هذه المدونة تخضع لقانون حماية الملكية الفكرية الذي ينص عليه القانون الإتحادي رقم 7 لدولة الإمارات
"لذلك يمنع نقل وتداول أي من محتويات هذه المدونة دون إذن من مالكها "
.?. هاجس اللحظة .?. هنا تجد الكثير مني

 

الاثنين، 19 يوليو، 2010

.,؛×~أم حّروبي والرسم المعماري-الجزء الأول-2

-.،؛×~مهام ورسوم~×،,.-

السلام عليكم ورحمة الله وبركاته ..شحالكم عساكم طيبيبن..وأخيرا قدرت أخلص تنزيل الصور ..اليوم طبعا بكمل لكم اللي بديته عن تخصصي ..وأتمنى من اللي كانوا ينتظرون هالجزء يسمحولي عالتأخير ..طبعا نظرا لكثرة الصور راح أعفيكم من سوالفي الحلوة ^^
وبكتفي بذكر عنوان الدروس ..وشرح عالطاير ..بسم الله نبدأ (بعض الصور عبارة عن ورقة المكتوب فيها المطلوب منا وبعدها تيي رسماتي ..عشان تقارنون)

الدرس 1 :الخطوط والدوائر ..طبعا كل شي مرسوم لازم نسويه من الحدود إلى مستطيلات الاسم والرقم الجامعي و...
وكل شي محسوب المسافة بين الخط والثاني ..يعني حتى الخط المنقط لازم تكون المسافات بين الشخوط متساويه ..والمربع الثالث لازم نرسمه بزاوية معينة

التطبيق ..اسمحولي على الصور ترى مو كلها واضحة ..لانها بالرصاص

الدوائر ..ولو تلاحظون شي مربع فاضي هني نحن لازم نرسم شي من خيالنا بس لازم يكون فيه دواير

رسمتي..=)

هههه اسمحولي على الشخبطة ..ترى نحن عيال المعماري اي مكان نرسم مافي شي سلم منا ..لاطاولات ولا سبورات ولا شي
هني الله يسلمكم درس التحويل من ثلاثي الأبعاد إلى ثنائي البعد ..يعني لازم نرسم هالبيت كل واجهة بروحها ..

جهة ثانية من البيت ..

وهني نشوف كيف حولت البيت من 3D إلى 2D..تخيلوا كيف لما يكون عنا صندوق كرتون ونفتحه نفس الشي ^^

والحين نفس البيت اللي فوق ..لازم نرسم المخطط له من الداخل ..ومقطعه الجانبي

المخطط..

نظرة للمخطط عن قرب ..الشي المقوس هذي البيبان ..وبتلاحظون انه جزءمن الدري منقط ها يعني انه الدري يودي للطابق الثاني

وهذا المقطع الجانبي ..طبعا بتقولون شو هاي الشخبطة ..هذا الاستاذ مشخط لاني خبصت في رسم المقياس ..رسمت اي كلام هههه اعترف ماكان لي خلق رسمته في الحصة وكل مثلث شكل ..وطبعا هالشي عليه X كبيرة لازم ما أسوي اي كلام ><

نظرة قريبة ..وطبعا بتسألون ليش الخطوط المايلة هذا يعني انه الخام المستخدم هو الطابوق أو BricK..ولازم نرسمه بخطوط مايلة بزاوية وحدة وتكون الخطوط على مسافات متساوية

وهني الدرس العكس نحول من 2Dإلى 3D ..وهذا نموذج مبسط للتدريب

وجذي طلع شكله لما نحوله لثلاثي الأبعاد..طبعا في خط نسيت أمسحه سوى عليه إكس

وهني نطبق النموذج على نفس البيت اللي بأول البوست ..وطبعا هذي مسودة كيف بيكون ..أنا عنّيت روحي ارسم مخطط بعدين قالولي البنات انه كان معطنا الرسمه اللي فوق ..قلت عادي تدريب ^^

وهني رسمي ..

