.,؛×~سوالف

السلام عليكم ورحمة الله وبركاته جميعا

شخباركم .علومكم شو مسوين ..عساكم طيبين حلوين وبنحبكووم

احم احم ..طبعا مايبيله كلام مبين إن مزاجي تعدل

ما تشوفون الإبتسامة خخخ

اممم شو أقول ..حابه أسولف ..حبيبي رمضان والله

أحس مزاجي تعدل من أجواء رمضان ..أحب رمضان أحس فيه روحانية موطبيعية ..وأحب لمة الأهل كلهم على سفرة وحدة وبوقت واحد بعكس الأيام العادية محد يجتمع لأن كل واحد وقت إنتهاء دوامه يخلص غير عن الثاني ..والحلو فيه إنه نمشي على الأذان..الأذان هو الرموت كنترول حقنا..نتسحر ولما نسمع أذان الفجر نصوم ..نصوم ولما نسمع أذان المغرب نفطر..ليت كل أيامنا ننطر وقت الأذان ..

أول يوم رمضان ما تسحرت بس قمت شربت ماي ..فلما نشيت الصبح أول شي كنت بسويه أمسك غرشة الماي وأشربها وبعدين تذكرت"أم حروبي اليوم أول يوم رمضان." خخخخخخخخ وطول اليوم أردد هالعبارة في قلبي أخاف أنسى وأفطر..وأنا أكتب هالسطر بطني كان يصيح ههه ..وكلما أقرا تعليقاتكم المزاج يرد عالطبيعي شوي شوي ..لكن الصداع كان مستمر ..فشربت 3 قلاصات جاي كرك(جاي حليب)..>>لا حد يخبر أبوي

بس عشان الصداع يروح عني ..والحمدلله المزاج اليوم عال العال ^^

--------------------

عجبني شي في بلوغير ..

الظاهر بلوغير مسوين تحديث حق طريقة عرض التعليقات ..

الشي الأول اللي حبيته

إنهم كلما يكون في تعليق يديد ..يكتب لكم هالتعليق يخص أي موضوع

والشي الثاني الحمدلله إنهم غيروه لأنه وايد كان ينرفزني واللي هو بخصوص التعليقات

قبل ..لما تسوي نشر للتعليقات كان ينكتب (ليس هناك تعليقات لايتم الإشراف عليها )

لو لاحظتوا الغلطة كاتبين (لايتم)..والمفروض يكون (ليتم)

أما الحين غيروها وصارت(ليس هناك أي تعليقات في انتظار الإشراف)

استانست إنهم صلحوه

---------------

الله يسلمكم ..عندي أخوي أصغر عني بسنتين لكنه مو غاوي قراية ودايما أقوله إقرا ..هاي عبارتي(إقرا عشان تتعلم وتستفيد ترى القراية تحسن طريقة تفكيرك وحتى أسلوبك في الكلام ..حتى لو كانت رواية لكن بعد تقوي لغتك)..وهو يطنشني وأحيان يقولي إنه ما يحب يقرا إلا إذا شي فيه صور ..ماحب الكلام وايد فعطيته كتاب (موسوعة خلف أسوار العلم) استانس عليها وايد ..أخوي ذكي وعقله نظيف لكن مشكلته مايعرف يستغل هالشي ولو إنه أحيان يصدمني يوم يقولي معلومات ويحب يطالع قناة ناشيونال جرافيك وايد..يحب العلوم التطبيقية على النظرية ..وصار يقرا بوستاتي ويعطيني رايه فيهم وأحب أعرف رايه لإنه ما يجامل..المهم نفس الشي صار الإسبوع اللي طاف ..كنت أقوله يقرا وكنت وقتها بادية أقرا قصة بس ما كملتها وحطيتها ..هو شاف الكتاب والفضول خلاه يقراه ..مرت ساعة وأشوف اندمج في الكتاب ..واايد استانست وما حاولت أزعجه وعلى مدى ثلاثة أيام أشوف يمسك الكتاب ويقراه ..والشي استانست عليه أكثر اإنه في برنامج في التلفزيون نتابعه الأسبوع اللي قبله كنت أحاول اأخليه يقرا شي قالي بعدين وسار يطالع تلفزيون بس هالمرة كنا نحن نطالع وهو مندمج في القصة ..وشوي يخلي القصة في الصالة وأخوي الثاني اللي أكبر عني بخمس سنين بعد نفس الشي ما يحب يقرا وايد أشوف قضب الكتاب وقعد يقرا واندمج وماشالله خلصه بنفس اليوم ..وبعدها يلست ويا أخوي ويلسنا نتناقش حول الكتاب اللي قراه وتم يقولي شو اللي عجبه ..وبعدين قلتله إذا تبي بعطيك شي ثاني تقراه ..قالي يبا يقرا القصة اللي أنا كاتبنها ..كلهم قروها إلا هو ..فطبعتها عشان يقراها ..

