هذه المدونة تخضع لقانون حماية الملكية الفكرية الذي ينص عليه القانون الإتحادي رقم 7 لدولة الإمارات
"لذلك يمنع نقل وتداول أي من محتويات هذه المدونة دون إذن من مالكها "
.?. هاجس اللحظة .?. هنا تجد الكثير مني

 

الجمعة، 28 مايو 2010

.,؛‘*~مباشر


همممم ماعرف ...بزززز بززز ون ون ون

وش وشوش وووشششش ...الآريال خربان ..خل نعدل الارسال

انزين شخباركم ياجماعة الخير ..علومها الدنيا وياكم ..بصراحة موضوعي مشكّل ..وشوي من هني وشوي من هناك ..ماعرف جذي استهبال يعني ..

قبل لا أبدا بقول شي

أنا عصبت ><

أفا ليش منو مزعلني منو اللي معصبني فديتني ..

كلما أعلق على مدونة حد يكتب اسمي (أم هروبي)..لماذا؟ ليش؟

المعروف أنه حرف

ح=H

Hamad=يعني حمد

ولا في حد يقول همد؟!

قلت العتب مو عليهم العتب على الإنجليزي ..فسرت الإعدادات وغيرته

وأنا أعلن أسمي (أم حرّوبي)..

انزينات

مرت على بالي أغاني مادري أناشيد أو ترانيم >>ترانيم أحسها مسيحية

المهم ماعرف شو يسمونها هاللي كنا نحشر العالم ونحن نغرد بها ونحن يهالوو

ذكرت كم وحده

***

أمي راحت الكويت ..يابتلي حبة شوكليت ..والشوكليت عند البياع...والبياع يبغي فلوس..والفلوس عند العروس ..والعروس تبغي يهال..واليهال يبغون حليب..والحليب عند البقر ..والبقر ياكل حشيش ..والحشيش يبغي مطر والمطر عند الله ..ولا اله الا الله ..محمد رسول الله ..

ولو أنه أمي عمرها ماراحت الكويت لوول ..بس هل في حد يدق درب ويسافر عشان حبة شوكليت؟! ..مو باكيت بعد هع

***

هاي تذكرني بأيام المدرسة يوم نلعب صفاقة ويا ربيعاتي

بدر أنيس في الأوتوبيس ..وقع بدر ضحك أنيس ..قال أنيس مالي أنيس ..لأن الفأر يلحقني ..قال الفأر مالي فأر لأن القط يلحقني....قال القط مالي قط لأن الكلب يلحقني ..قال الكلب مالي كلب لأن العصا تضربني ..قالت العصا مالي عصا لأن النار تحرقني ..قالت النار مالي نار لأن الماء تطفئني ..قالت الماء مالي ماء لأن الله خالقني

يعني كيف مايكون ماي !!..الحين أنا أستغرب منو اللي كان يألف هالسوالف

**

هذي أنا أظن أخواني مألفينها ..لما الاستهبال والاستعباط يوصل حده

سالتهم عن الكلمات الصحيحة وأختلفوا واحد قال بيزا والثاني قال كيسا ..جذي ولا جذي ماتفرق ترى اثنينهم مالهم معنى خخخ

يقولون

عيسى بيزا\كيسا طاح في الهريسة ..أمه قالت محد يجيسا

**

××فاصل إخباري××

بما إني حاطة تقويم ..حبيت أدلع حيواني الأليف وأحطله تقويم تجميلي مخصوص حقه ..طلعه وااايد فنتك عليه شوفو كيف ..قلتله جيييز

عدنا

**

أقرع مقيرع طاح في الطاسه ..يبكي على أمه يبي قرقاشة

هاي أظنها من التراث الكويتي ^^

**

هاي وااايد أحبها

أنا تعبان ..سيكلي خربان ..أمي طرشتني الدكان ..عشان أييب حبة لبان

أذكر مرة كنت أنا وأخواني نغنيها ونحن نلعب مريحانة على شاطي خورفكان واليهال سمعوها وتعلموها منا خخخ

وبعد مرة ثانية أروح الدكان عشان حبة لبان (مايبيبعون بالحبة الا هاللبان بو ربع)

**

هاااي بعد وناااسه

كان ودي أشتري من دكان عمي علي ..شوكلاته وشمبري ..لكن فلوسي قليله لكن فلوسي قليلة ..عصفور طلق حمامة ..قالها مع السلامة ..نلتقي يوم القيامة ..والله الحمامة عجيبة والله الحمامة عجيبة

أولا أنا للحين ماعرف شو يعني شمبري (اسمها يوحي انها سندويجه)..