وهذا درس التلوين أو الطلاء rendering>>

وهني تطبيقي بالرصاص ..الاستاذ راسم سمايل على اللي سويتهم عدل خخ اونه يبي يسوي جو ^^

وهني بالحبر ..طلع روحي لين سويته لأن الحبر يقطر وينشر على الورقة ..الين تعبت كانت الساعة 3 الفير وابي اخلص لكن الاستاذ ثاني يوم قال ما بيحاسب لانه الا مايصير ..حبيته ذاك اليوم ^^ خخخ

وهني نطبق بعد على نفس البيت (اكيد بتقولون مافي غير هالبيت نطبق عليه ..حتى نحن كرهنا هالبيت من كثر ما رسمناه ><)..وهني الرسم مو على ورقة لكن على ورق خرايط اللي راويتكم اياه في البوست الاول ..أنا اخترت التنقيط ونقصني لانه قال كان لازم ازيد النقاط

وهني سويته بالرصاص واخترت الخربشة خخخ ماعرف اسمها بالعربي (scribble )>>كنت اقول للبنات خلو يهال اللي في بيتكم يشخبطون عنكم..وطبعا شوها اللي بالاحمر ..هذا استاذي يقول انه الشخبطة صعبة عند الاطراف

والحين آخر درس الا وهو الظلال ..هالمبنى اللي لازم نرسم ظله ..وعاد في هاي الحصة استوت مناقشات حادة بين البنات والاستاذ كل واحد يقول طريقة ..انا مافهمت شي جان اخذ الكتاب وارسم بروحي ><

وهني سويت الظل حق المبنى للحين اذكر هاي الرسمة ..الله يسلمكم وايد عقدت البنات ووايدات عادوا الرسمة فوق 3 مرات ..أنا بعد بس مرة مادري مرتين لانه وحده استاذي العزيز الله يسامحه شخبط على الاولى تشخبيط (هذا محد يسير ويسأله ويكون فإيده قلم لانه راح يدمر الورقة )..وهاي الثانيه ..وراويته اخر مره قبل لا اسلمها وشو استوى الاخ شخط عليها بالاحمر بتلاحظون الشخطة عند المبنى ..أنا وقف قلبي ودمعت عيني واذكر قلت Sirrrrrrr بصوت عالي وهو زاغ المسكين وتم يقول سوري ..والبنت اللي حذالي تقوله بالانجليز ياستاذ هذا احمر ..والاخ توه يستوعب انه ماسك قلم احمر ..قال ماراح يشوف الشخطة قلتله غصبا عنك اصلا ماتحسبها (تراه اجنبي مادري اذا فهم شو قلت )

وهني امتحان نص الكورس ..اول صفحة اختياري لازم نحط الحرف الصحيح حق الواجهة الصحيحة المطلوبة ..

وهني الجزء الثاني من الامتحان وهو تحويل من 2D إلى 3D..شوفوا فهمتوا شي !

وهني المبنى من الجوانب ..طبعا أنا أول ما استملت الورقة بلّمت (0.0)..يلست نص ساعه اتخيل كيف المبنى ..وكان جدامي 3 ساعات عشان ارسمها

وهذا اللي طلع وياي ..شي لاباس فيه حتى الاستاذ قال كبداية وصلتج الفكرة وكنتي تمشين صح ..

ولما استلمنا نتايج الامتحان وزع علينا الحل أو الرسمة اللي المفروض نرسمها ..منو تخيلها صح!..من بين 5 فصول رسم بس 3 طلاب قدروا يخلصون الرسمة في الوقت المحدد ..وطبعا كان في ظلم في الموضوع لانه في فصول عطوهم ساعه زيادة..

خخخخخ عاد توني اقول ما بسولف ..شو اسوي لازم اقول شو استوى خخ ولا ماصير أم حروبي ..واسمحولي عالإطالة ..والبوست القادم راح يكون عن مشروعي النهائي لمساق الرسم المعماري ..متى الله أعلم
إن شالله تكونون استفدتوا واستمتعتوا ^^
ودمتم سالمين ~

هناك 18 تعليقًا:

  1. تدرين؟
    تخصصكم حلو^^

    عجبني ..
    شرايج أغير تخصصي وأتخصص عمارة؟


    ^^

    she is me

    ردحذف
  2. ماشالله حلو رسمج
    طلعتي فنانة p;

    جنها اعجبتني دراستكم
    بس شكلها تعقد شوي

    عقبال ماترسمين مخطط بيتج ;)

    ردحذف
  3. حيل اندمجت، أنا أشوف على الصعوبة بس فيها متعة وفن وحرفية بالرسم قبل مايكون فيه دراسة.. جد جد الله يوفقج ويسهل عليج وان شالله من تقدم لي تقدم
    الصورة الـ 8 ذكرتني بمخطط بيتنا لما بغينا نسوي دور ثالث..

    ردحذف
  4. خوووووووووش شي .. على فكرة الامتحان صعب :)

    ذكرتيني بالذي مضى ..

