هذه المدونة تخضع لقانون حماية الملكية الفكرية الذي ينص عليه القانون الإتحادي رقم 7 لدولة الإمارات
"لذلك يمنع نقل وتداول أي من محتويات هذه المدونة دون إذن من مالكها "
.?. هاجس اللحظة .?. هنا تجد الكثير مني

 

السبت، 23 يوليو، 2011

.,،؛×~عودة للحياة:)

السلاااااااااااااااااااااااااااااااااااااااام عليكم ورحمة الله وبركاااااااااااته 
جيف حالكم ...شووو أخبااااااااااااااااااااااكوووم ..علومكم ..
حلوين طيبين ..مثل ما أحبكم ....
وأخيييييييييييييييييييييييييرا ..انتهى الكابووووس 
للي سأل عن امتحاني الثاني في هذيج المادة فالنتيجة أحسن عن الأولى ولكن ماترضي غروري 
أحس في شي مو طبيعي في توزيع الدرجات بشهادة الجميع ...من ناحية ثانيه 
بعد صدمة هذاك الإمتحان يت الصدمة الثانيه اللي كأبتني ألا وهي إن المادتين اللي خذتهم بالصيفي هي وحدة في الفيزياء 
والثانية في الرياضيات يعني المادتين فيهم معادلات ومسااائل ...وأنا ما دري شو للي ضربني على راسي 
وخلاني اخذهم بالصيفي مع بعض ..كنت أحسب نفسي "سوبربنت" وأقدر عليهم...مالقيتني غير أكره شي اسمه صيفي ><
وأخيرا من سالفة الرسوب "I'm still recovering"
للحين فيني حرة ...بس الحمدلله رغم كل شي ...في انتظار نتايج الإمتحانات النهائية 

بعد هالمقدمة الكئيبة ...اليوم يايتلكم بشوية أخبار وأحداث عشتها بالفترة الأخيرة ...أحداث حلوه :)
هم ثلاث أحداث ....نبدا بسم الله ...
أول حدث هو "حق الليلة "...طبعا تقولوله قرقيعان 
وخبرتكم ان نحن عندنا بنص شعبان ...
يلسنا أنا وخواتي وخواني نسوي توزيعات :)
خخخخ نصهم لحفلة أختي اللي كانت لتخرجها من الجامعة :)


أثناء العمل ...بعترف إني ما سويت شي خخخخ بس كنت شاردة من المذاكرة وأشوفهم يسوون
هذا بسكوت المووووز أختي تحبه بس الحين طعمه تغير موشرات قبل 

شكلهم الحلويات يغري وهم جذي خخخخ 

 التوزيعاااااات ...من يبي ..خخخخ خلصوا راحت عليكم هع 


وهذي سلة توزيعات أختي لدوامها ...بعد ما خلصت كل واحد منا يصور على أساس هو مسونه هههه <<مقصة ^^"

هذي كانت بعض الصور عن الاستعداد حق هذي المناسبة ^^
ننتقل للحدث الثاني وللي هو يتبع له ...

--------------------------------

شاركت بفعالية حق الليلة مال هذي السنة كانوا مسوينها بمكانين سوق العرصة والمربى المائي ..بما إني السنة اللي طافت رحت سوق العرصة قلت هالمرة خل أسير المربى ..
هذي شرطة الشارجة مشاركة بالفعالية ... يسوون مسابقات ويسألون أسئلة عن شرطة الشارجة 
هني جانب من المسابقات 
لعبة منو يحافظ على بالونته للنهاية ..البنت للي لابسة أزرق فازت ^^...وحليها كانت شادة حيلها
كنت أصور اليهال ...بعدين اكتشفت انه في بنوته كانت تطالعني ....خخخ جكتني ..حبيتها كيوووت
"حق الليلة "...من شرطة الشارجة :)
صورة جماااعيه :)

 سبونج بوب ...لحد يسألني هذا شيابه ...ما أدانيه ><....رزة بكل مكان <<شكله وايد يقهر 


مهرجييين ....ترى ما يخصه بالتراث هههههه بس جي 
 ورشة الرسم والتلوووين ...
 ورشة الأشغال اليدوية 
 عبووود زخووووه ....وأم خمااااس من رسوم فرييج ...أحلى شي يتمشووون ووراهم اليهال بكل مكان ...أحب اليهال يوم يكفخونهم تحسهم أشرار ...وهذولا كل واحد ماسك راسه ليطيح هههه>>أبد مو مقطعتنهم 

 وهذوووولا اليهاااالو البنات ....تشوفون البنت اللي لابسه مخور بوتيلة ..ثالث وحدة من اليسار ..أنا كنت أقول بصوركم ..أقصد الكل ..وهي عبالها أبي أصورها هي بس ...وتيبست مكانها ...وتطالعني بحقد مادري ليش ههههه ...ماتضحك ^^"
 جانب من الحضور ....
 وهذولا مركز براعم الرقة ....مسوين فقرة أغاني شعبية ...ماشالله عليهم 
 تشوفون هذي البنت اللي لابسة برقع ...هههه شفتها بعدين تتمشى بدون الرقع جان اقولها تعالي تعالي البسي البرقع خل اصورج جان تقولي "والله "...هههه كانت اكبر من البنات وزعيمتهم هههه 
وهذي كانت الفعالية ...امم استمتعت بالفعالية لمن كانت بسوق العرصة أكثر ...هالسنة كان ناقصنها الترتيب شوي :)
أهم شي شاركت خخخ
ننتقل للحدث الثالث 

