هذه المدونة تخضع لقانون حماية الملكية الفكرية الذي ينص عليه القانون الإتحادي رقم 7 لدولة الإمارات
"لذلك يمنع نقل وتداول أي من محتويات هذه المدونة دون إذن من مالكها "
.?. هاجس اللحظة .?. هنا تجد الكثير مني

 

الأربعاء، 23 يونيو 2010

.,؛×~وعدنا بعد الحظر !!



يااااااه من زمان عنكم ..تولهت عليكم أول شي السلام عليكم ورحمة الله وبركاته
شو أقول ..آآآآآآآآآآآآآآآآآآآآآآه تعرفون لما تيلسون على شي تبون تخلصونه
ولما تخلصونه وتحسون كنه صخرة وانزاحت من ظهركم وتقولون آآآه من قلب قلبكم
كنها روحكم بتطلع من الراحة ..أنا جذي ..أسبوعين كانوا متعبين من الخاطر
الصيفي متعب صج مع أنه بس مساقين لكن أثقل على النفس من الفصل العادي
عاد أنا الأسبوع اللي طاف كنت محدده كمية معينة أذاكرها في نهاية الأسبوع..وتكاسلت ومادرست وكله على المدونة وكنت معصبة من نفسي وايد فقلت لنفسي"خلاص شكلج قاضية ..ماتبين تدرسين ..عقابا لج ماشي لابتوب هالأسبوع ..وماشي مدونة ..وتم إعلان حظر تجول في النت "
وأنا لامن حطيت شي فراسي ومصرة عليه أسويه..وبما إني كنت معصبة حدي طبقت ..رغم إنه اللابتوب أسمعه يصيح "افتحيني ..افتحيني ..ومرة فتحته على أساس بطالع موقع الجامعة (عذر أقبح من ذنب خخخ)..وسبحان ربي فتحته ومامداني أفتح صفحة النت سكر لأنه مافي بطارية ..فقلت أحسن ..يمكن تقولون شفناج علقتي على مدونة فلانة ومدونة علان ..بقول"خخخ هيه ..بعيدا عن أعين الرقيب كنت أدخل من الفون بس مودايما يصير أعلق..بس كنت أقرا المواضيع وأبي أعلق ><"واليوم انفتح الحظر وقلت أسلم عليكم ..
أحس صج كرهت الكتاب شوفوا شكله يخرع صح !

وهذا متنه ..!!
21.5×25×4.5=2418.75 سم مكعب >>هذا حجمه ..وايد متأثرة بالرياضيات.. متفيجة صح أحسب الحجم خخخ
مرة ربيعتي شافتني شايلته ..جان تقول "شوها..ويي أعوذ بالله بعيد بعيد "..ههه ضحكتني
المهم اليوم امتحنت والحمدلله كان الإمتحان أحلى من المتوقع ولكن الله العالم شو من تأليف ألفت فيه خخخخ إن شالله أكون حليت عدل
***
أما أمس كان فحص السواقة ..عاد أخوي يقولي سواقتج زينة بس لا تتوترين ..هههه ما أتوتر قال >>خير إن شالله (6,6)
وأنا كنت آخر وحدة ..وأشوف اللي تقيم و هي تزف أول وحدة ..قلت"اللـــــــــــــــــه يعين!! "..ويا دوري وأنا أسوق ريلي ا ليسار ترتقل ..عاد أخس شي يوم أتوتر ..كرهت حياتي بس لفة ودوار ورديت ..
وشوي ويعطونا النتيجة أنا شفت الورقة وأطالع أبوي وأضحك ..قال"شو النتيجة؟؟"..قلت "هههههه راسبة!"بابتسامة عرييضة

شوفوا شلون كاتبين "راسبة " بكل حب !

