هذه المدونة تخضع لقانون حماية الملكية الفكرية الذي ينص عليه القانون الإتحادي رقم 7 لدولة الإمارات
"لذلك يمنع نقل وتداول أي من محتويات هذه المدونة دون إذن من مالكها "
.?. هاجس اللحظة .?. هنا تجد الكثير مني

 

الجمعة، 14 سبتمبر، 2012

.,ْ~x مقتطفات من أشعار سالم السيار



السلام عليكم ..كيف حالكم يا جماعة الخير ...قبل البارحة حطيت أبيات للشاعر المتألق "سالم السيار" في تويتر..وبطلب من حبيبة ألبي نهار ...رتبتهم وحطيتهم بتويتر عشان الكل يستمتع بها :)


يفوح العود من جمره 
وستر أجسادنا من إبره 
ومن ذرة رمل هذا الجبل يا صاحبي كبره 
إذا ما صرت إنت الورد خلك دايم عطره 
مثل شاعر يكون النحل وتكون الناس كل الناس هي زهره
يجيب من الكلام أشكال ..لا صار الحب هو قدره 
وحياتك إنت تبديها وتنهيها ترى بفكره 

***

حنا تأذينا كثير ...حنا القلوب الطيبة 
نمشي بأحاسيس ونسير ...كل شي نشوفه نجذبه 
والمشكله إن الزمان ثابت... وحنا به ندور 
نجرح بعضنا و نعتذر 
نجرح بعضنا ثم نقول...
" هذا الزمن مابه شعور "
كل شي حولك للأسف ...أشياءه كلها مؤلمة 
وحنا القلوب الطيبة.. كل شيء نشوفه نجذبه 
الله يعين الطيبين ..
أهل القلوب المفعمة (بالرحمة والحب الكبير) 
بس ما بقى إلا سؤال..
هذي البشر هل هي فعلا مسلمة ؟؟!!!

***

إذا إنت عالي باحساسك ...
وكل إنسان من حولك بليد شعور !!
لا تقعد تفكر أو تلف وتدور 
بمعنى أجمل الأشياء هو (الإحساس) 
وإذا الإحساس مو موجود في ناسك
 يعين الله 

اشعل فكرك وسافر ...عن الواقع لكراسك 
ومن الأوراق اصنع لك ( جناحين)
وقبل لا تروح لا تنسى...
" تغمض بالخيال وطير" 

***

ولا تحزن بعد هذا المسا ياخوك ...
تهندم
تعلم تمشي فوق الجرح 
ورى كل ليل ياخي...( صبح) 
حزين وليش كل هذا؟!!

تلفت شوف في بالك
" منو اللي فكر يجيلك ؟..
ويسأل وش هي أحوالك!!"
ولا حد ..
إذاً مافي  أحد يستاهل  أحزانك
 أو تكرم حياته بدمعة أجفانك
ولا واحد أكيد يحس
خلك دوم...

خلك دوم فوق النفس

***

ياطيب وين رايح وين ؟؟
تمهل قبل هذا الوقت يجرحك بسكاكينه
إخذ مني... ترى كذب الكلام يبان
ولا تصدق كثير من الكلام بذوق يحلونه
وأعرفك طيب وحساس..
تصدق كل شي...أدري
 تحب الناس عالنية...  معاهم وين ما راحوا.. (عالنية )
ولكن التفت لحظة ...
وخذ مني...
" ترى الطيب في هذا الوقت لو تدري.. 
برمشة  عين ..
برمشة  عين يبيعونه!!"

***

أكبر شتيمة بهالزمن.... كلمة "هلا"
يا كبرها بهالوقت.... ويا قل الفعل 
أدري أنا لسانك يرحب بالملا ..
 وقلبك يشتم كل من عندك وصل!! 
ترحيبتك دايم تجي ....
"هلا وغلا"
ومفارقك كل الغلا يابن الأصل 
لانته كبر هذي الهلا و أيضا ولا ...
كبر الغلا و أثر الحكي عندك سهل !!!

***

صاحبت فالدنيا كثير...
منهو صفالك منهم ؟!!!
لا ينشغل بالك أبد...و لا تجيهم كلهم 
لا تلتفت للي مضى..عينك على باكر
قو العزيمة وانتفض
واصرخ..
" أنا قادر"
 واصنع حياتك بالقرار
وبدل ظلامك بالنهار
وإن كان ودك في أخو ..
صاحب يعينك بالطريق..
 لاتلتفت للناس أبد... خلك مع نفسك أخو 
(النفس هي صاحب )

***

ارقى على جروحك غصب
لاتشتكي للناس أبد..
الناس مشغولة... واللي تبي تقوله أصلا مهو الناس
مثلك ومجروحة!!
كلِِ لثم بوحه..
ماراح تلقى لك أحد
العز هو شمعك ..ارفع عيونك فوق واوقد أمل عمرك 
قلبك وصبرك ..
بالك تطفي العزز..كل ما انتثر دمعك
ولا تشتت أفكارك....( إنت كثير أشياء )
بس فكر بجمعك..
وكمل حياتك ( صح ) 

***

تصدق عاد؟!!!
 طلعت تلعب على الحبلين
أنا من اثنين "دنيا ودين"
يعني الذاكرة نصفين!!
صلاة وأدعية في صوب...
 وشعر وأغنيات بصوب؟!!!
تصدق عاد؟!!!
أنا انسان مرضي ربي و خايف  
ولا أدري ليش؟
ولا أدري شلون أنا أتكيف مع الدنيا عشان أعيش ؟!!
يارب ..وحدني في راسي..
عشان أسمو ...
عشان أعيش !

