هذه المدونة تخضع لقانون حماية الملكية الفكرية الذي ينص عليه القانون الإتحادي رقم 7 لدولة الإمارات
"لذلك يمنع نقل وتداول أي من محتويات هذه المدونة دون إذن من مالكها "
.?. هاجس اللحظة .?. هنا تجد الكثير مني

 

الثلاثاء، 1 فبراير 2011

.,؛×~أم حّروبي في تركيا(1)



السلاااااااام عليكم جميعا ...وأخيرا قدرت أجهز تقرير تركيا
أعذروني عالتأخير لكن الصور شوي عند اختي شوي عندي
ويبالي أعصر مخي عشان أذكر شو سوينا خخ ..يللا نبدا باسم الله
تنبيه >>ترى البوست طويل 

السفره كانت من تاريخ
 11\11\2010 – 19\11\2010
خطة السفرة كانت ننزل في مطار أتاترك في أسطنبول الأوروبية  من المطار على طول  إلى كابادوكيا 10 ساعات براً و تمينا فيه يومين
 و بعدها 10 ساعات براً  باماكولي يومين
و 4 ساعات بورصة براً  3 أيام
ساعتين براً  اسطنبول يومين
السفرة كانت جدا متعبة ..خصوصا أول الأيام لأنها كلها بالبر ..شي رحلات داخليه بالطيارة لكن نحن اخترنا برا أرخص وغيرها تشوفون كل شي وتستمتعون بالجو
 من مطار دبي الدولي عن طريق الطيرآن السنغافوري ،، الحجز عن طريق الإنترنت لكل شي من حجز الطيارة و الفنادق و طبعاً خذنا باكج لـ 6 أشخاص ..أو بالأساس كان الباكج اللي محصلينه لأربع أشخاص فقط وكانت تذاكرهم ب1200 والإثنين الباقين اللي هم أنا وأخوي الصغير دايما منحوسين فالسفرات فتذكرتنا كانت ب1500 دايما تطيح بروسنا نفس يوم رحنا قطر السنة اللي طافت أنا وأخوي ماقبلوا هويتنا حسينا انا نحن بدون اهئ اهي ..ماعلينا نكمل
الطيران السنغافوري كان مرتب وحلو وراقي الخدمة 10\10 يهتمون فيج عدل ..طبعا في طريج الروحة لتركيا طلعنا من الإمارات الساعة 4:30 الفير وكنا منهدين وأنا كنت مداومة الصبح بالجامعه وكانت رحلة اربع ساعات يلسنا فالطيارة وبخيناه رقاد خخخ..لين وصلنا تركيا الساعة 9:30 بتوقيت الإمارات..نزلنا المطار خلصنا الإجراءات ..أحلى شي رايحين لسطر المواطنين التركيين واللي كانوا معانا بالطيارة يتمصخرون علينا واحد قال "طاعوا راحين مكان التركيين "..عباله بنتقفط أبوي محد يقفطنا مشونا عادي أحلى شي الموظف التركي وكيف ينادي أسامينا يضحك راشد يقوله راشييد ههه
المهم ..طلعنا الجو كان لطيف <<حلوه لطيف
يعني بارد أحسن من جونا بالإمارات ..
وكان بانتظارنا إدريس مرشدنا السياحي
ركبنا الباص ..متجهين لكابادوكيا الموجوده في تركيا الأسوية
وصلنا للباخرة وشحنا الباص معانا في الباخرة وركبنا فوق ونااااسه أول مره أركب باخرة ..الجو جمييل وفي ناااس حلوين خخخخخخخخخ لاحد يقول لأبوي إني قلت جذي خخخ وطلبلنا إدريس شاي حمر ..أنا ماحبه أبي كرك زين ما صحت عليهم هناك أبي كرك ..تحملت فراقه اهئ اهئ..
هذي صورة برج يسمونه برج العروس او شي من هالقبيل 
وهذا مسجد آيا صوفيا يلوح من بعيد