    قريت البوست وقعدت احل معااج كل الاكسرسايز

    ردحذف
  5. she is me
    يللا فوقه جهزي اوراقج وتعالي معاي ^^

    حياج الله ^^

    ردحذف
  6. book mark
    احم احم اخجلتيني بصراحة(^^")
    ماشفتي رسمات بقية الطلاب عيل ..
    يعقد شوي بس! إلا وايد ...بس حلو ويباله تعب والله
    بديت ارسم مخطط بيتي ما انطر أنا ^^
    وأطبق اللي اتعلمه شوي شوي

    مشكورة وحياج الله ^^

    ردحذف
  7. قلم ومساحة
    صح أنا لما أسوي واجب الرسم ما أحس بروحي أتم لين الفير بس تعال أذاكر مادة ثانيه حدي 12 وأوقف
    يااااااااااااارب آمييييييييييييين
    صج يشبه مخطط بيتكم ..وناسه ^^ أثاري رسمت بيتكم وأنا مادري ..

    مشكور وحياك الله ^^

    ردحذف
  8. بدون تعليق
    صدقت الامتحان صعب حتى الاستاذ قال انه اصعب عن الكورس اللي طاف ..الله يسامحهم
    هههه اسهل شي الجزء الاول من الامتحان ^^ ان شالله يبت درجة كاملة ^^

    مشكور وحياك الله ^^

    ردحذف
  9. ماشاء الله .... شو هااااااااا انا مااعرف اسوي جي .. موفقة !

    ردحذف
  10. وعليكم السلام
    تذكرت الرياضيات ايام المدرسة كنت وايد احب الحصة لما نستخدم ادوات الهندسية رغم ان اللي ندرسه شي بسيط بس كنت استمتع .. واستمتعت لما قريت الموضوع صج يعطيج العافية وربي يوفقج بدراستج:)

    ردحذف
  11. تذكرت مادة اعلان صحفي كنا نرسم اعلانات ع الاوراق معينه اسمها ماكيت اهي مسودات صفحة جريده وفي مقايس معينه للاعلان وترتيبه والمسافه بينهم ..

    كان الوضع يبجي..

    تخخصكم دقيق..

    الله يوفقج يارب..

    ردحذف
  12. الأخت الفاضلة :: أم حروبي ::
    أسعد الله أوقاتك بالخير ..

    ما شاء الله تخصص رائع ..

    وعرضك لهذا الموضوع في مدونتك

    دليل على إبداعك وتميزك في تخصصكـ

    أسأل الله لك مزيدًا من التوفيق :)

    ردحذف
  13. ماشاء الله عليك ام حروبي فنانه ومبدعه وسوالفك ممتعه ومفيده .. جزااك الله خير ..

    موفقه يارب.

    ردحذف
  14. كابتن خالد
    مشكوور والله يوفق الجميع
    ____
    البطة
    هي الدراسة وااايد ممتعة يعني إذا حبيتي الشي بتبدعين ..وربي يعافيج مشكوره ^^

    ردحذف
  15. رورو
    ههه ضحكتيني (الوضع يبجي) ياما تعقدت من الرسمات واي غلطة تنحسب علينا ..مشكوره

    ----
    أستاذ محمد
    اي التخصص واايد حلو ..مشكور ^^
    أمين يارب

    ردحذف
  16. هلا رندااا
    لااا جذي أستحي ^^ مشكووره
    وحياج الله

    ردحذف
  17. ما شاء الله ...
    حلووو التخصص
    بس فعلا مثل ما قالوا الخوات جداً دقيق ...
    تصدقين عيبني ..
    عادي اتهور و أغير تخصصي لووولز:d

    بالتوفييج حبيبتي
    وهاا لا تنسيبن مخطط بيتي علييج:d

    ردحذف
  18. هلا وغلا بأميرتنا تو ما نورت مدونتي ^^
    اي وايد حلو ومتعب ويباله عيون هههه
    يللا تهوري أنا أنطرج خخخ
    ربي يوفقنا اجمعين
    افا عليج انتي جهزي الدفعه (66) خخخخ لا لا أمزح
    حياااج الله^^

    ردحذف

قال تعالى: (( ألم تر كيف ضرب الله مثلاً كلمةً طيبةً كشجرةٍ طيبةٍ أصلها ثابت وفرعها في السماء*تؤتي أكلها كل حين بإذن ربها ويضرب الله الأمثال للناس لعلهم يتذكرون ))إبراهيم 24-25