الموقع ..عشان نحافظ على البيئة 
وفي اسوا الحالات نقدر نزيح الشجر ونغير مكانه
كان الشي اللي استوحيت منه فكرة مشروع هو 
الصدف الحلزوني ..

كانت هذي أول مرة نطلع فكرة ونطبقها ...فسويت دزايني الأولي على شكل حلزون بالضبط 
من هاي الصورة 

لكن المس قالت لي إن لما نستلهم من شي ما نسوي المبنى على شكله بالضبط لكن 
ناخذ خصايص ونطورها ..
مثلا أن اخترت الصدف الحلزوني ..مميزاته 
-الاستدارة 
-ملمس الصدف الناعم
-الخطوط الذهبية 

وجي ..وتختارين احد هالميزات او اكثر وترسمين افكار عليها ...
فبعد عالكلام بديت اطور دزايني 
وهاي ثاني محاولة ..وكان يحتاج تطوير أكثر 

وقعدت اطوره الين المس قالت يكفي ..
وبدينا تضبيط البلانات 
والحين وقت التسليم..
أنا المدمغة كان عبالي النموذج لما نسويه 
نسويه بتقسيمات الغرف والتصميم الداخلي
وكان قياس النموذج المطلوب صغير وايد..
فطلعت عيني وأنا اقصقص فالبورد واسوي الدرايش 
والدرج والطلعات والنزلات ..
وهاي صورة الفيلا من داخل 
ومن جهة ثانية 

وهذا بعد ما خلصته ..
حبيته وااايد ^^
خصوصا شكل السقف كان غريب وعجبني 
فرحت عند المس وكان ها يوم قبل التسليم كنت مخلصة الرسمات كلها بس باقي النموذج 
فراويت المس ..وصدمتني صدمة حياتي لما شافته ..
قلتلها عيوني راحت فيها وانا اسوي التقسيم الداخلي 
جان تقولي منو قالج انه نبي التقسيم الداخلي ..النموذج بس عشان ترواينا شكله الخارجي 
انا عاد هني كنت على شفا حفرة من الانهيار T_T
ولما شافتني المس كيف ملامحي تغيرت ..قالت بس على فكرة ترى التقسيم محلي النموذج
بس علقت على السقف وقالت لي انه مو عملي  خصوصا حق فيلا ..
ممكن يتطبق على مبنى ثاني بس بعد يحتاج اشيا كثيرة ..
فغيرته بالرغم اني كنت حابته ..وسويته بهالطريقة 
زووووم على التقسيم من داخل 

لقطات للنموذج قبل التسليم 

المنظر من فوق يعطي احساس خفيف بالصدف الحلزوني ..
وهاي رسم ثري دي للنموذج 
الالوان وايد فاتحة فمايبين ..كبروا الصورة عشان توضح 
هاي البلانات والرسم المقطعي الجانبي 
وها بورد الفكرة والايحاء ..شغل اخر لحظة ههههه 
واخيرا كان البريسنتيشن ..
^^

وبس بجذي اكون خلصت البروجكت ..
واحلى شي يوم استلمنا الدرجات وانا الوحيده اللي يبت بي بلاس والبقية بي واقل 
كان شعور لا يوصف وانا اشوف اشكال العذال وهي مصدومة ومقهورة من الدرجات ^^
وانا كنت فداخلي ارقص 
>>جي<<

هههههههههههههههههههههه 

وبس 
دمتم سالمين ^^

الأحد، 9 ديسمبر، 2012

.,~×فضفضة لا أكثر

 متعبة أنا
 ..متعبة حد البرود
وأشعر بالذبول يتخلل خلاياي ..وأحس بها تحتضر
في داخلي أحاديث كثيرة مكبوتة
مزيج من عتب و حاجة وبعضٌ من غضب !!
أحتاج أشياء كثيرة,,أفتقد أشياء كثيرة ..
أولها "أنا"
عاتبة أنا على أمور لا تحصى ..
و أشخاص بقدر ما تمسكت بهم خذلوني !!
محتاجة لقلوب بآذان صاغية وأحضان حانية !
وغاضبة أنا من هدوئي وتجاهلي اللامحدود !
وغاضبة من منع نفسي من الغضب ..
حتى بدأت آتآكل من نيران الغضب فيِّ دون أن أدري !

فمن ذا الذي يتفهم !!

في داخلي هواجيس حيرى ,,تجاوزات حمقى..
وكثير من أفكار خرساء و بعض من مشاعر عمياء ,,

فمن ذا الذي يتفهم !!

بت أنفر من الكتابة,,
أشعر بأني خالية من الحب ..فكيف أسطر شعرا !
وأشعر بأني لا أعرف حزني ..فكيف لي أن أصفه !
وأشعر بأني رحلت مني ,,فكيف تكتب من هي ليست بموجودة ؟

فمن ذا الذي يتفهم !!

أمضي وروتين أيامي يميتني ,,
حياتي غدت سماء صافية بشمس حارقة !
سماء لا تزينها نجوم..ولا تتخللها غيوم ..
سماء عقيم,,لا يعكر صفوها حتى سرب حمام!

***

أشعر بأني بعيدة مهما زدت قربا 
وِأشعر بأصواتهم على بعد أميال وهم بجانبي !

ملامحي باهتة ..ضحكاتي زائفة..وذكرياتي ذابلة 
 وإن قلت بأني فقدت اهتمامي بكل ما أحب 

فمن ذا الذي يتفهم !!

لا أعلم كيف أمشي بخفة..وأنا مثقلة بكل شيء!!
لست حزينة ..أعلم هذا
ولست بمجروحة ..بالتأكيد 
ولكن ما أعرفه جيدا ..هو أني ذابلة

***

لم أعد قادرة أن أميز ردود أفعالي 
أضحك معهم بالرغم من انزعاجي منهم !
ابتسم حين يخذلوني !

أفتقد عنادي ,,سخافتي ..كبريائي !
أفتقد عصبيتي الغبية ..
وروحي الفتية ..

ولكن ..من ذا الذي  يتفهم !!