هذه المدونة تخضع لقانون حماية الملكية الفكرية الذي ينص عليه القانون الإتحادي رقم 7 لدولة الإمارات
"لذلك يمنع نقل وتداول أي من محتويات هذه المدونة دون إذن من مالكها "
.?. هاجس اللحظة .?. هنا تجد الكثير مني

 

الاثنين، 23 أغسطس، 2010

.,؛×~ريلي يا يبه

وش فيج يا بنتي شايله الدنيا بكتوفج؟؟


ريلي يا يبه ريلي ..وش فيني أنا من مره!!


مافيج شي ياحشاشة اليوف وش زينج ..


أجل وش فيه لي كلمته مايرفع الراس

ولا يشوف وجهي وينظره ..

ولاهيٍ بشغله وما عاد يهلي بي ..

ولا يقول يا محلا عيونج ..

ويا زينج من مره..

ولا يسولف معي ..ومجابلن فونه وما يحقره ..

ولي تغدينا ..وسمع صوت فونه فز من طوله

وقضب هالفون وقام يطقطق فأزرره ...

والمصيبه ..يا يبه مب في الفون ..

المصيبه في كم في فونه من مره ..

لي قضبته شفت هالعيون ..المكحله

وشفايف كنها شفايف صخله !!

يبه وش فيك منزلن راسك ..شوفني وقلي ريلي

وروحي شلون أرضيه وما يشوف غيري من مره ..

...والسوالف ياهي سوالف استحي أسولفها معه

أخاف لا يظن فيني ظن ماني عارفه كيف أغيره ..

وليتني أدري من هن ..كنت خذت بكشة كل وحده

وأراويها نجوم ظهره ..



ريلي يا يبه ريلي..حاشته ألام في رقبه ..

وويهه ماعاد يتشاهد من السهر ..يرد على فلانه

وأم عيون البقره ..

قلي يايبه .. وش الحل في البي بي هذا اللي ما صان حقي

قلي يا يبه وين حقوقي وأنا مره ..

ربي يسامح من أخترع هالفون التعيس

يوم إنه ريلي اللي طول عمره راسه بالسما مرفوع

ماعاد يرفع راسه من كثر ما عيونه بالشاشه مسمره ..

يبه رد علي ..وش أسوي اشتقت لريلي

وبي بي ما خذته عني وماتتنازل عنه

لو هي ضرتي كان أرحم ولو هي مره كنت أعذره ..

قلي يا يبه ..وش فيك منزلٍ راسك وتضحك ..

أنا قلت نكته ولا اهو مقلب

كسر قلبي وبعثره ..

وأخيرا رفعت راسك يا يبه ..قلي وش الحل ..


يا بنتي وش فيج تشكين لي ..

ومصدعه شيبتي بهمومج المسطره ..