وصلنا تركيا الآسوية ومنها ركبنا الباخرة مره ثانية  طلبلناإدريس سندويتش جبن ..من كلامه حسسني إنه السندوتش وااو يقول أونه ما بتشبعون منه أخر شي طلع صمون جبن عادي محطوط بالتوست هاللي نسويه في عصريتنا خخخ
الجووووباااارد وجميل ..وشوي إلا نوارس فوقنا قاموا خواني يأكلونهم خبز ..يخوفون كباااار وايد ولأن نحن في الباخرة فوق كانوا وايد قراب منا يعني لو ترفعون ايدكم جان كلوا ايدكم خخخخخخخخ
شوفو هالنورس شكله ماله خلق خخخ
وصلنا يلوا لأن إدريس كان عنده شغل هناك في مكتب أخوه مال عقارات ..يلسنا في مكتب أخوه وتم يكلمنا عن الأوضاع السياسية التركية بس ما بصدع راسكم فيها ..يابولنا تركش كوف وأنا ما قدرت أرشفه حتى مررررر المهم بعدها طلعنا وكملنا مشوارنا ..><
المهم بعدها حركنا ..عشان نسير كابادوكيا..مرينا على أزميت وأنقرة بس ما وقفنا عندهم ...وهناك في الطريج السريع كان شي مطعم..هذا طلبنا


..وتمشينا قريبه كان شي محل يبيع خرابيط خخخ ..صلينا وكلمنا...وقريب المغرب وقفنا حذال مطعم ثاني عشان نريح لأن السفرة طويلة ..وقتها أظن كنا بأنقرة طلبنا مشروبات ساخنة وانا اهئ اهئ بما أنه ما شي كرك طلبت نسكافيه أقرب شي حق الكرك
وهني زاوية من المطعم يبيعون تذكارات 
 خخخ.ولا مالالمطعم يرمس إدريس بالتركي ..ياخذ تفاصيل عنا ..إدريس يقول هم جذي أي حد غريب يشوفونه لازم يسألون من وين ياي وليش ياي ولين متى بيتم ومنو معاه ..تحقيق يعني...وقتها كاااااااااااان الجو بارد حده ..وأحلى شي أنهم غسلوا الباص ..على قولتهم نوع من الضيافة مو هني ماشي ببلاش خخخ ..كملنا طريجنا ..وظلمت الدنيا والكل سطل ..إلا شوي أخوي الصغير يزاعق ..شهاب شهاااب ..الكل تم يطالع وكل واحد يتمنى فقلبه خخخخخ ..آخر شي طلع ليت تنبيه الطيارات يضوي ويسكر ههههههه..مالومه مسطل خخ..المهم وصلنا ..كابادوكيا (كلمة فارسية سمى المنطقة الملك الفارسي وقت ما كان في تركيا وهي معناها nice horse place)وكان بالليل ..ويلسنا ندور على فندق اللي حاجزينه ونلف نلف ..في سكيك جديمه ومهجوره في قرية اسمها ارقب(يعني الصخرة)..ونسأل إدريس وصلنا وصلنا ..وكل واحد يسأل الثاني كيف فندق خمس نجوم في هالسكيك ..اخر شي قال حصلناه ..دخلنا سكيك ضيق بالزور دخل الباص فيه ..وشفنا العم فاروق اللي بيودينا الفندق (للحين الأمور شبه طيبه )..ومشينا شويتين إلا يقولنا هذا هو ..نحن نطالع اللي يقولون إنه فندق ونطالع بعض ونحن هلكانين كان بيت عادي
هذا شكله الصبح
من فوق
جناح شهر العسل خخخخ حسسني اول شي كان بيخلينا انا خواتي بهالغرفه نحن قلنا نونو 
 قلنا ماعليه يمكن داخل غير ..ودانا وقال هذي غرفتكم ..نحن زين ما صحنا ولا كهربا ولا نت ولا ماااي حاااار ولا حتى دفايه والجو باااااارد ياناس ..
جانب من الغرفة لايغركم التلفزيون ولا الثلاجة ترى ما يشتغلون خخخ
.ولا أحلى شي ننطر اييبون شنطنا ..آخر شي يقول ايبوها بروحكم مافي غير فاروق يشتغل هني ..نحن هني تذكرنا السفاح اللي يحبس ناس داخل بيته وأونه يخدمهم ويسوي كل شي بروحه وآخر يجتل واحد واحد ههههههههه متأثرين بالأفلام الأجنبية ..سلمنا أمرنا لله ..وأختي اللي حاجزة تحاول تدور الفندق فالنت تقول والله مو هالفندق اللي أنا حاجزته ونحن أصلا ما نعرف شو السالفه اختي وحليها هي مسويه كل الحجوزات ..ورقدنا ونحن لا متسبحين وميتين برد..حتى ماشي كهربا نجرج فوناتنا...
نشينا عشان الريوق وأخيار وصل الماي الحار وسبحنا والكهرب وصل بعد ولامنظر الصبح من الدريشة روووعه
 ..وهدينا شوي على أساس نتريق وبعدها يفسحنا العم فاروق ..
هذا الريوق..انواع مختلفه من المربى المحلي..توت فراولة مشمش ورد..
والجانب الاخرمن البوفيه الصباحي :)
هذا ريوقي
طلعنا مشي في الحي مالهم ..
حبيت هالصوره ^^


