هذه المدونة تخضع لقانون حماية الملكية الفكرية الذي ينص عليه القانون الإتحادي رقم 7 لدولة الإمارات
"لذلك يمنع نقل وتداول أي من محتويات هذه المدونة دون إذن من مالكها "
.?. هاجس اللحظة .?. هنا تجد الكثير مني

 

الثلاثاء، 25 يناير، 2011

.,؛×~أم حروبي ومساق التمهيد للهندسة المعمارية

هلا بالحلوين شخباركم شومسوين ..للي خلص امتحاناته وبطالي شراتي أقول شلون الإجازة واللي بعدهم فامتحانات يارب يسهل عليكووووم والله يبشركم جميعا بالنتايج الحلوه مثل ما بشرني ...ما تصدقون شلون فرحت لمن شفت درجاتي حسيت صدق "إن الله لا يضيع أجر من أحسن عملا"..الحمدلله تعبت ونلت ...ياربي يفرحكم مثل مافرحني ياااارب :)
ندخل في الموزوع على قولة رورو ^^
أدري مقصرة وااايد في بوستات الهندسة ..ماكنا ناخذ نفس فقلت لازم أنزل شي عن الهندسة 
اليوم راح أخبركم عن مساق اسمه "مدخل للهندسة المعمارية" هالمساق كان المفروض آخذه قبل الرسم المعماري لكن مشكلةالجامعه وعُقدها اللي ما تخلص ..فخذته هالكورس ..هو عبارة عن شي من كل شي ..يعني يتكلم عن الهندسة المعمارية بشكل عام شو فيها وشو مافيها الرسوم الهندسية والتجارة وهالأشياء ..كل تخصص لازم يكون في مادة جذي تتكلم عن التخصص بشكل  عام...انزين ...من ضمن الكورس كان مطلوب منا واجبات >>>أكيد واجبات عيل شنو أنزين نبدأ..كان عندنا أربع واجبات كل واجب عن درس معين ..
الواجب الأول كان عبارة عن رسم سكتش لبيتنا ..بغيت أحط الصورة لكنها مو عندي وما صورتها ..
فننتقل للواجب الثاني ..طلبت منا المدرسة نرسم سكتش حق صورة من الصور اللي موجود فالبوربوينت..فأخترت هذي الصورة ..وهي بصراحة مادري شو الدرس كان عن خلفية تاريخية عن العمارة ..
هذي الصورة عن العمارة في عهد المصريين اللي ركزت على شكل الهرم لأنه أكثر الأشكال استقرارا..ولأن المصريين كانوا يؤمنون بالحياة بعد الموت بنو قصورهم على شكل إهرامات عشان تكون بيوت العائلة المالكة بعد الموت
(مادري شياب لياب بس هالمكتوب بالسلايدات ومادخل مخي )
..شيخص الهرم فالموت ماعرفش واللهِ..
المهم هذي الصورة تمثل
funerary temple  
ماعرف اسمه بالعربي بالضبط بس ترجمتها المعابد الجنائزية أوشي من هالقبيل يعني شي يخص القبور والدفن 
وهذا قبر فرعون اسمه Bani Hasan Mentuhetep 
بالعربي بني حسن بعد شي خخخخ دورته اسمه بالعربي ما حصلت 
وهو حكم في الفترة  (2061 BC – 2010 BC)
..صدعتكم أنا بعد صدعت المهم هاي الصورة 




وهذا السكيتش اللي رسمته :)


ثالث واجب كان مطلوب إن نرسم بايدينا مخطط الدور الأرض لبيتنا ...وأنا طلعت مخطط بيتنا ويلست أنقل خخخخ وعدلت على كيفي 
وهذا الرسم خلصته دقايق قبل ما نسلمه ^^


الواجب الثالث مطلوب نختار أي صورة لأي مبنى ونرسمها حسب قانون Golden Section ..وهذا يباله شرح يمكن اشرحه لكم بعدين إذا تبون ...



