.,؛×~حق الليلة

السلام عليكم ورحمة الله وبركاااااته جميييعا ..اممممم اليوم بخبركم عن فعالية اشتركت فيها ^^

واللي هييي فعالية حق الليلة واللي معروفة في معظم دول الخليج بـ قرقيعان ..طبعا معظمهم يحتفل فيها في نص رمضان إلا نحن في نص شعبان ..خالف تعرف خخخ والله مادري ليش جذي ..المهم ..

عطوناااا الله يعطيكم ..بيت مكة يوديكم

يا مكة يا معمورة ..يم السلاسل والذهب يا نورة

عطونا من مال الله ..سلم لكم عبدالله

عطونا حبة ميزان ..سلم لكم عزيزان

تقريبا هذي الأبيات اللي معظم يقولونها وتختلف في معظم الدول ..

كانت الفعالية باسم: (من حق الليلة )

تاريخ الفعالية:(27-7-2012مـ) - (15 شعبان 1431هـ)

مكانها: السوق المسقوف بالشارجة ..واللي كان يسمى قديما بسوق العرصة ^^

قبل لا أقول شو صار في الفعالية ..حبيت تعرفون شوي عن سوق العرصة ..هاي صورة قديمة قبل لا يصير اسمه السوق المسقوف

هو عبارة عن سوق شعبي ..وطبعا تراثي

..سووله ترميم من فترة وعدلوا فيه وخلوا فيه تكييف ..وااايد حلو حق التذكارات والتمشي ..يعني للي يبون ياخذون تذكار من الإمارات ييون هني ^^..صور السوق للأمانة ماخذتنها من النت

المحلات اللي فيه ..منها محلات قماش ودراعات ومسابيح وإكسسوارات قديمة ..ومحلات السجاد وفرش الطاولات وفي محلات أحجار الكوارتز وااايد حلوة تقدرون تطلبون يحفرون أساميكم على الحجر اللي تختارونه ..وفي محلات اسماج محنطة مادري ليش بس من الموجود خخ

نبدأ بالفعالية ..وإنتوا تدخلون السوق في وسطه شي منامة ..وهي اللي صارت فيها أحداث الفعالية ..

بداية جمعنا اليهال كلهم في المنامة ,,وحلاتهم اليهال والله وهم لابسين اللبس التراثي المخاوير والثوب ^^

حسيييت كأني رجعت أيام أول ..وطبعا تشوفون الشيبة هذا الحكواتي حااامد ..يلس يخبر اليهال عن تاريخ (حق الليلة )

وغنوا اليهال عطونا الله يعطيكم بيت مكة يوديكم ^^

وحوالين المنامة في الزوايا الأربع كانوا حاطين لنا أكشاك عشان نوزع حق الليلة حق اليهال ..وعشان الكل ياخذ حق الليلة عطونا طباعة الياهل اللي ياخذ جيس نطبع على إيده عشان ماياخذ مره ثانيه خخ..بس شو استوى هجوم علي وعلى أخوي ..كل اللي نشوفه هالأيادي ..

استانسنا ..رغم إن المكان مكيف لكن من الزحمة صار حر لكن من الشغل والوناسة ماحسينا ^^..وهذول صور اليهال باللبس التراثي ..يا حلوهم والله ..هاي وحليلها حسيتها مصدومة ^^

وهذا محتوى الأكياس اللي نوزعها ..هالأكياس المنقشة للبنات ..الأولاد أكياسهم بيضا

وهذولا لابسين الطاسة والمرتعشة ..فديتهم والله ..حدهم بريئين ^^

وهاااااااااااي فديت روحها والله ..ماشالله عليها ربي يحفظها ..حبيتها بالبخنق ^^

هذول عيال مدري أحفاد الممثلة الإماراتية مريم سلطان ..شكله في حد مخوف الولد خخخ

وبعد فقرة الحكواتي كانت فقرة الأسئلة مع مقدم الأسئلة ناصر...اليهال طايحييين فيه أنا وأنا ..جان يقول: اللي يقول أنا ماراح أخليه يجاوب

وجان يقلبونها عمي عمي ..قاالهم: بععععد واللي يقول عمي ما بيجاوب بس اللي قاعد مكانه ورافع ايده وهو ساكت بيجاوب ..وفي بنوتة كانت ذابحتنه اناا انا قالها: ما بخليج آخر شي ملت ويلست ورا ..جان يقومها قال: كوني جي من البداية خخخ يحليلها ..لو تلاحظون على طرف الصورة ظاهرة الممثلة مريم سلطان ..