ومن ناحية ثانية شلون عصفور هالكبره يتزوج حمامة ..صج دنيا ..ومن ناحية أخرى

بغض الطرف عن سالفة يوم القيامة (لأنه مو أنا مألفتنها )

-------------------------------------------------------------------------------------------------------
يوم الأحد ببدا الصيفي >< مابدي مابدي ..صار تنظيم الوقت عندي مشكلة أزمتني في الكورس اللي طاف وكل شي اختبص ..اللي عنده أفكار شلون أنظم وقتي وأجبر نفسي أتبع نظام معين (مع العلم إني كنت إنسانة ماتمشي بدون جدول..لكن ماحيلة المغلوب !)
شي ثاني
وزارة التربية والتعليم ..نزلت قرار حق المدارس إنهم راح يخلونهم يدرسون بدل فصلين صاروا ثلاث فصول وعطلتين مدتهم 3 أسابيع (الحمدلله الحمدلله إني جامعة <<يامدمغة شو تفرق تراج تاخذين كورسين +صيفي)
بصراحة مادري شو الهدف من القرار ..بس حبيت أعرف رايكم ..تظنون شو إيجابيات القرار وشو سلبياته ؟؟
××فاصل ××
وأنا أحوس بايميلي شفت شيبة رورو ..قلت أوي شو بتقول لما تشوفها .
.والتعليق اللي كان على الصورة
(ابشع لقطه لجورج كلوني
تحس ان واحد معطيه كف)


عدنا من جديد
**
من بين ايميلاتي ..كان فيه حكم وعبارات عجبتني وحده
(التطور..قرب أخبار الناس وباعد قلوبهم) صج والله ..أتذكر يوم إني كنت صغيرة وحولنا لبيتنا الجديد وكان أكبر من ا لجديم..وقتها كنت بالابتدائي واايد كنت أحن لبيتنا الجديم ..كنت أقول لأمي (أمي أبي أرد بيتنا الجديم ..كان بيتنا صغير بس كنا أغنيا..والحين بيتنا كبير بس صرنا فقرا)..الحين وأنا أتذكر كلامي ..وقتها يمكن فكرت فيه بسطحية ..لكن الحين صج ..تلاقين في ناس بييوتها صغيرة لكن عندهم قناعة تغنيهم عن كل شي ..لكن في ناس مهما يكون عندها تكون طماعة وتبغي زيادة ..
**
نهاية بغيت أحط كم بيت من تأليفي ..يعني شبه تحلية ^^

على ذكرى الجروح اللي غزت قلبي عقب فرقاك
وكل دمعة قهر سالت لأجل ترجع تراضيني
أبحكي قصة انسان عاش لك ولأجل روياك
وحلم مات في مهده وصار الياس طاويني
تذكر يومك تزعلني ترجع حبي أبي ارضاك
ولي ضاقت بي دنياي تحاول إنك تمازحني
ولكن راحت أيامك وحلمي مات في مرساك
ماعاد لك وجود بقلبي وخلك عاد ناسيني

أدري بوست طويل ..لكن طلعت مابخاطري ..ودمتم سالمين ^^

هناك 17 تعليقًا:

  1. وناسه بوست منوع وغير عن العاده ..

    لو حاطه 7 جان فهموها يمكن خخخ ..

    الاول ماره علي بس المقطع الاول غير ..

    ال2 ماعرفها..

    ال3 هم ماره علي بس مو ذاكرتها بالضبط..

    -يما في وحده تقولي اختاري لون للتقويم عن نفسي افضل السيلفر وفي وحده بالصج حاطه كل حديده لون :\

    وصح اقرع اتوقع تبعنا ..

    خخخ من الحب يتعنون , وهم مامرت علي..

    اما هذي ايام الطفوله بربوع مسقط راسي موطني الام القصيم كنا نغني هالمقطع باي باي باي باي مع السلامه عصفور عصفوور طلق حمامه !!