وكم غلطة حااطين (0.0)..حشى مابقى شي فاللستة ..اللي تحتهم خط بس أعترف فيهم خخخخ

***
ودمتم سالمين ^^

هناك 26 تعليقًا:

  1. أكره الكالكوس ماحبه ومافهمه. والله يوفقج يارب ويسهل عليج أمورج والصيفي المتعب. حبيت لما قلتي حطولج راسبة بحب خخخ .. عاد انا كل شي حلو عندي إلا إذا شفت احد يصرخ علي وقت اختبارات مثل هالنوعية ما أركز وأتوتر زيادة. ماعليه تعوضينها ان شالله

    ردحذف
  2. الكالكلس .. حلو , ممتع , أستمتع فيه جدا

    عادي عادي .. تعيدين الفحص وتنجحين ان شاء الله^^

    أنا ضعيفة جدا جدام النت وبلوجي وبلوجاتكم .. حتى اذا عندي امتحان صعب وطوييل أدش بأقوات البريك .. لان إذا حرمت نفسي.. راح أنفجع فأقعد بعدين بالساعات وانسى عمري أو إني أفقد المتعة
    وطبعا ما أبي يصيرلي لا هذا ولا هذا
    ^^
    she is me

    ردحذف
  3. ما اقول الا الله يعينج

    والله الله مالستغفار

    صدقسنس يخبسج وحده ثانيه ,, وتمشي امورج ^_^

    دحوم كان هنا

    ردحذف
  4. أول شي عفيه عليج زين سويتي لما اتخذتي قرارج علشان تنجزين وتبتعدين عن الملهيات << الفال لي يارب

    والله يعينج على دراسة الكالكلس :)

    وعلى اختبار السواقه لووووووول ضحكتيني والله بس يلا ماعليه خيره وهاردلك :)

    ردحذف
  5. أهلاً وسهلاً خيتو
    منور النت
    الكلكولس>> ذكريات سابقة حلوة ومرة
    أما بالنسبة للسياقة، خيرها في غيرها
    يلا استمعي بوقتك
    دمتي بألف خير
    ^_^ ^_^

    ردحذف
  6. الله يعينج مع الصيفي <<< الحال من بعضووووا

    اما ع راسبه بالسواقه انا مره سمعت انكم حيل متشددين بسالفة الرخصة يعني بطلعت الروحة تاخذون رخصة السواقه , العكس عندنا بس انا افضل طريقتكم ..

    يالله تدربي عدل عشان تنجحين المره اليايه :)
    يعطيج العافية

    ردحذف
  7. ههههههههه

    والله انج تحفه
    اتخيل نفسي اسوي تراي سواقه وييي صدق بكون راسبه بجدااره
    يالله ما عليه.. ان شاء الله تنجحين المره اليايه و تفرحينااا بالليسن

    تعالي صح كتابكم يشبه كتابنا بس الغلاف غير خخخخخ


    موفقه خيتوو و إلى الامام ^.*

    ردحذف
  8. ولهنا عليج..

    وي كتابكم مرعب الله يعينكم وحجمه وايد صغير هذا صيفي وحذي شلون لو كورس عادي..

    عموما سهالات ان شاءالله وموفقه يارب..

    اما الليسن اليايات احسن ..

    ردحذف
  9. الحمدلله ع السلاامة
    وولكم بااك

    .........

    لولللز ذكرتيني بعمري
    كنت أمنع نفسي من اللاب والنت
    طول الكورس الي طاف
    .............

    يالله بالتوفييييج في الليسن
    ولو خذتيه
    مري عليّ .. بنسير الكويت عند ماما رورو
    (;

    ردحذف
  10. خخخ ماتنلام صديقتك يوم شافت الكتاب من جد مرعب

    انا في وقت الاختبارات يجيني ادمان مو طبيعي على الانترنت ولازم احط لي وقت اقلها ساعه في يوم الاختبار عشان اقدر اركز في المذاكره

    السواقه تعوضينها ان شاء الله

    ردحذف
  11. يلاا بالتوفييق يارب ...

    من خاطره كاتب راسبه هع

    ردحذف
  12. قلم ومساحة
    ان شالله امين
    الرياضيات سهل وحلو واحبه لكن مجرد كلمة امتحان تغث وتخوف..ولا انا احب الرياضيات
    هيه والله ماحب حد يصارخ فيني ..اكيد برسب جذي يوترون حدهم ..
    حياك الله ^^

    ردحذف
  13. she is me
    اي حلو احبه ..بس تكرهين حياتج لما يكون عندج ضغط
    ان شالله بعديها
    ..من فترة وايد متكاسلة ..فكان لازم اكون حازمة شوي
    وصج عاقبت نفسي بس لينت عليها يعني ادخل من الفون اقرا بس ماعلق ^^
    تحيتي~