شايفتني مصلح اجتماعي مثلا !!

~~~~

ترى ماصارت ويا هالفون ..الناس ماقامت تسولف مع بعضها والسبه هالبي بي

وين عن سالفة قطع الخدمة ؟!!..مقهوره من هالفون ..مو غيرانه لكن الحال يصعب علي

تشوفون اثنين بطاولة وحده وكل واحد قاضبن فونه ..يبه وش فايدة اللي قاعد يمبك عيل ؟؟

الله يصلحهم ..

.

.

موجني وايد معصبه خخخ

**على فكرة ماقصد نفسي في القصيدة ..مجرد تعبير مجازي لخدمة الفكرة :)


هناك 42 تعليقًا:

  1. يا مرحبا يا مرحبا ..


    ههههههه , والله أنك ضحكتيني , بس والله انك صادقة في كل شيء قلتيه ..

    طلعتي مو سهلة يا أم حرَوبي ؛)

    عليك كلماات قوية في الصميم ..

    أقولك أنا مره لما كنت في احد المجمعات دخلت محل وكانت وحده عندها البيبي وتكلم صديقتها بصوت عالي تقول لها : أيوه , أنا الحين في المحل وعاجبني شيء , راح أصوره لك وأرسله وشوفي إذا أعجبك راح أشتري لك مثله ,

    طبعا مثل هالحركات , وتتكلم بصوت عالي , مفهوم المعنى يعني :/

    الله يهدي الجميع , أحنا أقطعوه يمكن أقل من يومين ورجع بشرط المراقبة .. ولايزال المتهم حراً ..

    :)

    سلمت يداكِ عزيزتي ..

    كوني بخير ..

    ردحذف
  2. لووووووووولز

    صدقيني أتريا شهر 10
    عسب اتشمت عدل




    النااس ما قامت تجوف بعض ولا يرمسون بعض
    بسبة هالبي بي



    دام قلمكـ معطاءً أخيه
    وللامام


    ومعكِ لحياة خالية من البي بي
    :d

    ردحذف
  3. كاااااااااااااااك

    والله انتي الصاااجه ضبطتيييهااا لووول

    ضحكتيني صراحه

    ردحذف
  4. اكسري البي بي على راسه

    و خلااص خخخخخخخخخ

    ردحذف
  5. السلام عليكم...
    هههههه
    الصراحه ماشاء الله عليج خطيره بس ظلمتي الصخله وحليلها ...
    هو قطع الخدمه سيأتي بس أظن بترجع بعد فتره
    بس ضحكتني سالفه وطبعا وأكيد إنه مسج على البيبي مسن إنه وأخيرا سيدرك أصحاب البيبي أن السماء لونها أزرق بعد قطع الخدمه هههه
    ...
    وأنا من أنصار الكيكي يعني النوكيا
    على قولة المثل المصري من فات قديمه تاه
    ...
    في حفظ الله

    ردحذف
  6. ههه الله يستر العصبية واصلة حدها

    ردحذف
  7. خخخخخخخخ احلى شي براطم الصخله..

    الله يكفينا الشر السالفه صايره ادمان ..

    وكلها مضار (صحيه - اجتماعيه)بس عقب بيحسون ..

    وصح لسانج :)

    ردحذف
  8. صح لساااانج

    التكنولوجيا هذي خذت منا وايد
    على كثر ماتعطينا تاخذ منا
    يعني الجيل الياي بيطلعون مايعرفون يتحجون
    لأن مافي حوار كل تركيزهم على هالأجهزة

    ردحذف
  9. ..pen seldom
    مرااااحب والله ^^
    احم احم ..جان استحي خخخخ
    هيه والله على الدخله والطالعه حاطين صور ..ومافي حد ماعرف هم شو يسوون ..الله يصلحهم ..
    يباله حكم اعدام هالمتهم ..الله يعين شو بسوي بعد اطلاق السراح المشروط ؟؟
    تسلمين اكثر ^^

    ردحذف
  10. مسا الخير سمو الاميره ^^
    عاد ياخوفي يصير مثل السعوديه يقطعونه يومين ويردونه ><
    ولا تقصرين بالدعوات..نحن برمضان ^^
    ومعا نحو مستقبل مشرق بلا بي بي ولا طوايفه لووول ^^