جانب من ا لجمهوررر.. يتابعون من بعيد كانوا حذالي وشكلهم مالهم خلق يجاوبون بس يالسين ..واللي لابسة الطاسة هذي كانت تتناقر مع ولدين توم خخخ وشوي يضربون بعض لو إني مو موجوده خخخ..ولا واحد من التوامين واقف على خشبة المنامة أقوله إنزل ولا بتطيح يقولي :شو يعني بطيح بطيح عليج ..واايد كان مشاغب خخخخ

وبعد ما خلصنا الفعالية وخلصت أكياس حق الليلة وزعناهم كلهم ..قعد شيبتنا الحكواتي حااامد عااايش الدوور أونه يتحرطم علينا خخخ تراه مو شيبة كله مكياااج لزوم الدور ^^

وأنا أطالع اليهال اإلا أشوف هذا حييياااتي شكله حلووو أقول لأختيي صوررييييه ..فديت خدوده الحمراااا ^^

وبعدين انصرفوا اليهال إلى ورشة تلوين الفخار ينثروون إبداعاتهم ^^

واااحد مندمج ..<<يا بنت الحلال خلي اليهال بحالهم ..خخ مافي حد ما قطعتيه

وهذي ..حق الليلة ..

ووووووووو خلصنااااا ..كاااان يوووم ممتع ..استانست واايد ..واسترجعت أيام الطفولة والخبال على الحلويات..وشفت براءة في اليهال من زماااان ما شفتها ..على رغم من شغبهم وتناقزهم مني ومناااك لكن حلووويييين فديت رووووحهم ..إن شالله استمتعوا بالتقرير ..

ملاحظة:كل هاي الصور من تصوير إختي يعطيها العافية

~ودمتم سالمين~

.,؛×~رسماااتي بالفحم

السلام عليكم جمييعا..اممم بما إني أحب الرسم والحمدلله الله أنعم علي بايدين حلوين فنانات بالرسم خخخ فاليوم حبيت أراويكم بعض من رسماتي بالفحم ...ممم أخبركم شي أنا من النوع لما أشوف صورة تعجبني أحب أرسمها وهني حطيت الصور ورسمي لها تقدرون تقارنون طبعا راح يبين إني أحيانا أغير الرسمة على مزاجي والدليل أول رسمة ..خل نبدأ باسم الله ..

الله يسلمكم هذي أساسا كانت صورة لبنوتة صغيرونة في الجريدة أنا رسمتها ومادري شلون لعبت يمين يسار جان تكبر خخخخخ وهاللي طلع معاي ..وطبعا لاحد يعلق على إيديها مادري شلون طلعوا معوقين هههه

وهذي الوردة كانت أول تجاربي في الرسم بالفحم وحبيتها الصراحة (^^)وعقبها الصورة الأصلية ..

الأصلية

اممم هالرسمة مادري شو قصتها ..بكبرها أسود في أسود ..لو تلاحظون البنت اللي بالصورة الأصلية لابسة بنطلون أنا لبستها تنورة خخخ

بكبرها الرسمة شخابيط عشان الغيوم

وهذي الأصلية ..يللا طلعوا الفروق العشرين ههههه

امممم وهاي رسمة ثانية ..تعتبر الرسمة مو كاملة لأني ما سويت الظلال ..أو بالأحرى سويتهم لكن مع الأيام الفحم يروح كل مرة أعيد اسويهم ويروح ..مايتم واايد ..يعني هالولد كم مرة حاولت أغمج الجاكيت ماله ويرد يفتح

الأصلية

وهذي الرسمة ..حدث ولاحرج ..أكرهها ..مادري شو حادني أرسم أم كشة هذي ..لا شعرها يضبط وعيونها وحده أكبر من الثانية خخخ شكلها جايسنها رمد خخ..السبب إن الفحم كان يلون العين كامل ..بمسحة وحدة الرسمة بكبرها تخترب

وهذي أم كشة ..

وأما هاي ..فالخلفية بس رسمتها من صورة ..أما اليهال فأنا رسمتهم من خيالي ..حبيتها ..بس حاولت ألونها واخربت وبالتالي تعلمت إن الرسم بالفحم يكون بس بالفحم ..بدون إضافة الوان ^^)..لاحظوا الولد اللوتي يالس يلعب صوب البنات ..حركات أولاد خخخخخخخ

وهذي الخلفية ..

