هذه المدونة تخضع لقانون حماية الملكية الفكرية الذي ينص عليه القانون الإتحادي رقم 7 لدولة الإمارات
"لذلك يمنع نقل وتداول أي من محتويات هذه المدونة دون إذن من مالكها "
.?. هاجس اللحظة .?. هنا تجد الكثير مني

 

الجمعة، 14 ديسمبر، 2012

.,،×~أم حروبي والتصميم المرحلة الأولى _2




مرحباااا يا جماعة الخير 
جيفكم ,,وأخباركم ^^
اممممم ما بقرق وايد على راسكم بالمقدمة 
هالتدوينة رتبت صورها وخليتها مسودة صارلها دهر 
,,كل مرة أأجلها :\
المهم ..فقلت لازم احط شي عن العمارة لان من زمان كان اخر بوست 
اللي هو كان بوست شغل القروب والتحرطم الزايد ههههه 
هالبروجكت كان ثاني بروجكت عقب هاك والحمدلله كان شغل فردي -ـ-"
ولما عرفت انه فردي ..قلت بيني وبين نفسي 
"أنا بوريهم من هي اللي ما تشتغل"
كان البروجكت بمثابة تحدي إني أثبت لهم "قروب البروجكت الأول"
انهم ظلموني وقالوا عني اللي مو فيني !

المهم ..
المشروع كان عبارة عن تصميم 
Courtyard House
وهو تصميم فيلا بطريقة بيوت أول كيف إن "الحوي\الحوش" اللي هو courtyard 
يكون بنص البيت أو قلبه ,,,يعني كل غرف الفيلا تكون محاوطة الحوي
كان موقع المشروع أرض خالية صوب سكن دكاترة الجامعة هاي صورة المكان ..
رحناه وقمنا نقايس حدود الموقع عشان نبدا 


بداية ..علينا ندرس موقع المشروع ..اتجاه الشمس وأكثر جهة تستقبل الرياح 
والرطوبة ونوع الأشجار وما إلى ذلك ..
ثاني خطوة كانت ندور أمثلة لهالنوع من البيوت ..وندرسها 
ورحنا زيارة "لبيت النابودة" بالشارجة كمثال لان هالنوع من البيوت كان شايع 
زمان أول ..
وهاي الصورة لما كنت أجهز البورد عشان أقدم المثال اللي حصلته 

وثالث خطوة نبدأ بفكرة التصميم والتطبيق..
كانت من شروط المشروع انه ما نزيل اي شجرة من الموقع ..عشان نحافظ على البيئة 
وفي اسوا الحالات نقدر نزيح الشجر ونغير مكانه
كان الشي اللي استوحيت منه فكرة مشروع هو 
الصدف الحلزوني ..

كانت هذي أول مرة نطلع فكرة ونطبقها ...فسويت دزايني الأولي على شكل حلزون بالضبط 
من هاي الصورة 

لكن المس قالت لي إن لما نستلهم من شي ما نسوي المبنى على شكله بالضبط لكن 
ناخذ خصايص ونطورها ..
مثلا أن اخترت الصدف الحلزوني ..مميزاته 
-الاستدارة 
-ملمس الصدف الناعم
-الخطوط الذهبية 

وجي ..وتختارين احد هالميزات او اكثر وترسمين افكار عليها ...
فبعد عالكلام بديت اطور دزايني 
وهاي ثاني محاولة ..وكان يحتاج تطوير أكثر 

وقعدت اطوره الين المس قالت يكفي ..
وبدينا تضبيط البلانات 
والحين وقت التسليم..
أنا المدمغة كان عبالي النموذج لما نسويه 
نسويه بتقسيمات الغرف والتصميم الداخلي
وكان قياس النموذج المطلوب صغير وايد..
فطلعت عيني وأنا اقصقص فالبورد واسوي الدرايش 
والدرج والطلعات والنزلات ..
وهاي صورة الفيلا من داخل 
ومن جهة ثانية 

وهذا بعد ما خلصته ..
حبيته وااايد ^^
خصوصا شكل السقف كان غريب وعجبني 
فرحت عند المس وكان ها يوم قبل التسليم كنت مخلصة الرسمات كلها بس باقي النموذج 
فراويت المس ..وصدمتني صدمة حياتي لما شافته ..
قلتلها عيوني راحت فيها وانا اسوي التقسيم الداخلي 
جان تقولي منو قالج انه نبي التقسيم الداخلي ..النموذج بس عشان ترواينا شكله الخارجي 
انا عاد هني كنت على شفا حفرة من الانهيار T_T
ولما شافتني المس كيف ملامحي تغيرت ..قالت بس على فكرة ترى التقسيم محلي النموذج
بس علقت على السقف وقالت لي انه مو عملي  خصوصا حق فيلا ..
ممكن يتطبق على مبنى ثاني بس بعد يحتاج اشيا كثيرة ..
فغيرته بالرغم اني كنت حابته ..وسويته بهالطريقة 
زووووم على التقسيم من داخل 