كنت أشوف هذا على البيوت ..سألت فاروق قال تدفئه بالمازوت على ماظن
وهذا العنب اللي يسوون فيه الخمر (استغفر الله)
حبيت سالفة المشي وشفنا عيوز شايله خبز صورنا وياها
..وبعدها ركبنا الباص وصلنا للجبال اللي مشهوره بها كابادوكيا
شي المنظار تحطون فيه عمله وتشوفون 
وهذا العم فاروق وجبال كبادوكيا 
 ..شكلها غريب وأي تذكار من هناك لازم تكون فيه صورة هالجبال..


وبعدها نزلنا وكلمناها ثلاثه كيلو مشي في روز فالي اللي هو وادي الجبال هناك تتلون حسب المواسم فالصيف بيضا والشتا حمرا من المطر وجي...ويلس العم فاروق يخبرنا وكل شي يقوله اسجله فالنوت ...الطبيعة وايد حلوه ..
ونحن نتمشى شفنا هالدراجة اخوي ركبها يستهبل 
وهني داخل شبه كهف حصلنا ماي يطلع من الجبل ومعاه معدن برتقالي اظن نحاس
ومرينا بمكان كنيسه قديمه هذي هي
 ركبنا داخل شي مثل هاي الرسوم
ومرينا على بياع عصير رمان شربنا عصيرالرمان بالتركي يسمونه أنار ..
عصيرنا ^^
طعمه مر على حلو





وكلمنا وشفنا اثنين شياب يبيعون مكسرات ..
كان معاهم جلب عزكم الله لونه اسود يخوف 
ونحن نتمشى وااايد شفنا مثل هالصوره حفر في الجبال لما سألنا العم فاروق 
قال هذي بيوت للطيور ..قبل كان الريال لمن يبي يتزوج يسألون كم بيت للطيور عنده 
الي عندهه ست بيوت طيور هذا يعني غني وقوي ..لانه شغله تحفير الصخر مو سهله 
جان زين عندنا جذي خخخ




وبعدها رحنا مكان ثانيه فيه كهوف قديمة
هذا جانب من البيوت الجديمه


في الجبال ومحلات قماش وخزف هناك و نحن نتمشى الكل مستغرب ويسألنا انتو عرب ..لان المنطقة مايونها عرب ابدا كله اجانب فكان شي غريب ..صار موقف فشلني ..كان واحد تركي يبيع قماش يشوفنا نصور يقول ما تبون تصورون واحد تركي ..انا وقفه متر بعيد عنه واتصور جان يقولي قربي زياده انا بعد مسلم اونه على اساس ما بيسوي لي شي خخخ انا ويهي احترق ..
هذا هو 


 خذنا أسكريم على اساس نسير محل خزف ..وصلنا وصاحب المحل اسمه صايم تم يرمسنا عن الخزف وانواعه


وماشالله شغلهم وايد حلو ..