وأخيييييييييييييييييييييييرا ..خليت the best for the last ..بما إني أعشق شي إسمه خيل ..فهذي تعتبر أحلى وأحب رسماتي ..ووايدين بغوا ياخذونها ..قلتلهم لا وألف لا ..وهاي ما رسمتها عن صورة ..لأني أحب الخيل كنت أبي أتعلم أرسم ودخلت النت وكان شي دروس لرسم الخيل وطبقتها ..وهذي النتيجة ^^..في رسمة ثانية والخيل تركض بس نسيت أصورها ..فبراويها لكم في تدوينة ثانية..شو رايكم ..مو أحلى رسمة !!

وجذي ..يكون معرض فن الرسم بالفحم قد إنتهى ..من زمان ما رسمت لا بالفحم ولا بالألوان المائية بخاطري أرسم ..وهذي الرسمات من زمان راسمتنها ...

ودمتم سالمين ~ِ

.,؛×~في مجلس الشيبة بوسعيد

ركض حرّوب متزعما صبية الفريج نحو الشيبة بو سعيد أو كما يناديه الصبية "بابا عود" فهو أكبر سكان الفريج ..رجل ذو حكمة ويستشيره الجميع في أمور حياتهم بمن فيهم حرّوب وشلّته ..

بوسعيد :ها شو أخباركم ..إن شالله بس مااأذيتوا قطاوة الفريج كالعادة

فنظر حرّوب وسعّود إلى بعضهما والشرر يتطاير من أعينهما ..فماكان من سلّوم إلا أن يخبر بوسعيد بما حدث

سلّوم:حروب فر حصى على كلب أخو سعوّد يقول إنه بسببه الملائكة ما تدخل الفريج

بوسعيد :اأها ..انزين ومنو هذوول الملائكة اللي تتكلمون عنهم؟

فتح حرّوب عينيه على وسعهما :باباعود ماتعرفهم ؟!!..ماما تقول إنهم دايما معانا ويحبونا

سعّود بخبث:أنا ماأعرفهم

أخذ الشيبة بو سعيد نفسا عميقا وقال :شو راي شبابنا الصغار يتصالحون عشان نعرف منو الملائكة

رغم العناد الطفولي الذي يستشري في الصبيين إلا أن فضولهما كان أقوى فتصافحا وتسامحا وأشار حرّوب للشلّة فتحلقوا حول الشيبة بو سعيد وبدأ بوسعيد :عشان نعرف منو الملائكة لازم نرجع ورى ،وماكاد بو سعيد ينهي جملته فإذا بالشلة يرجعون للوراء ..قهقه بوسعيد:لا لا إرجعوا بخيالكم وقلوبكم ..لكن مو نرجع سنة ولا سنتين ولا األف ولا مليونين ولكن نرجع لوقت نحن كلنا ماكنا موجودين فيه"حتى إنته بابا "قاطعه عبّود ..فنظر إليه الصبية بعصبية ..وأكمل :حتى أنا وأبوي وأبو أبو أبوي محد كان موجود لكن كانت هناك كائنات ومخلوقات نورانية لطيفة شكلها حسن كل اللي تسويه تسبّح لله تعالى ..كيف نسبّح ؟..ردد الصبية سبحان الله ..سبحان الله ..

بوسعيد :صح وكانوا يطيعون الله في كل شي ..كيف يعني ..يعني يسمعون كلامه صح يا سلّوم مو مثلك يشردون لما بابا يناديهم حق الصلاة ...نكّس سلّوم رأسه خجلا ..ثم أردف :تعرفون الآية ((يسبحون الليل والنهار لا يفترون ))(الأنبياء)هذي تتكلم عنهم ..وإذا بعبّود يقاطع مرة أخرى "بابا عود يعني هم مثلنا ؟" ..ونظر الجميع لبوسعيد ينتظرون الجواب للسؤال الذي دار بعقلهم جميعاً..ابتسم وقال :صبركم علي ..بييكم الخير ..هم مو مثلنا مثل ما قال حبيبنا ..ردد الجميع "صلى الله عليه وسلم "..قال (خلقت الملائكة من نور ) بعدين قال (وخلق آدم مما وصف لكم)..سيدنا آدم مخلوق من شو ؟..من طين صح!..أومأ الجميع بالإيجاب ...:الله خلق الملائكة بصفات غير عنا نحن فهم ما يغلطون وتفكيرهم نظيف ومنزهون من الميول النفسية يعني ما يحقدون ولا يحبون وما ياكلون ولا يشربون ولا يتزوجون وما ييبون عيال ..وبوسعيد يسرد صفات الملائكة فإذا بعيون الصبية تتسع شيئا فشيئا