    موفقه يارب بالصيفي وردي لتنظيم وقتج :)

    بس الصيفي بالجامعه اختياري , مادري شهالقرارات الفاشله شالتطور اللي بيصير :\

    خخخ وتعليقي ع صورة شيبتي انه اكيد شايف دلوعه خخخ..

    ماحب البيت الكبير احس بضيع فيه وبفقد اللمه مع انه هالشي يعتمد ع اللي معاي مو علي بس :\

    وخوش ابيات ماشاءالله موثره وبالصميم ..

    مشكوره..

    ردحذف
  2. بوست فرفوشي :)

    تصدقين الأغاني هذي متشابهة عندنا وعندكم!
    بس مانقول امي راحت الكويت لأنها بالكويت أصلا p;
    بس سؤال وجيه منو الي يألفها؟!

    ردحذف
  3. لوووووول انا ما اكتب اسمج بالعربي .. اكتبه بالانجليزي :P

    حياكم الله بالكويت .. يوزعون شوكليت ببلاش عندنا :P


    التقوييم عللييه كووول :P


    استمتعنا بالنشرة :D

    ردحذف
  4. صورة الثعبان لو وريتها حق أمي ماراح تنام يومين من الخرعة لول، أما " أم حروبي " أشوه أنا من أول ما قريت الاسم على طول حطيتها " حروبي " وبلوقي يشهد على ذلك.. ويعطيج العافية على البوست

    ردحذف
  5. الأخت الفاضلة :: أم حرووبي ::
    تحية صباحية عطرة معطرة
    ثم
    جميلة هي تلك الأهازيج أو الترانيم ^^) الشعبية
    لها وقعها المميز في النفوس ..)
    بالنسبة لقرار الثلاثة فصول ،، يحتاج إلى دراسة جادة لأني أخشى أن يصلنا هنا KSA وما نحن عنكم ببعيد ..

    ودمتِ بود

    ردحذف
  6. بووووست عجييييييب الصرااحه

    كشووخي وظحكني لوولز

    من صدقج تربين حنيش

    لوووولز

    انا اخاف منه
    -----
    أحلى أغنية أو ترنيمة لوولز بالنسبة لي هي
    أقرع مقيرع طاح فالطاسه
    وايد أحبها
    والباجي مثل ما قلتي
    تختلف الرواية من طفل لآخر لوول


    ---------
    اووه اووه صدق رورو تحب جوروج كولني
    ما دريتي انه رورو تصير ماماتي
    و\جورج كولني الشيبة باباتي
    ودلووعه الشريرة حرمة أبوويه
    لوولز
    --------
    يسلمونيشن كثير كثير ع البووست الغااوي
    وسوريشين ع الانقطااع الطوويل

    ردحذف
  7. أم حروووبي حلو ترا إسمج بالعربي عيبني ..
    بس غريبا يتخلبطون و يكتبوون هروبي لووول ...

    يا أم حروووبي يوم قلتي مريحانه ذكرتيني بمريحانة البدو خيستنا من الفسو .. و أنا مستغربه من هالشي كيف مريحانة البدو بتخيسنا ههههههههه ..

    و عن إمي راحت الكويت و يابتلي حبة شوكليت .. يمكن لأنه في هالفتره الناس كانوا يسيرون الكويييت للشغل فعشان جي .. بس ليش جوكليت مب شباصه ههههههههه ...

    و مبـــــروك عليج التقويييم و الله يعينج ويا الصيفي في هالحر .. و سالفة الفصول بتوزع على 3 فصووول ما أعرف ليش بس غريب الصراحة ..؟؟.

    ردحذف
  8. عموتي رورو
    هيه جذي حبيت اقرق شوي واغير ..طلعت الاكو الماكو خخخ
    ماحب سوالف الارقام من جذي ماحطيت7
    معلومة جديده ماكنت ادري ان مسقط راسج القصيم ^^
    اي الصيفي عندنا اختياري وخذته عشان اخلص بسرعة تعرفين عصر السرعة بعد لوول ..تسلمين ..امين
    اما عالتقويم انا حاطه سيلفر على قولة اختي بخلي عندي برستيج بلا بهرجة خخخخ
    مادري والله شو مسوية دلوعة بهالشيبة لوول
    صدقج اللمة احلى شي وصرنا نفتقدها واايد ><
    احم احم اشكرج الصراحة ..سانكيوووزات