    حياج حبيبتي منوره :)

    ردحذف
  11. هلا والله Unique Girl
    ^^
    الله يديم هالضحكة يارب :)
    حياج غاليتي ^^

    ردحذف
  12. مرحبا دلوعه ^^
    لو هو ريلي صج ..جان حذفته بالبي بي وكسرته عراسه من زمان خخخخ
    حياج الله :)

    ردحذف
  13. وعليكم السلام والرحمه نهار :)
    ههه أنا بعد قلت جي وحليلها غمضتني الصخله خخخ
    قولي الا بيكتشفون انه في عام حواليهم ..مو بس سما
    خخ
    ههه عجبتني كي كي ..الولا كله للنوكيا تربى ويانا صار من الاهل خخخ خ..
    صدقتي ..
    حياج الله نورتي :)

    ردحذف
  14. هلا علي الملا
    اي شفت شلون !!
    :)
    حياك الله ~

    ردحذف
  15. مسا النور رورو ..
    ههه ..
    صدقتي ادمان ..ومشاكل الله يكفينا شره ..
    صح بدنج ..
    نورتي :)

    ردحذف
  16. مرحبا BookMark
    صدقج لغة الحواار عندهم بتصير مييييح ..صفر عالشمال مثل ما يقولون ..الله يصلحهم ان شالله وتنقرض هالخدمة وامثالها ..ونعيش بسلام ^^
    وصح بدنج ..
    منورتني ..

    ردحذف
  17. ههههههههههههههه صدقتي والله .. ها البي البي موخلي حد بحاله وصارت سوالف طلاق بالسبب البي بي الله ياخذ ها البيبي امييييييييييين ..^^
    وع فكرة كلماتج اقوى شييي حلوة ومعبرة ..

    سلامي^^

    ردحذف
  18. ايه والله مصخت ياليت يقطعونه بس

    ردحذف
  19. اي والله مُعاناة هالبي بي ..
    درجات جم واحد من الأهل نزلت والسبّه هالتلفون ..
    القصيدة عجيبة ..
    وصفتي حالة الناس هالأيام وصف دقيق =q

    ردحذف
  20. صباح الخير :)

    صح السانج
    صج هالبي بي مسبب أزمة :p
    الله يستر على ضحاياه اللي أدمنوا عليه

    ردحذف
  21. صباح الخير
    ما شاء الله عليج يا ام حروبي يبتيها صح, وايد مشاكل قامت تصير وسبه هالجهاز, ومشاكل خيالية وتافه بنفس الوقت!
    رغم اني استخدمه ويت لي فترة وبما انه كان يديد على تعلقت فيه بس ما مر اسبوع اللي انا طخيت وجنا جهاز عادي, اهو ع حسب الانسان وعقليته وطريقة استخدامه, في ناس تستفيد صح وفي ناس تتعلم غلط, اهو الجهاز كان للبزنز ولرجال الاعمال لانهم ما يحصلون وقت ويستخدمونه بتجارتهم! بس شوفي الحين الكل يستخدمه, فلازم الانسان نفسيه يختار اللي ينفعه:)

    يعطيج العافية

    ردحذف
  22. مرحبا كابتن ..
    اي والله مو تليفون خراب بيوت الا ..
    الله يعين ..
    أمييين ..
    ومشكور ..
    ربيي يسلمك ^^

    ردحذف
  23. هلا مبدعه ..
    إن شالله يقطعونه ..لأن الموضوع تعدى سالفة انه مجرد جوال ..
    حياج الله ~

    ردحذف
  24. هل اصفحات مُلطخّة بحروفي ..منوره :)
    صدق المفروض تنحط ضوابط..يعني حتى اليهال قاموا يحصلون هالفون ..وصاير تركيزهم خفيف ..يبالكم تمسكونه عنهم ايام الامتحانات ..
    مشكوره :)
    حياج الله ~

    ردحذف
  25. مسا الورد أنوار :)
    تخبريني عن ضحاياه ..أنا ما كتبت القصيده إلا من حرتي عليهم ><
    صح بدنج يالغاليه :)

    ردحذف
  26. مسا النور بطه ^^
    صدق مشاااكل ما تي عالبال ..والسبة شنو ؟؟..فون!!
    الله يستر منه ..