وهذا السكتش ..رسمته على أساس ثلاث Golden Sections ..يعني الرسمه مقسمة ثلاث مرات ...هممم بعد التفكير شكلي بحط بوست عنه ..وايد حلوه فكرته وتصدقون حتى جسم الإنسان مقسم على أساس هالقانون ..بشرحه لكم في بوست منفصل :)


خلصنا الواجبات ننتقل للجزء الثاني ...زيادة عالواجبات مطلوب منا نرسم خمس سكيتشات حق أي شي نبغيه ..بداية الكورس المس خبرتنا وأنا طنشت مار سمتهم إلا قبل التسليم بيومين خخخ شغاله سهر أنا ...انزين أنا يوم قالولي بنسافر تركيا قلت فرصة برسم السكيتشات هناك أكيد في أشيا حلوه تنرسم ...وهناك كل ماشوف مبنى حلو اصوره اقول برسمه بعدين ..فكل سكيتشاتي كانت عن تركيا 

السكيتش 1: غرفة في موفندق تقدرون تقولون نُزُل أكثر عنه فندق ..وهذا سالفته سالفة بخبركم عنها في بوست تركيا ..


وهذا السكيتش ..البنات وااايد حبوه ^^


سكيتش 2: وهذي صورة غرفة فندق اسمه الميييرا كرهت الفندق ><
ترى فيني حرقوصه ابي اقولكم سوالف تركيا ...مشوها بعدين بتعرفون 


وهذا السكيتش ..أنا أشوف السكيتش وايد عادي ..مادري ليش البنات حسسوني إني راسمه الموناليزا خخخخخخ


سكيتش 3: وهذا كان قريب من مسجد آيا صوفيا ...




والسكيتش بتاعوه ...أدري في شي عوي بس عادي سكيتش :)
أكثر سكيتش تعبت عليه 


سكيتش 4: وهاي غرفة بفندق ثاني ..ماعرف شسمه 


السكتش ماله ..هذا بعد تخبلوا عليها لبنات ماعرفش ليه 



وأخيرا ..سكيتش 5 : مسجد من مساجد تركيااا تعقدت لين رسمته 


زا سكيتش فور ات 


وأخيرا ..بنهاية الكورس ..كان عندنا بروجكت ..اللي هو عبارة عن نختار مهندس على كيفنا ..ونسوي عنه بوستر بحجم A3
نكتب نبذة عنه ..وفلسفته المعمارية ..كنا مجموعه من ثلاث بنات ..البنات كان عندهم عادي يختارون اي احد فأنا أخترت نورمان فوستر مادري لأني قريت عنه شوي وتعجبني مبانيه فحسيت دام إني أعرف عنه بيساعدني في المشروع .من سمعت عن البروجكت وأنا عرفت البوست شلون أبيه ..مع خبرة البنات اللي وياي وترتيبات هاللي طلع لنا ...واااايد حبيته ^^
نورمان فوستر معروف عنه إن تصاميمه غريبة ..فهاللي تشوفنه شكله جنه صاروخ عبارة عن برج مكاتب ,,والصورة اللي تحت هي معرض الإمارات اللي بشنغهاي ...شكله مستوحى من التلال الرملية ..



وبس ...هذا هو المساق ..كان سهل وحلو خفيف حبيته :)
إن شالله البوست  الياي عن تركيا ..
ودمتم سالللممييييين ~

هناك 25 تعليقًا:

  1. حلو ماشاءالله ..

    احب المواد اللي فيها انجاز :)

    وخوش موزوع خخخ ..

    موفقه يارب..

    شوقتيني ع بوستات سفرتج ناطرتهم :)

    ومرسي ..

    ردحذف
  2. ماشالله الصور والرسمات روعة .. وان شالله بتكونين مهندسة معمارية فنانة ..

    تعريف السكتش بمعنى ادق هو رسم من خلال اليد وبدون استعمال الادوات الهندسية ..