    ردحذف
  9. بووك مارك

    زين يعني غيرت جو بهالبوست ^^
    سؤال محير ..تصير شرات الحكايات الشعبية مجهولة المؤلف ..هذولا يدود يدود يدود يدودنا مألفينها خخخخ
    بس أما عليهم سوالف تونس خخخ

    تسلمين على المرورو ^^

    ردحذف
  10. لولا الأمل
    هيه أنا أدري ليش كتبته بالانجليزي
    على قولتهم ابعد عن الشر وغنيلو (نسخ ولصق بلا صدقة راس خخخخ)
    ترى بعد انا اسوي جذي يوم اتوهق وماعرف اكتب الاسم لووول

    عاد انا من عيد لعيد اكل شوكليت ..بس مال بلاش كثر منه خخخ

    هيه يحليله من بعد ماحط التقويم صار اجتماعي ..ويخق على ربعه ..منو قده تقويم ملون لووول

    ونراكم قريبا في نشرة جديدة ان شالله ^^
    شكرا وحياك الله

    ردحذف
  11. متطرف جدا
    مرحبا بك في مدونتي المتوااضعة جدا جدا ^^
    بصراحة يبت العنوان صح ..انا حطيت عنوان البوست عمياني ..ولما شفت تعليقك قلت ليش ماخليته (ثرثرة)

    شكرا للمرور ..وحياك الله ..سعيدة بتواجدك في أرجاء مدونتي ^^

    ردحذف
  12. قلم ومساحة
    لا لا لا لا توريها الوالدة حرااام تتروع ..
    هيييه أنا بعد أشهد إنك كتبت اسمي صح ..بس خلني أتأكد ولا بفتح تحقيق خخخخ

    تسلم على المرور ^^ وربي يعافيك

    ردحذف
  13. الاستاذ محمد القويري
    نورت المدونة والله ^^
    هيه والله الحين ذكرت الكلمة اللي بغيت أقولها (أهازيج) ..صدق مهما كبرنا تظل لها صدى مفرح يوم نغنيها
    أما على القرار فماظن إنهم درسوه عدل ..ترى قراراتهم تنزل شرات أمطار الغابات المطيرة ..قرارات كثيرة ودراسة فقيرة للاسف

    مشكور وحياك الله

    ردحذف
  14. هلا هلا سمو الأميرة ..منو قدج إجااازة ..بحسدج الحين ليش أنا دوام بصيييح ><
    مرحبا بج مرة أخرى
    عجبتني (كشوخي)دلعتي بوستي خخخ
    هيه أربي حنيش بس هذا اللي قوم عشر وعشرين المطاط خخخخخخخخخ
    أها طالعة على أمج رورو تحب أقرع مقيرع
    دام رورو ماماتج ..وجورج باباتج ودلوعة مرت الوالد عيل طلعتي بنت عمتي لانه رورو عمتي ..يااااه طلعنا من الأهل خخخخخ
    عفوووييشن كثيرن كثييرن ..وويلكميشن باكشن هههههههه
    ومسموحه بس لا تعيدينها لووول ^^

    ردحذف
  15. AM.SA.CHANNEL
    اهلا اهلا ..علومش اخبااارش ..زينش ههه
    ترى حتى أنا متوهقة شلون أقرا اسمج ..بس اسوي نسخ ولصق خخخ..شكرا شكرا اخجلتي تواضعي ادري اسمي حلووو بس هروبي من وين طلعت مادري
    هههه اول مره اسمع عن مريحانة البدوو ..اسميهم يألفون أشيا غريبة !!
    هيه ليش جوكليت مو شباصة ..يمكن لانه وقتها كانوا اليهال بو كشة مايحطون شباصات خخخخ
    الله يبارج فيج ..هيه اليوم أول يوم دوام ولاعت جبدي الله يعين على الباقي ..أما القرار أحس ماله معنى

    مع التحية ^^

    ردحذف
  16. "بدر أنيس في الأوتوبيس ..وقع بدر ضحك أنيس"
    هذي اول مرة اسمعها بس حلوه ههههه

    ردحذف

قال تعالى: (( ألم تر كيف ضرب الله مثلاً كلمةً طيبةً كشجرةٍ طيبةٍ أصلها ثابت وفرعها في السماء*تؤتي أكلها كل حين بإذن ربها ويضرب الله الأمثال للناس لعلهم يتذكرون ))إبراهيم 24-25