وبعدها سوولنا عرض صنع الخزف


 واخواني واختي سووو خزف اي كلام خخخ ما يعرفون يسوون وضيفونا شاي ..وشرينا كم شغله من هناك ..وبعدها انطلقنا ورحنا تغدينا في مطعم بدون اسم خخخ
 كان بوفيه ..وهذا غداي 


 نروح متحف ...وصلنا المتحف ..هو مادري متحف نفق ممر 63 متر تحت الأرض..او يقولن انها مدينة تحت الارض..


لما تدخلون لازم تنزلون روسكم الانه مثل متاهه وشيقه وحررر ونمشي بسرعه بسرعه مادري ليش العم فاروق مستعيلنا ونحن نضحك كل شي بسرعه بسرعه ...



اخر شي خلصنا تمشينا
ورى المتحف


 فالسوق القريب ..


ماذكر اذا فهالمكان ولاغيره بس حصلنا هالشيره معلقين عليها عيون الحسد ..هالعيون وين ما تسيرون تركيا بتحصلونها ..حتى باسطنبول على الارض مع الانترلوك محطينه 



وردينا الفندق...قريب المغرب ...ركبنا فالفندق او النزل اصح ...ركبنا فوق


 وشربنا شاي ونحن نستمتع بمنظر الغروب هناك


..منها ريحنا وصلينا وقلنا نتمشى في سوق القريه


بعدها نتعشى في محل المكسرات طفحنا من كثر ما يخلونا نجرب مكسرات وحلويات ولزمو علينا نشرب شاي التفاح بس كان لذيذ ..


تمشينا شفنا محل وحده ترسم على الماي يلسنا نشوفها بعدها قلت أنا أبي اسوي رسمت على الماي وانا ايدي ترجف ..الشكل طلع معوق خخخخ ...تصورنا معاها اسمها غولر يعني ابتسامه
هني ترسم على الماي
تنشف الرسمه
وهني توقع على رسمتي :)

وكملنا ..بعدها دخلنا مطلعم وطلبنا شوارما ..


وردينا الفندق ..كنا نتناقش اذا نسير المنطاد ولا لا اخر شي طلع وايد علينا لو كربنا بياخذ منا ست الاف درهم فهونا ..ثاني يوم نشينا الصبح وتريقنا ولاجو توه بدا يحلو وتغيم الدنيا ..ونحن تحسفنا لانا بنروح عن كبادوكيا ..حبينا المكان وااايد صج عشنا اجواء تركيا ..جان يقول انتو ييتو والجو الحلو ياا والحين بتروحون وصار الجو موحلو ..نحن استغربنا نحن نحب الجو المغيم ..اخر شي قالوا انه لما الجو جي يصير هم يتبهدلون ...لانهم قرى والمطر يخرب شغلهم ولازم يجمعون الحطب ويشترون المواد اللي يحتاجونها عشان ما يطلعون من البيت واشغالهم تتعطل ....وجذي ودعنا كابادوكيا الجميله وانطلقنا إلى باموكالي 


تعبت البوست وايد طلع طويل بكمل لكم بعدين إن شالله استمتعوا ...حقيقة في سوالف وايد بس مامداني احطها ..انتظروا الجزء الثاني >>متى الله أعلم خخخ
الصور من تصوير أختي وأخوي وأنا ^^
يلا سي يو كوم  حبايب ألبي 

هناك 21 تعليقًا:

  1. وااااو
    المكان حدّه بسيط وعجيب ،
    شكلها كانت رحلة ممتعة ..
    عليكم بالعافية =)

    ردحذف
  2. روعه :))

    الصور جميلة جداً وصادقة ومعبره نقلتي الينا صوراً من الحياه الحقيقية في تركيا بأعين أهلها وعلى الرغم من التعب وطول الرحلات البرية الا انها تستاهل العنوه :)

    متشوقة لقراءة البقية :)

    ردحذف
  3. ونااااااااسه مشالله تبارك الرحمن على هالطلعه الله يهنييكم صج صج وناااسه شوقتييني اساافر ودي اللحين ارووح

    مشالله الله يهنيكم السكن حيييل كان بدائي ما تضايقتو منه ماكان برد بالليل
    ودي تعلمينا شنو السلبيات علشان استفيد

    ردحذف
  4. مع ان البوست طويل بس حييييل استمتعت وانا اقراه

    خصوصا ان ودي اروح تركيا

    فدتيني باشياء

    يلا ناطرين الباجي :))

    ردحذف
  5. حلو ماشاءالله..