    احتمال كبير تكون المس تبيكم تتدربون على اتقان الرسم بالحر .. حاولي ترسمين الاشيا بدون استخدام مسطرة .. مهاراتج بتصير افضل ..

    فوستر اعتقد مصمم برج الفيصيلية بالرياض .. وايضا في برج عندنا بالدوحة مصممه

    الله يوفقج ..

    ردحذف
  3. هلا ررورو
    هيه المواد ما تكون ممله لمن جذي نسوي
    ترقبي البوست الياي ^^

    ردحذف
  4. هلا عبدالله
    شكرا على كلامك ..إن شالله
    هيه هم ركزوا نهم يدربونا على السكيتشات لأن كثير من الطلبه بدوا يعتمدون على الكمبيوتر ..فشددوا على هالموضوع ..
    بس السكيتشات اللي راسمتنها كلهم رسمتهم بدون مسطره
    ماعندي فكره عن برج الفيصلية بس هو له تصاميم هنا بالخليج ..
    حياك الله ~

    ردحذف
  5. وناسة

    احسها مادة مشوقة يعني ما تملين منها بسرعة

    هو اكيد بتملين لان اي شي فيه دراسة يملل خخخخ

    ناطرين بوست تركيا :)÷

    ردحذف
  6. السلام عليكم
    اهلين ام حروبي

    بقولك شي ,, بما اني احب العماره
    والله استمتعت واااااااااااااايد وانا اقراه
    وتحمست اني اشوف لي اي ملجأ ادرs فيه هـ التخصص
    بس يالله ندرس اداره وبعدين يصير خير << متحطم شوي

    اول شي بقولك صوره عامه عن المساق
    كله استفهامات واشياء مجهوله
    هههههههههه اتغشمر ,, بس شوقتيني حيل
    لي اشياء وايد منها Golden Sections
    و رحله تركيا ,, انتظرها بفارق الصبر
    لكن هاهـ اوعي تكونين مشغوله وتسوينها
    خذي راحتك احنا ريضين ونستنا ^_^

    //

    هذرتي وايد اممممم بعلق شويه عن خاطري
    السكيتش1 : الي فيه الكرسي
    والله ابدعتي فيه ,, يازلي واااااايد
    وحمستيني اشتري ادوات رسم

    سكيتش2: اقولك ليه جنج راسمه موناليزا
    لانها دقيقه ومرتبه والغرفه راقيه
    فا طلعت خطييييييييييره والله

    البروجكت : وناسه احب هـ الشياء
    احس اخر الانجازات نسوي كذا
    عشان الشهره ,, مدري وش اقول
    بس اقصد شي يونس << خبل
    والرسام الي اخترتيه ,, حبيته والله
    ودي اطلع عليه ^_^

    //

    اخر شي ,, بقولك اسف ع الاطاله
    وياني فرحان لج بالدرجات الحلوه
    بالتوفيق دوما يا اختي

    وتقبلي طلتي البسيطه << اي هين بسيطه هههه

    ردحذف
  7. لوول انا بعد تعبت بس ماادري ليش خذيت c+

    لوول لا تروحين تقرين البوست الأخير بليز ههههه

    موفقة يا وخيتي

    ردحذف
  8. مررحباً بالحلووين

    وين السجاد الأحمر ؟
    ليــش ؟!!

    لأني مخلصة اليوم , لازم على الأقل أحد يستقبلني أستقبال حلو ويخليني أصدق أني خلصت

    ؛))

    والله أشتقت لكل المدوناات , وفيني نقص زيارة للجميع , بس إن شاء الله بعوض الحين ^^

    أممممم والله موضوعك يونس ؛)

    ورسمك ما شاء الله جميل جداً ومرتب

    أجل تقولين ما أستخدمتي المسطرة **

    ماشاء الله عليك , عيني عليك سكر ؛)

    خلاص أجل , إذا إن شاء الله خلصتي دراسة وصرتي مهندسة أد الدنيا , معزومة السعودية تسوين لنا شيء إبدااع من تصميمك ؛)

    بإنتظار بوست تركيا ,,

    كووني بخير يا غالية ..