حرّوب:ليش الله خلقهم كلهم بنات ما خلق أولاد منهم ؟؟

يصحح بوسعيد بحذر:لا لا لا ياحارب دير بالك أبد لا تقول إن الملائكة إناث تعرف يوم جي تقول يعني إنك كفرت بالله والعياذ بالله ..لأنك تقول مثل ما قالوا الكفار اللي ذكرهم الله في الآية ((ويجعلون لله البنات سبحانه ولهم ما يشتهون ))(النحل)..وبعد مايصير نقول إنهم ذكور لأنه ما عندنا دليل واللي يقول شي بدون علم نعتبره فاسق ..وطبعا الملائكة لكل منهم وظيفة يسوويها ..فهناك ملائكة للجبال والسحب والمطر ..تعرفون الدعاء حق البرق والرعد صح ؟

سلّوم:سبحان الذي يسبح الرعد بحمد والملائكة من خيفته

بوسعيد يحرك رأسه مستحسنا :وفي ملائكة كانت معاكم قبل لاتولدون تحميكم وملائكة للسؤال في القبر وملائكة تعذب أهل النار وملائكة تبني قصوركم إن شالله في الجنة ..وملائكة على كتوفكم تكتب شو تسوون سواء صح ولا غلط ..ويناظر الصبية على أكتافهم ..يقهقه بوسعيد ويكمل وهناك شي ملائكة الرحمة وملائكة العذاب وملائكة تحمل عرش الرحمن وتعمر السماوات واللي تسبح وتقدس الله سبحانه

حرّوب:ماشالله واااايد ..كم عددهم بابا عود؟

بوسعيد )): ومايعلم جنود ربك إلا هو))(المدثر)عددهم مايعرفه إلا الله لكن الرسول عليه السلام ولما عرج للسماء السابعة قال(فإذا بإبراهيم مسندا ظهره إلى البيت المعمور،وإذا هو يدخله كل يوم سبعون ألف ملك لا يعودون إليه )هذا يعني إنه عددهم كبير كبير وااايد ..وأزيدكم شي من الملائكة المرسلات عرفا ،والفارقات فرقا ، الملقيات ذكرا،النازعات غرقا ،الناشطات نشطا ،السابحات سبحا ،السابقات سبقا والسابحات سبحا والصافات صفا

يرفع سلّوم يده :بس بابا عود إنته قلت هم مو إناث عيل كيف مرسلات ونازعات هذا مؤنث

بوسعيد:شكرا سالم ..ذكرتني هذي كلها من باب تأنيث الجمع يعني طوائف وجماعات بس مو يعني إنهم إناث ..ومثل ما نحن عندنا شيخ حتى الملائكة لها رؤساء هم جبريل وإسرافيل وميكائيل ..منو يعرف وظايفهم؟

حارب:إسرافيل هو اللي ينفخ فالصور

سعيد:جبريل هو اللي ينزل الوحي

بو سعيد :وميكائيل؟؟..أنا بقول ..هو اللي ينزل القطر والمطر من السماء ..لكن جبريل له منزلة عظيمة عند الله تعالى فهو رئيس الملائكة والله تعالى وصفه بالأمانة والطهر قال عز وجل ((إنه لقول رسول كريم *ذو قوة عن ذي العرش متين *مطاع ثم أمين ))(التكوير) وذكره الله في كتابه باسم (الروح) مثل ((تنزل الملائكة والروح فيها ))(القدر) وذكر أنه نزل على رسولنا الكريم بصورته الحقيقية وله ستمية جناح ..وأحيان كان ينزل على حبيبنا وهو مع الصحابة على هيئة بشر مثل ما جاء حديث جبريل (طلع علينا رجل شديد بياض الثياب شديد سواد الشعر لا يرى عليه أثر السفر ولا يعرفه منا أحد )ومرات كان ينزل بصورة صحابي اسمه دحية الكلبي ..وجبريل عليه السلام نزل بعد على سيدنا إبراهيم عليه السلام ومعاه إثنين من الملائكة وسيدنا ما عرفهم وظن إنهم ضيوف فضيفهم لكنهم ما كلوا لإن الملائكة مثل ما عرفنا ما تاكل ..ونزل على سيدنا لوط عليه السلام وعلى مريم عليها السلام ((فارسلنا إليها روحنا فتمثل بشرا سويا))(مريم)..وتعرفون كيف عرفنا إن الله خلقهم قبلنا ..لأن الله سبحانه كلمهم وقالهم إنه راح يخلق سيدنا آدم من الآية ((وإذ قال ربك للملائكة إني جاعل في الأرض خليفة قالوا أتجعل فيها من يفسد فيها ويسفك الدماء ونحن نسبح بحمدك ونقدس لك ))(البقرة)..يعني الله عزل وجل قالهم إنه راح يخلق آدم وبعد آدم عليه السلام نحن يينا