-----------------------------------------------------------------

 وصلتني دعوة لورشة "عبّر عن تراث الإمارات"...لجمعية التراث العمراني ...حقيقة ماكنت أعرف شو بالضبط راح أسوي بالورشة ...وأذكر وأنا كنت رادة من الجامعة على أساس أرد البيت أجهز عمري وأروح الورشة ...أسأل روحي أروح ولا ما أروح خصوصا وإنه ربيعاتي ماقدروا ييون بعضهم مشغول بالامتحانات واللي مايقدر ...هذا يعني إني لازم أسير بروحي ...وأنا كل الفعاليات اللي رحتها كانت مع خواني وخواتي ..فكان شي يديد إني أروح بروحي وغيرها كنت مابين أروح الورشة أو أقعد بالبيت أذاكر ...قلت لروحي المذاكرة لاحقين عليها ..لكن هذي الفرص قليل ما تي في الحياة ...هذي من امتحانات الحياة (أحازل اقنع روحي هع )..يعني أنا دوم أذاكر مافي شي يديد بالموضوع أما الورشة فيعني بكتسب خبرة ..تجربة ...وبضيف شي لشخصيتي ...وبجذي قررت أروح الورشة :)

شفت هناك زملائي بالجاامعة ...كانت الورشة عبارة عن مجموعات ..كل مجموعة لها سيناريو تشتغل عليه ...يعني موقف يمر علينا شلون في هالموقف نعبر عن تراثنا للغير ..
أنا في مجموعتي كان معاي زميل لي بالجامعة و واحد من إدارة التراث بدبي ...

هذا السيناريو مالنا واللي هو عبارة عن "مهندس معماري \اختصاصي ترميم من دولة مجاورة ...يزور الإمارات ..كيف توصل تراثك وتعبر عنه لهالمهندس ..بحيث تزيد اهتمامه ...والمطلوب إنه نسوي برنامج مدته ساعة على هالأساس ....


وهذا كان بوسترنا ....اخترنا منطقة البستكية لتكون نقطة الإنطلاق ...بحيث إنه المهندس المعماري يعيش الأجواء التراثية ..ومنها ننتقل للسوق الكبير في بر دبي ...مرورا بالشندغة لزيادرة بيت الشيخ سعيد ...
والمجموعة الثانية كان السيناريو عن رجل أعمال يبغي يسوي مشروع ...وكيف تحاول تقنعه يسوي مشروع يخدم التراث 
وهم اقترحوا يسوي منتجع  كل شي فيه تراثي يعني لمن تسكن فيه  تحس إنك تعيش أيام أول ...

 والسيناريو الأخير ..كان عن صحفي يبغي يكتب عن تراث الإمارات فكيف تساعده في تقريره ..هم اختاروا يودونه منطقة المريجة اللي فيها سوق العرصة والمنطقة التراثية ..و يخبرونه عن التراث :)

 وطبعا ماكانت السناريوهات جذي بس ...لكن كان شي لجنة تحكيم ...تمر علينا وتشوف شلون نتفاهم كمجموعة وأفكارنا وتقيمنا على هالأساس ...وكانت اللجنة مكون من أربع أشخاص هم من اليمين (محمد بن جرش مدير عام لمجموعة مسارح الشارقة , سهيل  الكعبي عضو في منتدى الشارقة للتطوير , وأخيرا ناصر هاشم مدير متحف اللآثار في الشارجة )
 جاااااانب من الورشة ...أنا هنااااااك أخر شي هع ..أتحدااكم تشوفوني :)
 بعد ماخلصنا شغلنا وخلصنا بوستراتنا ...سوينا بريسنتيشن عن شغلنا ...عشان يقيمونها تقييم نهائي ...,وصارت مناقشة حلوة بين المشاركين ولجنة التحكيم ...بالنسبة لي استمتعت فيها أكثر شي....حلو يوم تاخذ الخبرة من ناس أكبر وأخبر منك :)
بعدها تم الإعلان عن النتايج وكانت كالتالي مجموعتي والمجموعة الثانية "سيناريو رجل الأعمال" يينا بالمركز الأول يعني تعادلنا وحصلنا 84 نقطة من 100 وأما المجموعة الثالثة "سيناريو الصحفي" كانوا بالمركز الثالث بس 76 نقطة ...
وبعدها تم توزيع شهادات على أعضاء لجنة التحكييم ...والمشاركين :)
وهذي كانت أخبااااااااري ...وأحداث حياتي في الاسابيع اللي طافت إن شالله استمتعتوا بالتدوينة :)

وبعد شوي بحاوط في المدونات أشوف جديدكم ^^

دمتم سالمين ~

هناك 16 تعليقًا:

  1. حلو ..