    ردحذف
  14. عبدالرحمن
    الله يعين الجميع ..امين
    مافهمت على الرمسة السعودية ؟؟
    حياك الله أخوي دحوم ^^

    ردحذف
  15. المهندسة
    اي الواحد لازم يكون شديد احيانا على نفسه
    ..ان شالله خير يارب واعدي المساق بامتياز اذا الله راد
    ..والسواقة ..طلعت من خاطري بس دام بديت لازم اخلص ^^

    نورتي ~

    ردحذف
  16. مرحبا اخ موسى ^^
    شكرا شكرا
    الحلو دراسته بس المر امتحاناته
    ان شالله خير
    حياك الله ~

    ردحذف
  17. البطة
    هيه الله يوفقنا جميعا يارب
    اما على السواقة ..يمكن مادري ..

    تسلمين حبيبتي~

    ردحذف
  18. مجرد نقطة
    مسويني نكتة في البيت ..بسبة السواقة خخخ

    هيه كل الكتب تؤدي إلى الدراسة ^^

    تحيتي~

    ردحذف
  19. عموتي رورو
    انا اكثر ^^
    قصوا علي قالوا الصيفي اسهل طلع ثقيل ويغث ><
    بس ان شالله الامور بتتيسر ما بقى شي
    الله الموفق
    تشكرات ^^

    ردحذف
  20. الله يسلمج اميرة
    سانكيوزات كثير
    عاد قبل كنت اكره شي اسمه لابتوب الحين من دخلت الجامعة ..بس الحين صار متنفسي الوحيد..فكان لازم اقسى على روحي

    هيه اكيد بمر عليج وبنخلي عمو رورو تحوطنا فالكويت وتدلينا عن نضيع خخخ
    ^^ حياج الله~

    ردحذف
  21. مبدعة
    هههه صدقج ييب الكوابيس خخ

    ابليس اعوذ بالله منه يزين لنا المشتتات عشان م نذاكر ..الحمدلله هزمته هالمرة ^^

    ان شالله
    نورتي غاليتي^^

    ردحذف
  22. دلوعه
    قصدج من خاطرها هيه ..وحده قيمتني ..
    ان شالله
    حياج ~

    ردحذف
  23. السلام عليكم ورحمه الله و بركاته
    جمعـــــــــــــة مباركــــة

    الله يوفقك في دراستك و يعينك على الفصل الصيفي ^^ و ان شاء الله المرة الجاية تنجحي في فحص السواقة ^^ مودتي

    ردحذف
  24. وعليكم السلام ورحمة الله وبركاته

    أمييين يارب..ويوفق الجميع إن شالله

    جمعة طيبة ^^

    ردحذف
  25. موفقه إنشاء الله يارب ..
    و عن الكتاب ذكرتيني، مع إنه كتبتكم وايد أكبر عنا، بس أذكر كانوا حتى نحنا يوم يشوفوون كتبنا و بالذات مال الإعلام لول مساكين كانوا كله ملازم يزييغون يوم يشووفون كتب القانون ..

    و عن السواقة يا أم حروووووبي .. عااااادي طوفي و الله أنا أحس الإمتحان كله حظ، أنا أذكر أول ما سقت ما غلطت إلا غلطه وحده رسبووني و في ثالث إمتحان نجحت مع إني كنت مغلطة واايد .. لوول ..

    لوو إدربتي في دبي واايد متشددين ودي أصيح على كل رسووب لازم 8 كلاسات زيادة و تريي لين ما يطلع إسمج حق الإمتحان ..

    ردحذف
  26. AM.SA.CHANNEL

    هيه والله حتى كتب القانون تخوف ..يعني مايقدرون يقسمون الكتاب أنا ايدي شوي وبنتشلع من مكانها من كثر ماشيل هالكتاب ><

    أما على السواقة ..صدقج أنا أشوف انه بعد حظ ..اللي يعجبهم ينجحونه خخخ

    الله يوفق الجميع
    مودتي~

    ردحذف

قال تعالى: (( ألم تر كيف ضرب الله مثلاً كلمةً طيبةً كشجرةٍ طيبةٍ أصلها ثابت وفرعها في السماء*تؤتي أكلها كل حين بإذن ربها ويضرب الله الأمثال للناس لعلهم يتذكرون ))إبراهيم 24-25