    وصح هو يعتمد على الشخص ..يعني هو شي طبيعي لما يكون شي يديد تمين عليه وايد لكن مع الايام يخف حماسج ..الللي مو طبيعي ان ناس تعدت مرحلة الحماس باليديد وصار الموضوع إدمان ...

    ربي يعافيج مشكوره ^^
    قبل كان مثل ماقلتي حكر حق رجال الاعمال ولكن الله يسامحهم يوم فكروا يفجونه حق الكل..

    ردحذف
  27. بالكويت ..قالوا ما راح يقطعونها .. راح يراقبونها
    وصح ترا .. مو الحل انها تنقطع .. الحل ان الناس تخف شوي
    يعني مو معقول .. كل تقنية تستغل خطأ .. نروح نمنعها .. صح ولا أنا غلطانة
    اذا كل شي يستغل خطأ .. تعالي خل نمنع السيايير .. مو قاعد يصير فيها وبواسطتها سوالف
    تعالي نمنع النت .. تعالي نمنع الكامرات بالتلفونات
    تعالي نمنع البلوتوث .. تذكرين الخبة الي صارت أول ما طلع؟
    في وايد أشياء راح تمنع
    صح ؟
    على فكرة .. ترا أنا ما أستخدم البي بي ام .. لان لحد الحين امي مو راضية أحطها
    تقول : مالها داعي

    ردحذف
  28. مرحبا she is me
    معاج الحل مو القطع لو الناس الله يهديها تفهم ..من الاساس الخدمة مالها داعي يعني كانت لرجال الاعمال والناس اللي صج تحتاج هالخدمة ..واصلا من الاساس كان لازم تكون شي ضوابط هم خلوا المجال وااسع ..يعني لو خدمة التواصل تكون بس للارقام المسجلة في قائمتج مو مشكله يعني ناس تعرفينهم ويعرفونج ..لكن العالم صايره تضيف كل من هب ودب ..والمصيبه اليهال ولا محد ضايع غير اليهال بالله ياهل ولد 10 سنين شو يبه في البلاك بيري اخر شي يضيف ناس ما تتخاف الله وهو مايدري ويقصون عليه ..الدنيا ماعاد لها امان ..والوقاية خير من العلاج موصح ..اولا لازم يعطونه لسن معين وثانيا لازم يكون مراقب وفوق ها للناس المحتاجه ..
    يمكن انتو مسوين مراقبه بس على فكره في الامارات ماشي مراقبه فالحين الناس محتشره لانهم يفكرون يراقبون المحادثات ..
    وبس تعبت :)
    انا بعد لو كنت مكان امج مابخلي حد ياخذه ..اصلا حتى اخواني الاثنين اللي اصغر عني عندهم لكن بدون خدمة...
    جني الا معصبه خخخ
    مشكوره وحياج الله ^^

    ردحذف
  29. لووول حلوو تعبيرج على هالظاهره .. الله يكون بالعون .. فعلا زمن البيبي هو زمن الصمت كل واحد لاهي بعالمه .. ماكو تواصل الا فيه ظهورهم حدبت :( .. حتى بين الخوات برودكاست .!!!
    عسى الله يهدي الحال ونشووف لنا حل .. يعطييج العافيه على هالبوست *_^

    ردحذف
  30. AsMa-Kw مرحبا ومنوره بمروج الاول :)
    صدقج حتى بين الخوات ..قاعدين بنفس البيت والغرفة ويرسلون لبعض !!
    اميين ..
    ربي يعافيج مشكوره :)
    حياج الله دوم وكل يوم ^^

    ردحذف
  31. ولو انى موش فاهم كل الكلام ..بس الموضوع ظريق وداخل فيه الفون بكثره وذلك من تأثير الحباه العصرية ..ملغون أبو التليقوت اللى مخللى الناس ماشبه تكلم روحها

    ردحذف
  32. هل اmaxbeta3zaman
    ههههههه ضحكني تعليقك ..الله يسلمك الموضوع يتكلم عن تليفون بلاك بيري اللي هابه فيه الناس هالأيام ..
    حياك الله~

    ردحذف
  33. امبيه مو صج

    ضبطتيها عاد

    صج عاد تمشين و ناس يدعمونج