--------------

اليوم مادري شو صارلي عالسحور..قمت مستانسة ..واأضحك ..واأنا أتسحر ..يمكن من دعواتكم لي تسلمون لي والله ..اأذكر أبوي كان يزف أخوي وأنا أطالع أخوي أسويله حركات وأضحك عشان أقهره وهو يضحك ..صح مزاجي تعدل لكن للأسف الأرق للحين مستمر ..حاولت أنام بعد صلاة الفير لكن ماشي فايدة يمين يسار ...تميت وايد آخر شي استسلمت قلت دامني جذي يلست أتذكر متى صمت أول مرة ...

***

ماذكر بالضبط لكن أظن يوم كنت برابع أو خامس إبتدائي ههههه وذكرت سالفة صارت لي ..كنت صايمة وأنا بالمدرسة طبعا مو الكل يصوم تونا صغار عالصيام فقلة اللي يصومون وأذكر في وحدة معاي بالصف كانت من الفاطرين وقتها كانت علينا أبلة سميرة مالت الجغرافيا ..المهم هذي البنت مطلعة ككاو باونتي ويالسة تقهرني "يم يم باونتي ما تبين ..وي وي ماتقدرين إنت صايمة "وأنا أطالعها خاطري ألف ويهها بكف خخخخخخ إلا وتدخل أبلة سميرة الله يذكرها بالخير وتشوفها وتزفها ذيج الزفة المحترمة خخخ قالت لها عالأقل تصوم مو مثلج ههه

ضحكت عليها ..

***

وأذكر لما كنت بأول مادري ثاني إبتدائي..ماكنت أصوم كنا وايد صغار ..لكن في بنت معاي بالصف اسمها (دعاء)ماشالله اسم على مسمى وقتها كانت تصوم ..وكل البنات مصدومين منها محد صايم غيرها ..تميت أسألها كيف تقدر تصوم جان تقولي إنها من كانت بالروضة تصوم ..بس مو يوم كامل ..يعني بداية تصوم لين الظهر ولما كبرت لين العصر لين قدرت تصوم صيام كامل ..أذكر إني وايد كنت مبهورة بها ..ماشالله عليها

***

متى بديت أصوم صح ..لما كنت بسادس ابتدائي .. أذكر إني قررت أصوم رمضان كامل..في أول يوم رمضان أمي حطت الريوق حقي وحق أخواني اللي اأصغر عني ..قلت أنا صايمة ..إلا شوي ما قدرت أقاوم وفطرت خخخخخخ..بس أول يوم فطرت وبعدها كملت صيام رمضان كامل إلا يوم

---------------

اليوم عندي مشوارين لازم أقضيهم بس مالي خلق..

هههههههه بلاها هالقطوة ..شكلها مخترعة ..ضحكتني..شكلها حد معطنها كف عفس ويهها خخخخخخخخخخخخخ

--------------

شوفوا هاليياهل شو يقول ..حبيته هههههه ويا هالضرسين ..

حابة أشكر كل اللي علقوا على موضوع (لا أدري)..الحمدلله الحين صرت أدري

خخخخخخخخ

تعليق كل واحد فيكم حسن من مزاجي وونسني

sharm\رورو الشخبوطة\سمو الأميرة\رندا الجنوبية\الجودي\البطة\مهندستنا أبرار\AM.SA.CHANNEL\Bookmark\محمد القويري\pen seldom

اسمحولي إذا ضيقت خلقكم ..

سانقيوووو فري فري مش هههه هذي باللغة العنجريزية الصعيدية هههه

~دمتم سالمين~