    احلى شي انه ماطوفتي عليج فرصة المشاركة بالورشة ..

    وموفقه يارب..

    ردحذف
  2. السلاام عليكم ورحمة الله وبركاته

    امممممم اهم شي استمتعتي
    و شردتي من جو الدراسه

    بس من الصور حسيت الشي حلو ^^

    dalo.oo.3atuae

    ردحذف
  3. شوقتينا لرمضان وجو القرقيعان :)
    الورشة شكلها شغل عدل .. يعطيكم العافية
    وخوش بوست تسلم ايدج ومنورة التدوين ;)

    ردحذف
  4. و عليكم السلام و الرحمه
    احب اهنيج انتي دخلتي موسوعه جنيس للانشطه ما شاء الله
    الله يوفقج يا رب ;))
    بيضتي الويه و منها للأعلى بانتظار المزيد من كتاباتج الطيبه
    ;)يعطيج العافيه

    ردحذف
  5. احداث حلوووة وممتعة

    عليك بالعافية خيه

    عجبتني توزيعات حق الليلة

    حنا عندنا نسميها ناصفة

    بالتوفيق وبانتظار بوست قادم جميل كجمالك

    ردحذف
  6. أول شي الحمدلله على السلامة ، يعني بعض الكلمات كانت شوية صعبة انه نفهمها لكن المهم انه الفكرة العامة وصلت ، ربنا ينجحك يارب بامتحاناتك ويوفقك في حياتك العلمية والشخصية .

    استمتعنا كثير بمشاهدة الصور وألف مبارك تخرج اختك ..

    دمت بخير .

    ردحذف
  7. الأخت الفاضلة :: أم حرووبي ::
    أسعد الله أوقاتك بكل خير
    حقيقة
    موضوع مفعم بالحيوية
    ومبروك النجاح
    والقرقيعان
    وبسكوت الموز وسبونج بوب الرزة واللزقة :)

    وهي دعوة للحياة :)
    استفدت كثيرًا

    ردحذف
  8. اهلا ام حررربي .. حبيت اسئلك شنو يقولون عندكم اليهال لما يجوا في حق الليلة

    لان قاعدة اجمع كل دولة شيسمونه وشيقلون فيه

    ردحذف
  9. هلا حبيبتي رورو...
    صدقج بعد ماحضرت الورشة ما ندمت ابدا اني شردت من المذاكره خخخخ لاني صج استفدت :)

    حياج دووووم ^^

    ردحذف
  10. وعليكم السلام ورحمة الله وبركاته دلوعه

    اي والله وناااسه ...بسم مقارنة بالسنة اللي طافت كان أحلى يمكن لانه كان بسوق العرصة فتحسين بالاجواء عدل ..
    هي والله احس نفسيتي شوي تحسنت :)

    حياااج ^^

    ردحذف
  11. هلا بوكمارك :)

    بنقرقع معاكم بعد خخخخ ...الورشة اي ماشالله عليكم الجمعيه ما قصروا مرتبين كل شي ^^

    الله يسلم قلبج ^^

    ردحذف
  12. بلاك توليب
    ههههه وي شدعوه كلها نشاطين :)
    حلو تكونين جزء من هالاحداث ...
    مشكوره الغالية ...كوني هنا دوما ^^

    حياج ^^

    ردحذف
  13. هلا فاطمة
    الله يعافيج الغالية ..
    اول مره اسمع ب"الناصفة" يعني نص الشهر :)

    مرورج الاجمل ^^

    ردحذف
  14. مرحبا وجع البنفسج
    الله يسلمج حبيبتي ...قريت تعليقج بعدين قلريب البوست ادور الكلمات الصعبه ..ماعرفت ...عادي قوليلي بترجمهم ^^
    أمييين يارب ..ويبارك بحياتج ان شالله

    حيااج دوم وكل يوم ^^

    ردحذف
  15. هلا محمد ...
    الله يبارك بحياتك ...الا سبونج بوب ودي اكفخه يقهرني ><

    لازم نستمتع بالحياة رغم منغصاتها ^^

    حياك دووم وكل يوم ^^

    ردحذف
  16. مرحبا فاطمة
    ااممممم

    عطونا الله يعطيكم بيت مكه يوديكم
    عطونا من حق الله يرضى عليكم الله
    عطونا من حق الله ولابنذبح العجيله
    جدام بيتكم وادي والخير كله ينادي

    اتوقع في تكمله بس هذا اللي اعرفه :)

    ردحذف

قال تعالى: (( ألم تر كيف ضرب الله مثلاً كلمةً طيبةً كشجرةٍ طيبةٍ أصلها ثابت وفرعها في السماء*تؤتي أكلها كل حين بإذن ربها ويضرب الله الأمثال للناس لعلهم يتذكرون ))إبراهيم 24-25