والحين عرفتوا الملائكة..صمت يخيم المكان كان الصبية مشدوهون فارغي أفواههم فكل ما كانوا يعلمونه عن الملائكة هو أن الإيمان بهم هو ثاني الاركان وجبريل وإسرافيل عليهما السلام ..واستفاق عبود من صدمته "شو يعني ملائكة ؟"..وانفجر الجميع بالضحك

سعود:الحين بابا عود شو يقول من الصبح ..

بوسعيد :سؤالك حلو ..الملائكة مفردها ملك أو ملاك ..وهالكلمة تي من كلمة ألك ..يعني أرسل ..فهم الرسل والألوك يعني الرسالة ((الله يصطفي من الملائكة رسلا ومن الناس))(الحج)..اممم موجنه الوقت تأخر ولازم تجهزون حق صلاة المغرب ..ثم هرع الصبية ركضا نحو المسجد ..

.,؛×~أم حّروبي والرسم المعماري-الجزء الأول-2

-.،؛×~مهام ورسوم~×،,.-

السلام عليكم ورحمة الله وبركاته ..شحالكم عساكم طيبيبن..وأخيرا قدرت أخلص تنزيل الصور ..اليوم طبعا بكمل لكم اللي بديته عن تخصصي ..وأتمنى من اللي كانوا ينتظرون هالجزء يسمحولي عالتأخير ..طبعا نظرا لكثرة الصور راح أعفيكم من سوالفي الحلوة ^^

وبكتفي بذكر عنوان الدروس ..وشرح عالطاير ..بسم الله نبدأ (بعض الصور عبارة عن ورقة المكتوب فيها المطلوب منا وبعدها تيي رسماتي ..عشان تقارنون)

الدرس 1 :الخطوط والدوائر ..طبعا كل شي مرسوم لازم نسويه من الحدود إلى مستطيلات الاسم والرقم الجامعي و...

وكل شي محسوب المسافة بين الخط والثاني ..يعني حتى الخط المنقط لازم تكون المسافات بين الشخوط متساويه ..والمربع الثالث لازم نرسمه بزاوية معينة

التطبيق ..اسمحولي على الصور ترى مو كلها واضحة ..لانها بالرصاص

الدوائر ..ولو تلاحظون شي مربع فاضي هني نحن لازم نرسم شي من خيالنا بس لازم يكون فيه دواير

رسمتي..=)

هههه اسمحولي على الشخبطة ..ترى نحن عيال المعماري اي مكان نرسم مافي شي سلم منا ..لاطاولات ولا سبورات ولا شي

هني الله يسلمكم درس التحويل من ثلاثي الأبعاد إلى ثنائي البعد ..يعني لازم نرسم هالبيت كل واجهة بروحها ..

جهة ثانية من البيت ..

وهني نشوف كيف حولت البيت من 3D إلى 2D..تخيلوا كيف لما يكون عنا صندوق كرتون ونفتحه نفس الشي ^^

والحين نفس البيت اللي فوق ..لازم نرسم المخطط له من الداخل ..ومقطعه الجانبي

المخطط..

نظرة للمخطط عن قرب ..الشي المقوس هذي البيبان ..وبتلاحظون انه جزءمن الدري منقط ها يعني انه الدري يودي للطابق الثاني

وهذا المقطع الجانبي ..طبعا بتقولون شو هاي الشخبطة ..هذا الاستاذ مشخط لاني خبصت في رسم المقياس ..رسمت اي كلام هههه اعترف ماكان لي خلق رسمته في الحصة وكل مثلث شكل ..وطبعا هالشي عليه X كبيرة لازم ما أسوي اي كلام ><

نظرة قريبة ..وطبعا بتسألون ليش الخطوط المايلة هذا يعني انه الخام المستخدم هو الطابوق أو BricK..ولازم نرسمه بخطوط مايلة بزاوية وحدة وتكون الخطوط على مسافات متساوية

وهني الدرس العكس نحول من 2Dإلى 3D ..وهذا نموذج مبسط للتدريب

وجذي طلع شكله لما نحوله لثلاثي الأبعاد..طبعا في خط نسيت أمسحه سوى عليه إكس

وهني نطبق النموذج على نفس البيت اللي بأول البوست ..وطبعا هذي مسودة كيف بيكون ..أنا عنّيت روحي ارسم مخطط بعدين قالولي البنات انه كان معطنا الرسمه اللي فوق ..قلت عادي تدريب ^^

وهني رسمي ..