    ردحذف
  9. تسلم إيدج أم حروبي
    ما شاء الله إبداااع

    موفقة حبيبتي :)

    ردحذف
  10. هديل
    اي كان ماده على قولتهم interesting:))
    وماكنت وايد اعبرها خخخ بس على اخر شي =))
    ان شالله يتم التحضير ..
    يسلملي مرورج

    ردحذف
  11. هلا بدحوم
    افااا ليش مادخلت عماره ..ماعليه تعوض بعدين


    the golden section
    احسه حلو وبيفيدك وايد ..خصوصا انه معظم العماير وحتى اللوح الفنية تنرسم على أساسه ..فإن شالله الله يقدرني واشرحه في بوست منفصل :)

    صورة الكرسي عاد يلست لها يلسه لأنها اول سكيتش وكنت متحمسه :D

    بتاعه الموناليزا يمكن عشان جذيه :-*

    أعمال نورمان فوستر وايد تعجبني ..دور عنه

    لا اطاله ولا شي بالعكس تعليقك ونسني ..والله يبشرك بالنتايج الحلوه (:

    ردحذف
  12. ducati
    تقولي تويتر كلاس وتعبت ما يتوالمون خخخخ
    ماعليه المره اليايه أحسن إن شالله
    موفقين أجمعين 8-(

    ردحذف
  13. درب درب
    مدرسة الرياضيات الحلوه يت ...وخلصت الامتحانات وقريبا بتتخرج
    ونااااسه التخرج
    ونحنا اشتقنا لوجودج يا حلوتنا
    شفتي ايدي المسطره :x

    افااا عليج نسوي احلى برج حروبي في الدنيا خخخ

    لا تحرمينا من وجودج يا سكر :))

    ردحذف
  14. أمواج
    ويسلملي وجودج
    :D

    ردحذف
  15. شكلي حبيت الهندسة والرسم والتخطيط وكل شي ;) من شغلج الحلو ..
    تبارك الرحمن
    الله يحفظج ويوفقج

    ردحذف
  16. bookmark
    يا هلا ويا مرحبا
    اي والله الهندسه حلوه وحبيتها:p ..صح تعب لكن الشغل النهائي يروح كل التعب
    امين اجمعين ^^

    ردحذف
  17. صفحات ملطخة بحروفي
    يا هلا تو ما نورت مدونتي :)
    شوكرااان ^^

    ردحذف
  18. تدرين عاد انا لو ماكنت مهندسة كهربائية لكنت اخترت هندسة العمارة .. لأنها هندسة جميلة جداً وراقية وفيها فن :)

    ردحذف
  19. الأخت الفاضلة :: أم حروبي ::
    تحية عطرة معطرة
    أسأل الله لك التوفيق في حياتك الهندسية
    ورسوماتك ما ألوم زميلاتك إذا تخبلوا عليها :)
    أطيب الأمنيات

    ردحذف
  20. هلا أبرار
    أجل أجل I Agree :))

    منوره :)

    ردحذف
  21. مرحبا أخ محمد
    آميـــــــــــــــن :D
    شكرا

    ردحذف
  22. السلام عليكم
    الصور وكلج حلوو الله يوفجك ..

    ردحذف
  23. أجد حقا الهندسة والعمارة الموضوعات الكبرى للدراسة. في الوقت الحاضر هناك الكثير من الابتكارات في هذا المجال التي يمكن أن تساعد الشركات على الاطلاق في المستقبل.

    ردحذف

قال تعالى: (( ألم تر كيف ضرب الله مثلاً كلمةً طيبةً كشجرةٍ طيبةٍ أصلها ثابت وفرعها في السماء*تؤتي أكلها كل حين بإذن ربها ويضرب الله الأمثال للناس لعلهم يتذكرون ))إبراهيم 24-25