لقطات للنموذج قبل التسليم 

المنظر من فوق يعطي احساس خفيف بالصدف الحلزوني ..
وهاي رسم ثري دي للنموذج 
الالوان وايد فاتحة فمايبين ..كبروا الصورة عشان توضح 
هاي البلانات والرسم المقطعي الجانبي 
وها بورد الفكرة والايحاء ..شغل اخر لحظة ههههه 
واخيرا كان البريسنتيشن ..
^^

وبس بجذي اكون خلصت البروجكت ..
واحلى شي يوم استلمنا الدرجات وانا الوحيده اللي يبت بي بلاس والبقية بي واقل 
كان شعور لا يوصف وانا اشوف اشكال العذال وهي مصدومة ومقهورة من الدرجات ^^
وانا كنت فداخلي ارقص 
>>جي<<

هههههههههههههههههههههه 

وبس 
دمتم سالمين ^^

هناك 8 تعليقات:

  1. السلام عليكم ..
    عاد أهم شي الحوي بارك الله فيج خليلنا مساحه حلوه
    وين بيلعبون الصغاريه مساكين ووين بنشوي في يومين الشتا خخخ
    ماشاء الله حلو التصميم وموفقه حبيبتي

    ردحذف
    الردود
    1. ,وعليكم السلام ورحمة الله وبركاته ..

      هههه عاد حطيت لكم حوي شكبره يتونسون فيه اليهال وتشوون على كيفكم ^^

      من زوقك والله ..اجمعين يارب ^^

      حذف
  2. ana 3jbni el sgf elaweli 7seta b3d a7la :P

    w mashalah mbayn elsh'3l mt3oob 3laih

    waayed 7loo

    allah ywafgich w nfr7 fech 5reeja ;;**

    ردحذف
    الردود
    1. هيه أنا بعد حبيته ..بس شنسوي لازم نغير ..بالنهاية لازم يكون عملي :\

      مشكورة ^^
      وامييييييييييييييييييييييييييييين يارب اتخرج واخلص :")

      حذف
  3. سلام عليكم..
    مبروك مبدعة ما شاء الله . لفت إنتباهي هو معرفة إتجاة الريح والشمس ربما البيوت القديمة تعتني بالشيئ على اعتبار انه لا يوجد وسائل التكييف والاضاءة الحديثة وربما اتجاة الشمس ضروري لكن الريح وابقاء الاشجار مكانها مستغرب !! ممكن توضيح للإستفادة ولكم الشكر والدعاء بالتوفيق.

    ردحذف
    الردود
    1. وعليكم السلام ورحمة الله وبركاته ..

      مشكور ^^

      معرفة اتجاه الرياح مهمة ..لان شي انواع من الرياح ..في رياح تجي محملة بالاتربة وهاي الرياح انت ما تبيها فبالتالي راح تحاول تحط حاجز فاتجاه هالرياح عشان تمنحها تدخل للبيت وتمليه تربه ..
      وفي رياح باردة ونظيفة وهاي اللي نبيها ..فالمكان اللي باتجاه هالرياح تخليه مفتوح ..مثلا في تصميمي انا خليت سور البيت منخفض باتجاه الرياح النظيفة عشان يدخل اكبر قدر من لداخل الحوي عشان يبرد :)

      اما الاشجار ..فعادي انه نزيلهم ..لكن حفاظا على الطبيعة والبيئة لا أكثر ..عشان ما نكون من اللي يقطعون الشجر ..والمعماري الناجح هو اللي ما يضر البيثة باي شكل من الاشكال ومنها قطع الاشجار :)

      ان شالله وضحت!

      العفو ..وامين يارب يوفقنا كلنا ^^

      حذف
  4. مرحبا ... يعطيك العافية تصميم يفتح النفس
    مشاء الله تستاهلون اكثر من B+
    عجبني كثير الفناء الداخلي كانو صار بيننا تبادل خواطر لانني عملت في مشروعي الاخير فناء داخلي اتمنى تشاهدينه في مدونتي في الصفحة الثانية او ابحثو في قوقل عن :
    تصميم النادي العلمي الزراعة

    تجدونه اول رابط
    لكن اخذت عليه درجة مو زينه :(

    بتوفيق يارب

    ردحذف
    الردود
    1. مرحبتين أخ أحمد ,,الله يعافيك ^^

      شكرا شكرا :)

      ان شالله راح اشوفه ..عقول المهندسين عند بعضها ^^

      ويوفقك ان شاللخ :)

      حذف

قال تعالى: (( ألم تر كيف ضرب الله مثلاً كلمةً طيبةً كشجرةٍ طيبةٍ أصلها ثابت وفرعها في السماء*تؤتي أكلها كل حين بإذن ربها ويضرب الله الأمثال للناس لعلهم يتذكرون ))إبراهيم 24-25