    متابعينج :)

    ردحذف
  6. سفره ممتعه

    غريبه الرسم على الماء مافهمت فكرته

    ردحذف
  7. رحلة واجازة سعيده

    ونحن ايضا استمتعنا مع بالرحلة

    والحمدالله على السلامة

    :)

    ردحذف
  8. الأخت الفاضلة :: أم حروبي ::
    أسعد الله أوقاتك بكل خير
    والحمد لله على السلامة
    ما شاء الله عليك انتقاء الصور كان متميزًا
    شعرت بأنني في تركيا
    شكرًا على هذه الرحلة المجانية
    دمت بود

    ردحذف
  9. عليكم بالعافية خوووش سفرة :)

    ردحذف
  10. مرحبا صفحات
    نورتي يا حلوه ^^
    ممتع وااايد
    ربي يعافيج :)

    ردحذف
  11. هلا مهندستنا
    صدق عشنا حياتهم ..وكانت ايام ممتعه
    ترقبي :)

    ردحذف
  12. هلا عزيزتي مها
    صح المكان اللي سكنا في بدائي ..أول ليلة عانينا فيها لأن الماي كان حده بارد والدفايه ماكانت تشتغل وماشي كهربا ..لكن ثاني يوم الأمور تسهلت وكل شي صار أوكيه ..بس كتجربة حلو تعيشينها ^^

    ردحذف
  13. هلا هدوله ^^
    اي وايد ممتعه ..كابادوكيا أنصح بزيارتها
    وإن شالله ما طول عليكم

    ردحذف
  14. هلا والله بمبدعه
    الرسم بالماي ..
    يكون عندج وعاء فيه ماي ..وألوان ..
    أول شي ترشين اللون على الماي عشان يعطيج لون الخلفية ..
    بعدها تنقطين وبعود حديد تشكلين الورود أو رسمتج ..
    بعدها تحطين الورقة على الماي وتسحبينها
    وتنشفينها بسشوار وتطلعج ..
    أتوقع عندي فيديو وهي ترسم ..إذا حصلته بحطه ^^

    ردحذف
  15. مرحبا أنطونيو
    :)
    الله يسلمك

    ردحذف
  16. مرحبا مستر قويري
    العفو ..دورنا نعيشكم بالتجربة ^^
    دمت متابعا عزيزا :)

    ردحذف
  17. ام حرووبي حمد لله على سلامتكـ
    ورحلة موقفة ...
    والقادم أحلى وانتي بخير ...
    تقبلي طلتي

    ردحذف
  18. =)

    يا سلام ,,

    والله أستمتعت جداً جداً وأنا أقرأ أحداث رحلتكم
    وما حسيت أبداً بطول البوست ..
    الجميل أن حروفك والصور تتحدث بجمال ..

    أما اللي قالك أنا مسلم ههههه ضحكتيني , حسيت بشعورك ؛)

    شكراً لكِ على البوست والمعلومات والصور الرائعة

    ننتظر الجزء الثاني , لا تطولي علينا =)

    كوني بخير غاليتي ..

    ردحذف
  19. رحلتكم غريبه :) ما اتوقع انا اروح رحله جيه مع اهلي مستحيل ما بيطيعون لووول
    بس وايد عيبتني (شجاعتكم) لول لو انا ما بنخش فالنفق اللي تحت الارض ولا بسكن فندق مثل بيت لول
    بس من الروعه لا اكثر!

    حبيت اكثر شي انكم شفتوا حياتهم صدق وتمشيتوا فاماكن غريبه وشفتوا اشيا مستحيل تشوفونها فالرحلات العاديه!
    وااااايد عيبتني التذكارات اللي مثل الجبال والخزف ... :)

    ردحذف

قال تعالى: (( ألم تر كيف ضرب الله مثلاً كلمةً طيبةً كشجرةٍ طيبةٍ أصلها ثابت وفرعها في السماء*تؤتي أكلها كل حين بإذن ربها ويضرب الله الأمثال للناس لعلهم يتذكرون ))إبراهيم 24-25