    على بو ان لاهين بالبلاك بيري و ما يشوفون جدامهم

    تحياتي لج

    دام تألقج

    ردحذف
  34. ههههه حبيت (امبيه مو صج )^^
    تخبريني عنهم ..عايشين بعالم ثاني ..أهم شي خل يركزون بالسواقة ..
    دمت متابعة ^^
    حياج الله ومشكوره~

    ردحذف
  35. صدقج، بس اسميج وايد ضحكتيني، مدونتج وايد حلوة واسلوبج وايد مميز وغير!

    ردحذف
  36. هلا رحيل منوره :)
    الله يديم هالضحكة إن شالله
    ومشكوووره على كلامج ..
    يسلملي قلبج غاليتي وحياج الله ~

    ردحذف
  37. يازتلي الكلمات وتحقي جزء من واقع البي بي الفاشل

    //
    يوم إنه ريلي اللي طول عمره راسه بالسما مرفوع

    ماعاد يرفع راسه من كثر ما عيونه بالشاشه مسمره
    //

    قويه هذي وذكرتيني يوم كان عندي بي بي << كان عنده
    مكتوب السعوديه سو تلغي خدمه البي بي
    لانتهاك عبارت ارفع راسك انت سعودي
    هههههههههههههههههههههههههههههه

    وسج الصراحه صرنا مصخره بين الناس
    لا سوالف ولا شي كلن ماسك هـ الفون

    اشوه ربعي ما يحبونه وانا معاهم
    يحليلنا بس هع هعين D:

    يسعدني ان اتواجد هنا (دحوم النتفه)

    ردحذف
  38. سعيدة بانها اعجبتك ^^
    من حقهم والله يلغونه ..بس ردوه الحين
    هيه مصخرة ..الاجانب اللي يعرفونه من يومهم ما سوو شراتنا ..
    هيه زين يوم انه ما عندهم ..تريحون عماركم كم من صدعة الراس :)

    ويسعدني وجودك ^^

    ردحذف
  39. اي و الله اختي ,,
    انا ما كنت اصدق انه اصبح ادمان الى ان شفت بعيوني ,,
    مره انعزمت ببيت بنات و ما اعرفهم و تخيلي من يوم دخلنا لين طلعنا ما ضيفونا و لا يسولفون و لا شئ كل وحده منهم عينها بالبي بي و تطقطق ,,
    يوم قلت مصخوها و جيت طالعه الا توهم يستوعبون قله الادب و تبي تضيف بالقهوه قلت فهوتكم مشرووبه ههههههه

    الله يحمي شبابنا و بناتنا و يريهم الحق حق و يرزقهم اتباعه ,,
    و يريهم الباطل باطل و يرزقهم اجتنابه ,,

    دمتي بخير^^

    ردحذف
  40. مرحبا أسيرة اللوحة
    وييي مطنشينكم ..عيل ليش يعزمون اذا هم موقد العزومة >>يمكن يمشون على مبدأ أخدم نفسك خخخ
    ...الله يهديهم بس
    آميييييييييين يارب ..أجمعين ^^
    دمت هنا:)

    ردحذف
  41. السلام عليكم ورحمة الله وبركاته
    أي والله صاجة يا وخيتي الناس مير
    من اعرفوا هالبيبي واهم روسهم تحت
    وأشكالهم لمن يمسكونه تضحك جنهم مدمنين
    وعذا الواحد منهم 3 ساعات بدون بيبي وشوفي شيصير فيهم
    وصح اللسانك يا أم حروبي ولاهانت يمناج

    موفقة دوم إن شاء الله
    و ياجعل ريلج ما يشوف مرة أحلى منج أبد
    ويزهد فيهم فيما عداج *_^

    ردحذف
  42. وعليكم السلام ورحمة الله وبركاته
    منورتني خاتون :)
    هيه والله ما يستحملون بدونه دقايق ..
    صح بدنج ..ولا هنتي ^^
    آمييييين (^_^")
    حياج الله دوم وكل يوم ^^

    ردحذف

قال تعالى: (( ألم تر كيف ضرب الله مثلاً كلمةً طيبةً كشجرةٍ طيبةٍ أصلها ثابت وفرعها في السماء*تؤتي أكلها كل حين بإذن ربها ويضرب الله الأمثال للناس لعلهم يتذكرون ))إبراهيم 24-25