***

ماتفهمين!!
كم قلت لك : لا تكتبين ؟
البعض يبحث عن صور..يبي يغذي ناظره 
يا مسافرة لدار الأدب 
البعض الآخر وإن قرا..يقرا سطر أو نص سطر
انقلبت الأوضاع ثم صار الأدب .."قلة أدب"
أو قلة الأدب .."أدب"
وإنت (( ذهب ))
أدري بخيالك متعبة ..وتفكرين وتنزفين 
من فكرة لفكرة يسافر بك قلم..."ألم"
محد يمر وينتبه ...وشكثر إنت مرهقة
وكم تتألمين !!!
لا تسألين ...الحل!!
الحل بس قولي معي ..."الله يعين"

***

هذا الوضع الراهن صعب..
كل شي صادق أصبح كذب!!
وكل شي كاذب أصبح صدق!!
(محروقة هالدنيا حرق)
وأكبر كذبة بعالمنا..." لما نصدق كذبتنا"
وخصوصا لما يقولون ..في شاشات التلفزيون
 " كل أموال الشعب تكون ......لهذا الشعب!!!"

كمل يا المسؤول تمون ..
ياراعي البشت المصيون ..
قلبك عايش بس للحب .....
تحب كل شي إلا...( الشعب)!!!

***

الدنيا فيها شيئين ..
شيئين يكونوا بالناس..
"سلبي والآخر ايجابي"
السلبي ...
لو قلت الصدق كل الصدق بقلب ودين ..
محد صدقني بيصدق !!
لو تحلف لو شنهو تسوي ...
مليون خاين وكذاب..مروا أشكال وألوان
خانوا أمة في أكملها..
يعني تبغي الناس الحين... تصدق بس إنت الصادق !!!
 لو الناس تصير لسان ..
صوت لسان الناس يقول"
 "فارق فــــــــارق "


والإيجابي لاشك إنه ..
إن للحين الناس بخير ...
ومصدقة في هذا الشي ...
لا زالت في خير وتؤمن ..
إن الله الحق المؤمن ..
وإن رسول الله محمد هو رسول الله الصادق 

***

أذيت نفسك ليه ؟؟
ومن هو عليه أذيتها؟؟
 للي تركك وراح؟!!..
للي نساك وراح؟!!

شوفه مع أحبابه مستانس ومبسوط!!!
و إنت تعيش الأسئلة ...
"يمكن يجي ؟..أو ما يجي!!".....

والعمر ولى ورااح !

***


مبروك إلى كل رؤساء العرب..
مبروك للأقصى الشريف
من بعد ما ذقنا القهر..
والموت بأنواع اللهب..
اليوم اجتمعوا الرجال..
مشايخ الدين العظام ..
وأهل الثقافة والكتب..
مع كل رؤساء العرب!
طبعا وتم الإتفاق ..على اختراع
 "القائد الصعب الهمام"!!!
اللي اكتشف ..
شي يداري ذلنا ..
شي يخلينا نموت....... أحياء لكن (في سلام)!!!
تم اكتشاف القنبلة ...هو مصطلح ....
"نـــــــــاشط سلام"!!!

هناك 10 تعليقات:

  1. اختيارات جميلة
    رقيقة وراقية
    مثلك :)

    ردحذف
    الردود
    1. اهلا بك بوك مارك
      اشتقت لوجودك هنا ..حقا نورتي ^^

      شكرا لك :)

      حذف
  2. السلام عليكم..
    تسلميلي يا أحلى أم حاربه في الوجود
    ..
    إختيارك دوما ينم عن روح جميله
    وذائقتك الشعريه تعجبني
    إختيار أحببته
    شكرا من القلب
    ....
    الواحد جذه يعرف يقرا زين خخخخ
    ..
    دمتِ بخير

    ردحذف
    الردود
    1. وعليكم السلام نهار ^^

      الله يسلمج :)

      ـــ العفو ولو حاضرين للطيبين ^^

      حياج ^^

      حذف
  3. السلاام عليكم ورحمة الله وبركاته

    شحااااااااااااااااالج ؟؟
    من يومييين تذكرتج و الله لج وحشه ^^

    اممممممم الصراحه تعيبني أشعاره ما شاء الله عليييه

    و يسلموووو ع المقتطفات ^^

    ردحذف
    الردود
    1. وعليكم السلام ورحمة الله وبركاته
      يا مرحبا بدلوعه ^^

      يسرج الحاااااال خيتي ..وانت كمان لج وحشة ^^

      هي أشعاره قوية وموثرة :)

      الله يسلمج وحياج الله :)

      حذف
  4. اسعدت بالخير...
    صور واحوال...والله المستعان على ما تصفون

    ردحذف
    الردود
    1. مساء الخير

      الله المستعان..شكرا لمرورك ^^

      حذف
  5. "" ﺗﺮﻯ ﺍﻟﻄﻴﺐ ﻓﻲ ﻫﺬﺍ ﺍﻟﻮﻗﺖ ﻟﻮ ﺗﺪﺭﻱ.. "
    "ﺑﺮﻣﺸﺔ  ﻋﻴﻦ .."
    ""ﺑﺮﻣﺸﺔ  ﻋﻴﻦ ﻳﺒﻴﻌﻮﻧﻪ!!"""
    ""
    ""
    تسلم يمينكシ

    ردحذف
  6. رووعهه
    راقت لــي كثيراً
    تحياتي لِ بـــاذخ الحرف سالم السيار

    دمتي بوود

    ردحذف

قال تعالى: (( ألم تر كيف ضرب الله مثلاً كلمةً طيبةً كشجرةٍ طيبةٍ أصلها ثابت وفرعها في السماء*تؤتي أكلها كل حين بإذن ربها ويضرب الله الأمثال للناس لعلهم يتذكرون ))إبراهيم 24-25