وهذا درس التلوين أو الطلاء rendering>>

وهني تطبيقي بالرصاص ..الاستاذ راسم سمايل على اللي سويتهم عدل خخ اونه يبي يسوي جو ^^

وهني بالحبر ..طلع روحي لين سويته لأن الحبر يقطر وينشر على الورقة ..الين تعبت كانت الساعة 3 الفير وابي اخلص لكن الاستاذ ثاني يوم قال ما بيحاسب لانه الا مايصير ..حبيته ذاك اليوم ^^ خخخ

وهني نطبق بعد على نفس البيت (اكيد بتقولون مافي غير هالبيت نطبق عليه ..حتى نحن كرهنا هالبيت من كثر ما رسمناه ><)..وهني الرسم مو على ورقة لكن على ورق خرايط اللي راويتكم اياه في البوست الاول ..أنا اخترت التنقيط ونقصني لانه قال كان لازم ازيد النقاط

وهني سويته بالرصاص واخترت الخربشة خخخ ماعرف اسمها بالعربي (scribble )>>كنت اقول للبنات خلو يهال اللي في بيتكم يشخبطون عنكم..وطبعا شوها اللي بالاحمر ..هذا استاذي يقول انه الشخبطة صعبة عند الاطراف

والحين آخر درس الا وهو الظلال ..هالمبنى اللي لازم نرسم ظله ..وعاد في هاي الحصة استوت مناقشات حادة بين البنات والاستاذ كل واحد يقول طريقة ..انا مافهمت شي جان اخذ الكتاب وارسم بروحي ><

وهني سويت الظل حق المبنى للحين اذكر هاي الرسمة ..الله يسلمكم وايد عقدت البنات ووايدات عادوا الرسمة فوق 3 مرات ..أنا بعد بس مرة مادري مرتين لانه وحده استاذي العزيز الله يسامحه شخبط على الاولى تشخبيط (هذا محد يسير ويسأله ويكون فإيده قلم لانه راح يدمر الورقة )..وهاي الثانيه ..وراويته اخر مره قبل لا اسلمها وشو استوى الاخ شخط عليها بالاحمر بتلاحظون الشخطة عند المبنى ..أنا وقف قلبي ودمعت عيني واذكر قلت Sirrrrrrr بصوت عالي وهو زاغ المسكين وتم يقول سوري ..والبنت اللي حذالي تقوله بالانجليز ياستاذ هذا احمر ..والاخ توه يستوعب انه ماسك قلم احمر ..قال ماراح يشوف الشخطة قلتله غصبا عنك اصلا ماتحسبها (تراه اجنبي مادري اذا فهم شو قلت )

وهني امتحان نص الكورس ..اول صفحة اختياري لازم نحط الحرف الصحيح حق الواجهة الصحيحة المطلوبة ..

وهني الجزء الثاني من الامتحان وهو تحويل من 2D إلى 3D..شوفوا فهمتوا شي !

وهني المبنى من الجوانب ..طبعا أنا أول ما استملت الورقة بلّمت (0.0)..يلست نص ساعه اتخيل كيف المبنى ..وكان جدامي 3 ساعات عشان ارسمها

وهذا اللي طلع وياي ..شي لاباس فيه حتى الاستاذ قال كبداية وصلتج الفكرة وكنتي تمشين صح ..

ولما استلمنا نتايج الامتحان وزع علينا الحل أو الرسمة اللي المفروض نرسمها ..منو تخيلها صح!..من بين 5 فصول رسم بس 3 طلاب قدروا يخلصون الرسمة في الوقت المحدد ..وطبعا كان في ظلم في الموضوع لانه في فصول عطوهم ساعه زيادة..

خخخخخ عاد توني اقول ما بسولف ..شو اسوي لازم اقول شو استوى خخ ولا ماصير أم حروبي ..واسمحولي عالإطالة ..والبوست القادم راح يكون عن مشروعي النهائي لمساق الرسم المعماري ..متى الله أعلم

إن شالله تكونون استفدتوا واستمتعتوا ^^

ودمتم سالمين ~